ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌:
ລາຍງານກ່ຽວກັບຄ່າໄປພົບໝໍຊາຽວຊານ.
ລາຍງານໃຫມ່ພົບວ່າ ຄ່າການປິ່ນປົວທີ່ສູງ ໄດ້ເຮັດໃຫ້ຊາວອອສເຕຣເລັຍ ເກືອບສອງລ້ານຄົນ ຊັກຊ້າ ຫລືບໍ່ໄປຕາມນັດຫມາຍ ກັບທ່ານຫມໍຜູ້ຊ່ຽວຊານ.
ລາຍງານຈາກສະຖາບັນ Grattan ກ່າວວ່າ ຜູ້ຊ່ຽວຊານບາງຄົນໃນພາກເອກກະຊົນ ເກັບເງິນຈາກຄົນໄຂ້ ສອງເຖິງສາມເທົ່າ ຫລາຍກວ່າອັດຕາທີ່ Medicare ກໍານົດໄວ້ ສໍາລັບການບໍຣິການເຫລົ່ານັ້ນ.
ສະຖາບັນແນະນໍາວ່າ ການຕັດເງິນທຶນສາທາຣະນະ ທີ່ໃຫ້ກັບທ່ານຫມໍ ທີ່ເກັບເງິນຫລາຍເກີນໄປ ອາດເປັນສ່ວນຫນຶ່ງ ຂອງການແກ້ໄຂ.
Deborah Groarke ລາຍງານ.
ໃນການໂຄສະນາຫາສຽງເລືອກຕັ້ງ ຂອງຣັຖບານກາງ ໃນປີ 2025, Anne Ruston ໂຄສົກດ້ານສຸຂະພາບ ຂອງຝ່າຍຄ້ານ ໄດ້ກ່າວ ໃນລະຫວ່າງການໂຕ້ຖຽງ ກັບຣັຖມົນຕີສາທາຣະນະສຸກ Mark Butler ທີ່ National PressClub ໃນ Canberra.
"ລະບົບສຸຂະພາບຂອງອອສເຕຣເລັຍ ເປັນທີ່ອິດສາຂອງໂລກ ເປັນເວລານານແລ້ວ. ມັນເປັນລະບົບ ທີ່ມີພື້ນຖານ ໃນຄວາມເຊື່ອຖືທີ່ຫມັ້ນຄົງວ່າ ບໍ່ວ່າທ່ານຈະເປັນໃຜ ຫລືອາສັຍຢູ່ບ່ອນໃດກໍຕາມ, ທ່ານຈະສາມາດເຂົ້າເຖິງ ການດູແລສຸຂະພາບທີ່ບໍ່ແພງ, ມີຄຸນນະພາບ ແລະຫົວໃຈຂອງລະບົບນັ້ນ ແມ່ນ Medicare."
ແຕ່ເຖິງແມ່ນວ່າ ນັ້ນອາດເປັນຄວາມຝັນ, ແຕ່ລາຍງານຫລາຍສະບັບ ພົບວ່າ ມັນບໍ່ໄດ້ເປັນຄວາມຈິງສເມີໄປ-ຊຶ່ງບາງທີ ເປັນເຫດຜົນ ທີ່ການດູແລສຸຂະພາບ ເປັນຈຸດສໍາຄັນຢ່າງຫນຶ່ງ ຂອງການຫາສຽງຂອງນາຍົກຣັຖມົນຕີ Anthony Albanese.
ແລະເປັນຫຍັງ ການໂຕ້ຖຽງສາທາຣະນະ ຈຶ່ງເຈາະຈົງໃສ່ GPs.
"ໃນພັກ Labor, ພວກເຮົາຖືວ່າ Medicare ເປັນຫົວໃຈ ແລະຈິດວິນຍານ ຂອງລະບົບສຸຂະພາບຂອງພວກເຮົາ. ພວກເຮົາເຊື່ອວ່າ ຜູ້ຄົນຄວນສາມາດໄປຫາທ່ານຫມໍ ໂດຍບໍ່ຕ້ອງເສັຍເງິນ."
ແຕ່ລາຍງານໃຫມ່ ຈາກສະຖາບັນ Grattan ໄດ້ແນໃສ່ທ່ານຫມໍຜູ້ຊ່ຽວຊານ (Specialist Doctors).
Elizabeth Baldwin ເປັນຜູ້ຫນຶ່ງ ໃນຜູ້ຂຽນຮ່ວມຂອງລາຍງານ.
