ဖဲအီစထြ့လယါကီၢ်ပူၤအံၤ သွံၣ်ထံးတၢ်ရ့လိာ်အတၢ်မၤဆူၣ်မၤဆီးန့ၣ်မ့ၢ်ဝဲ တၢ်မၤကမၣ်သဲစးတၢ်ဘျၢတခါန့ၣ်လီၤ. တၢ်မ့ၢ်မၤဆူၣ်နၤ, မၤပျံၤမၤဖုးနၤ, မၤနၢၤအီၣ်ဃီၣ်နၤ, မ့တမ့ၢ် ကူၣ်တရံးလၢ ကအိၣ်ဒီးသွံၣ်ထံးတၢ်ရ့လိာ်လၢ အထီဒါလိာ်သးဒီး နတၢ်ဘၣ်သးန့ၣ်, ဘၣ်သ့ၣ်သ့ၣ် နကအဲၣ်ဒိး တီၣ်ဖျါထီၣ်တၢ်ဂ့ၢ်အံၤဆူပၢၤကီၢ်အအိၣ် ပှၤမၤကမၣ်တၢ်အံၤ တၢ်ကဟံးအရ့ ဟ့ၣ်အီၤတၢ်ကမၣ်အဂီၢ်န့ၣ်လီၤ. နာ်သက့, တၢ်တီၣ်ဖျါထီၣ်တၢ်ဂ့ၢ်အံၤ တဆီဘၣ်တဆီန့ၣ် ကဘၣ်လဲၤအသးဒ်သိးသဲစးတၢ်ဘျၢအသိးဒီး နတူၢ်ဘၣ်အီၤကကီဝဲဒၣ်န့ၣ်လီၤ. ကဘၣ်တီၣ်ဖျါထီၣ်အီၤဒ်လဲၣ် န့ၣ် ပကပာ်ဖျါထီၣ်အီၤဒ်လၢလာ်အသိးန့ၣ်လီၤ.
((တၢ်ဟ့ၣ်ပလီၢ်ဘၣ်ဃးတၢ်ပာ်ဖျါတၢ်ဂ့ၢ်တၢ်ကျိၤ: ပှၤဒိကနၣ်ဖိခဲလၢာ်သ့ၣ်ဧၢ တချုးလၢပစးထီၣ်ပာ်ဖျါတၢ်ဂ့ၢ်အံၤဒ်ဘၣ်န့ၣ်, ပအဲၣ်ဒိးဟ့ၣ်ပလီၢ် ပှၤဒိကနၣ်တၢ်ဖိသ့ၣ်တဖၣ် လၢအဘၣ်ဃး တၢ်ဂ့ၢ်တၢ်ကျိၤအံၤန့ၣ်လီၤ. ဖဲတၢ်ဂ့ၢ်အံၤအပူၤန့ၣ် ပကတဲသကိးဘၣ်ဃး သွံၣ်ထွံးတၢ်ရ့လိာ် အတၢ်မၤဆူၣ်မၤဆီးအဂ့ၢ် လၢဘၣ်သ့ၣ်သ့ၣ် ကကဲထီၣ်တၢ်သးတံာ်တာ်လၢပှၤဒိကနၣ်တၢ်ဖိတနီၤအဂီၢ်န့ၣ်လီၤ.))
ဖဲအီစထြ့လယါကီၢ်ပူၤအံၤ မ့ၢ်ကွၢ်လၢတၢ်ထိၣ်ဃူနီၣ်ဂံၢ်နီၣ်ဒွးအဖီခိၣ်န့ၣ် ကိးနံၤဒဲးန့ၣ် ပှၤတီၣ်ဖျါထီၣ် တၢ်ဂ့ၢ်လၢအဘၣ်ဃး သွံၣ်ထံးတၢ်ရ့လိာ် အတၢ်မၤဆူးမၤဆါန့ၣ်အိၣ်ဝဲဒၣ် ၈၅ခါန့ၣ်လီၤ. တၢ်ဃိထံသ့ၣ်ညါသ့ၣ်တဖၣ်အပူၤန့ၣ် ပာ်ဖျါဝဲဒၣ်လၢ ပှၤကညီ သၢဂၤအကျါ အါန့ၢ်ဒ်တဂၤန့ၣ် အဝဲသ့ၣ်တၢ်အိၣ်မူအပူၤ လဲၤခီဖျိဘၣ် သွံၣ်ထံးတၢ်ရ့လိာ် တၢ်မံဃုာ်လၢတအဲၣ်ဒိး အသးတပၣ် သးတအိၣ်ဘၣ်န့ၣ်လီၤ.
Share