"ສິ່ງເຫຼົ່ານີ້ ແມ່ນການປິ່ນປົວ ທີ່ຖືກສົ່ງຕໍ່ (Referred Medical Care), ສິ່ງທີ່ທ່ານຕ້ອງການ ການສົ່ງຕໍ່ຈາກ GP ຂອງທ່ານ. ແລະຫລັງຈາກຄົນໄຂ້ ໄດ້ຮັບການສົ່ງຕໍ່ ແລະຕ້ອງການ ການດູແລສຸຂະພາບສະເພາະທາງ, ເຂົາເຈົ້າ ຈະປະເຊີນກັບທາງເລືອກທີ່ຍາກ ໃນລະບົບຂອງເຮົາໃນເວລານີ້. ບໍ່ວ່າເຂົາເຈົ້າ ຈະໄປນັດຫມາຍກັບຜູ້ຊ່ຽວຊານສ່ວນຕົວ ແລະຈາກນັ້ນ ເຂົາເຈົ້າອາດຈະມີຄ່າໃຊ້ຈ່າຍສູງ. ພຽງແຕ່ຫນຶ່ງສ່ວນສາມ ຂອງການນັດຫມາຍເທົ່ານັ້ນ ທີ່ຖືກເກັບເງິນໂດຍ Bulk Bill... ສະນັ້ນ, ເຂົາເຈົ້າຈະຕ້ອງເສັຍຄ່າໃຊ້ຈ່າຍດ້ວຍຕົນເອງ ຫລືເຂົ້າແຖວ ຖ້ານາຍໝໍໃນພາກສາທາຣະນະ. ແລະເວລາລໍຖ້າ ສໍາລັບການນັດຫມາຍສາທາຣະນະ ໂດຍບໍ່ເສັຍເງິນ ອາດເປັນເວລາຫລາຍເດືອນ, ບາງເທື່ອອາດແມ່ນເປັນຫລາຍປີ."
ມັນບໍ່ແມ່ນບັນຫາສະເພາະ.
ຄວາມຕ້ອງການ ສໍາລັບການດູແລຂັ້ນຕົ້ນ ແລະການບໍຣິການ ຂອງຜູ້ຊ່ຽວຊານ ໄດ້ເພີ່ມຂຶ້ນ, ດັ່ງທີ່ຣັຖມົນຕີສາທາຣະນະສຸກ, Mark Butler,ຍອມຮັບ.
"ພວກເຮົາ ມີຈໍານວນຄົນເພີ່ມຂຶ້ນ ແລະມີອາຍຸສູງຂຶ້ນ ດ້ວຍໂຣກຊໍາເຮື້ອ ທີ່ຊັບຊ້ອນຫຼາຍຂຶ້ນ."
ປະມານ ສີ່ໃນ 10 ຄົນ ຂອງຊາວອອສເຕຣເລັຍ ໄດ້ໄປພົບຜູ້ຊ່ຽວຊານ ໃນປີງົບປະມານ 2023-24.
ຄ່າໃຊ້ຈ່າຍສເລັ່ຍ ສໍາລັບຜູ້ຊ່ຽວຊານ ທີ່ເກັບຄ່າໃຊ້ຈ່າຍສູງ ໃນປີ 2023 ສູງເຖິງ 671 ໂດລາ ສໍາລັບການບໍຣິການ ທາງຈິດ ແລະຫຼາຍກວ່າ 350 ໂດລາ ສໍາລັບບໍຣິການ Endocrinology, ໂຣກຫົວໃຈ, ໂຣກຂອງເດັກນ້ອຍ, ພູມຕ້ານທານ ແລະໂຣກປະສາດ.
Elizabeth Baldwin ກ່າວວ່າ ປະມານສອງສ່ວນສາມ ຂອງການນັດຫມາຍ ໃນທຸກວິຊາພິເສດ ແມ່ນການນັດສ່ວນຕົວ, ໂດຍທີ່ຄົນໄຂ້ ໄດ້ຮັບເງິນຄືນ (Rebate) ຈາກ Medicare ແລະຈ່າຍຄ່າສ່ວນຕ່າງ ທີ່ອາດເປັນຈໍານວນຫລວງຫລາຍ.
"ປະມານ ຫນຶ່ງໃນຫ້າຄົນ ຂອງອອສເຕຣເລັຍ ທີ່ໄປຫາຜູ້ຊ່ຽວຊານ ໄດ້ຮັບຜົນກະທົບ ຈາກສິ່ງທີ່ເຮົາເອີ້ນວ່າ ຄ່າໃຊ້ຈ່າຍສູງ ຢ່າງຫນ້ອຍປີລະເທື່ອ. ເຂົາເຈົ້າ ເກັບພຽງແຕ່ສີ່ເປີເຊັນ ຂອງຜູ້ຊ່ຽວຊານເທົ່ານັ້ນ-ສະນັ້ນເຂົາເຈົ້າ ຈຶ່ງເປັນສິ່ງຜິດປົກກະຕິແທ້ໆ-ແລະມັນເປັນຄ່າໃຊ້ຈ່າຍ ຫລາຍກວ່າສາມເທົ່າ ຂອງລາຍຈ່າຍຂອງ Medicare. ນັ້ນຄື ຈໍານວນເງິນ ທີ່ຣັຖບານ ໄດ້ໃຫ້ຊ່ອຍເຫຼືອ ສໍາລັບການໄປຫານາຍໝໍທຸກເທື່ອ. ແລະຄ່າໃຊ້ຈ່າຍທີ່ສູງເຫລົ່ານັ້ນ ອາດເປັນຫລາຍຮ້ອຍໂດລາ ສໍາລັບການໃຫ້ຄຳປຶກສາເທື່ອດຽວ."
ຕົວເລກເຫຼົ່ານີ້ ເກີດຈາກ GPs ເຊັ່ນ Dr Nindhi Ahilan.
"ເມື່ອຄົນໄຂ້ໄປຫາຫມໍ, ເຂົາເຈົ້າ ບໍ່ຄ່ອຍໄດ້ເວົ້າ ກ່ຽວກັບຄ່າໃຊ້ຈ່າຍ ຂອງການໄປຫາ GP ເທົ່າກັບ ທີ່ເຂົາເຈົ້າເວົ້າເຖິງຄ່າໃຊ້ຈ່າຍ ຂອງການໄປຫາຜູ້ຊ່ຽວຊານ... ບາງເທື່ອ ນັ້ນຫມາຍຄວາມວ່າ ການຊັກຊ້າ ໃນການດູແລ... ແຕ່ຜູ້ຍິງບາງຄົນ ພຽງແຕ່ຫລີກເວັ້ນຈາກການດູແລເລີຍ."
Dr Danielle McMullen ປະທານສະມາຄົມການແພດ ຂອງອອສເຕຣເລັຍ (Australian Medical Association) ບໍ່ສາມາດໃຫ້ສໍາພາດ ໃນການໃຫ້ຄຳຕອບຕໍ່ລາຍງານ.
ແຕ່ AMA ກ່າວໃນຖແລງການວ່າ ລາຍງານນັ້ນຢືນຢັນ ສິ່ງທີ່ເຂົາເຈົ້າໄດ້ກ່າວມາຕລອດ ກ່ຽວກັບຄວາມຈໍາເປັນ ທີ່ຈະໃຫ້ທຶນເງິນແກ່ໂຮງຫມໍຣັຖບານ ຫລາຍກວ່າເກົ່າ-ແລະວິທີ ທີ່ການຈ່າຍເງິນຄືນ (Rebate) ຂອງMedicare ໃນປະຈຸບັນຍັງບໍ່ພຽງພໍ.
ນີ້ແມ່ນຄຳຖແລງການ: "ລາຍງານ ເນັ້ນເຖິງຄວາມຈໍາເປັນ ອັນຮີບດ່ວນ ສໍາລັບການປັບປຸງ ເພື່ອໃຫ້ແນ່ໃຈວ່າເງິນຄືນ (Rebate) ຂອງMedicare ໃຫ້ສອດຄ່ອງ ກັບຄ່າໃຊ້ຈ່າຍ ທີ່ເພີ່ມຂຶ້ນ ຂອງການໃຫ້ການປິ່ນປົວສຸຂະພາບ ທີ່ມີຄຸນນະພາບສູງ ໃຫ້ທັນເວລາ ແກ່ຊາວອອສເຕຣເລັຍທຸກຄົນ... ການບໍຣິການຄົນເຈັບນອກ ເອກກະຊົນ ຫລຸດຜ່ອນ ຄວາມກົດດັນ ຕໍ່ລະບົບສຸຂະພາບໂດຍລວມ ແລະການ ສນັບສນູນຢ່າງຕໍ່ເນື່ອງ ສໍາລັບພາກສ່ວນນີ້... ແມ່ນສໍາຄັນ ຕໍ່ການຮັກສາທາງເລືອກ, ລາຄາບໍ່ແພງ ແລະຄວາມຍັ້ງຍືນ."
ການຄົ້ນພົບ ຂອງສະຖາບັນ Grattan ເປັນໄປຕາມການລາຍງານ ທີ່ຄ້າຍຄືກັນນີ້ ຈາກ Private Health Australia ແລະ Commonwealth Bank ກ່ຽວກັບຄ່າໃຊ້ຈ່າຍ ດ້ານການດູແລໂດຍຜູ້ຊ່ຽວຊານ.
ເອກະສານທັງສອງພົບວ່າ ຄົນໄຂ້ໃນເຂດ ACT, New South Wales ແລະ Queensland ກໍາລັງໄດ້ຮັບຜົນກະທົບ ຈາກຄ່າໃຊ້ຈ່າຍ ການປິ່ນປົວເອກກະຊົນ ທີ່ສູງທີ່ສຸດ ໃນອອສເຕຣເລັຍ.
Elizabeth Baldwin ກ່າວວ່າ ຄ່າໃຊ້ຈ່າຍທີ່ສູງເຫລົ່ານີ້ ມີຜົນກະທົບໃນທາງລົບຕໍ່ຄົນໄຂ້, ອາດນໍາໄປສູ່ ການຂາດການວິນິສັຍ, ຄວາມເຈັບປວດທີ່ຫລີກລ້ຽງໄດ້ ແລະເພີ່ມຄວາມກົດດັນ ໃຫ້ແກ່ໂຮງຫມໍ.
ນາງກ່າວວ່າ ຈໍາເປັນຕ້ອງມີການດຳເນີນການທີ່ເຂັ້ມແຂງ-ຮວມທັງເງິນທຶນ ສໍາລັບການນັດຫມາຍຜູ້ຊ່ຽວຊານ ຕື່ມອີກຫນຶ່ງລ້ານນັດຫມາຍທຸກປີ ໃນດ້ານທີ່ໄດ້ຮັບການດູແລຫນ້ອຍທີ່ສຸດ, ເພີ່ມເງິນຫຼາຍຂຶ້ນ ສໍາລັບການຝຶກຝົນຜູ້ຊ່ຽວຊານ ໃນເຂດຊົນນະບົດ, ແລະການຕັ້ງຊື່ແລະຄວາມອັບອາຍ.
"ຣັຖບານ ຄວນຄິດໄລ່ວ່າ ຜູ້ຊ່ຽວຊານເກັບຄ່າບໍຣິການ ໂດຍສເລັ່ຍຫລາຍປານໃດ ໃນການປຶກສາທັງຫມົດຂອງເຂົາເຈົ້າ, ແລະຜູ້ທີ່ເກັບຄ່າບໍຣິການ ເຖິງສາມເທົ່າ ຫລືສູງກວ່າ ຂີດກຳໜົດຂອງ Medicare ຄວນຖືກຖອນເງິນທຶນ ຂອງ Medicare. ພວກເຮົາຄິດວ່າ ຣັຖບານກາງ ບໍ່ຄວນຊ່ອຍເຫລືອໝໍຊ່ຽວຊານ ໃນການເກັບເງິນຈາກຄົນໄຂ້ ຢ່າງຫລວງຫລາຍ."
AMA ກ່າວວ່າ ນັ້ນເປັນການຕອບໂຕ້ ທີ່ຮຸນແຮງ ແລະບໍ່ຈໍາເປັນ.
ຄຳຖແລງການ: "ລາຍງານນັ້ນ ແນະນໍາເກີນໄປວ່າ ຣັຖບານຄວນປະຕິເສດຄົນໄຂ້ ທີ່ຈະເຂົ້າເຖິງເງິນຄືນ (Rebate) ຈາກ Medicare ຂອງເຂົາເຈົ້າ ພຽງແຕ່ເພາະການເລືອກຜູ້ຊ່ຽວຊານ. ພວກເຮົາຍັງໄດ້ຮຽກຮ້ອງ ໃຫ້ມີເຈົ້າຫນ້າທີ່ ລະບົບສຸຂະພາບເອກກະຊົນ (Private Health System Authority) ທີ່ເປັນອິດສຣະ ເພື່ອດູແລການປະຕິຮູບ ທີ່ຈະສົ່ງເສີມລະບົບສຸຂະພາບເອກະຊົນ ທີ່ຫມັ້ນຄົງຫລາຍກວ່າເກົ່າ-ລະບົບທີ່ປົກປ້ອງ ການເລືອກຂອງຄົນໄຂ້ ແລະອິດສຣະທາງຄລີນິກ."
ເນື້ອເລື່ອງໂດຍ Deborah Groarke ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
