ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌:
ຄຳພິພາກສາ ຕໍ່ການຕົກ ຂອງຖ້ຽວບິນ MH17.
ສານສິດທິມະນຸດຢູໂຣບ ໄດ້ມີຄຳພິພາກສາ ຄັ້ງປວັດສາດ ວ່າຣັສເຊັຍ ມີສ່ວນຮັບຜິດຊອບ ຕໍ່ການຕົກ ຂອງຖ້ຽວບິນ MH17 ຂອງ Malaysia Airlines ໃນປີ 2014.
ຄຳພິພາກສາຂອງສານ ແມ່ນຕອບສນອງ ຕໍ່ສີ່ຄະດີຂອງ Ukraine ແລະ Netherlands ທີ່ຟ້ອງຣັສເຊັຍ ນັບຕັ້ງແຕ່ການເລີ່ມຕົ້ນ ຂອງການຂັດແຍ້ງໃນປີ 2014.
ຄຳຕັດສິນສ່ວນໃຫຍ່ ເປັນສັນຍາລັກ, ແຕ່ມັນເກີດຂຶ້ນ ໃນຂນະທີ່ຣັສເຊັຍ ເພີ່ມການໂຈມຕີ Ukraine, ໂດຍມີ Drones 728 ລໍາເຂົ້າໄປໃນປະເທດໃນຄືນດຽວ.
Sydney Lang ລາຍງານ.
ໃນເດືອນກໍລະກົດປີ 2014, ຍົນລໍາຫນຶ່ງ ບິນຈາກ Amsterdam ໄປຫາ Kuala Lumpur-ຖ້ຽວບິນ MH17 ຂອງ Malaysian Airlines -ໄດ້ຖືກຍິງຕົກ ໃນພາກຕາເວັນອອກຂອງ Ukraine, ໄດ້ເຮັດໃຫ້ 253 ຄົນໃນຍົນເສັຍຊີວິດ-ຮວມທັງຊາວ 38 ຄົນ.
ໃນເວລານັ້ນ, ກຸ່ມແບ່ງແຍກດິນແດນ ທີ່ຕໍ່ຕ້ານ Kyiv, ຊຶ່ງໄດ້ຮັບການ ສນັບສນູນຈາກຣັສເຊັຍ, ກໍາລັງຕໍ່ສູ້ ກັບກອງທັບ Ukraine ຫລັງຈາກການຮຸກຮານ ຂອງຣັສເຊັຍ ແລະການຍຶດເອົາ Crimea.
ແມ່ນກຸ່ມແບ່ງແຍກດິນແດນ ທີ່ໄດ້ຮັບການສນັບສນູນ ຈາກຣັສເຊັຍ ທີ່ໄດ້ຍິງຍົນ Boeing 777, ໂດຍໃຊ້ຂີປະນາວຸດ ທີ່ຜລິດໂດຍຣັສເຊັຍ.
ຫລາຍກວ່າສິບປີຜ່ານໄປ, ສານສິດທິມະນຸດສູງສຸດ ຂອງຢູໂຣບ ໄດ້ຕັດສິນວ່າ ຣັສເຊັຍເປັນຜູ້ຮັບຜິດຊອບ.
ປະທານ ສານສິດທິມະນຸດຂອງຢູໂຣບ Mattias Guyomar ກ່າວວ່າ ຣັສເຊັຍ ໄດ້ລ່ວງລະເມີດສິດທິ ໃນຊີວິດຂອງຜູ້ໂດຍສານຢູ່ໃນຍົນ.
"ສານພົບວ່າ ຂີປະນາວຸດ ທີ່ເຮັດໃຫ້ຍົນ MH17 ຕົກ ຖືກຍິງໂດຍສະມາຊິກຄົນຫນຶ່ງ ຂອງກຸ່ມທະຫານຂອງຣັສເຊັຍ ຂອງ Buk Telar, ຫລືໂດຍສະມາຊິກຂອງ DPR. ບໍ່ຈໍາເປັນ ທີ່ສານຈະຕັດສິນວ່າ ຜູ້ໃດໄດ້ຍິງຂີປະນາວຸດ ເພາະຣັສເຊັຍ ມີຫນ້າທີ່ຮັບຜິດຊອບ ຕໍ່ການກະທໍາ ຂອງກອງກຳລັງຕິດອາວຸດຣັສເຊັຍ ແລະກຸ່ມແບ່ງແຍກດິນແດນ ຕິດອາວຸດ. ຣັສເຊັຍ ບໍ່ມີມາດຕະການໃດໆ ທີ່ຈະລະບຸເປົ້າໝາຍ ຢ່າງຖືກຕ້ອງ ຂອງຂີປະນາວຸດ ຊຶ່ງລະເມີດກົດຫມາຍ ຂອງມະນຸດສາກົນ. ການຂ້າພົນລະເຮືອນ ຢູ່ໃນຍົນ MH17 ບໍ່ສາມາດອະທິບາຍໄດ້ວ່າ ເປັນການກະທໍາ ທີ່ຖືກຕ້ອງຕາມກົດຫມາຍຂອງສົງຄາມ ແລະລະເມີດສິດທິ ທີ່ຈະມີຊີວິດຢູ່ ພາຍໃຕ້ອະນຸສັນຍາ."
ການຕັດສິນດັ່ງກ່າວ ເປັນສ່ວນຫນຶ່ງຂອງການຕັດສິນ ທີ່ກວ້າງຂວາງ ທີ່ກວດສອບ ການຮ້ອງຮຽນສີ່ຂໍ້ ທີ່ຍື່ນຕໍ່ສານ ລະຫວ່າງປີ 2014 ແລະ 2022, ສາມເລື້ອງຈາກ Ukraine ແລະອີກເລື້ອງຫນຶ່ງ ຈາກ the Netherlands.
ຄນະຜູ້ພິພາກສາ 17 ຄົນ ພົບວ່າ ນັບແຕ່ປີ 2014, ຣັສເຊັຍ ໄດ້ລະເມີດອະນຸສັນຍາສິດທິມະນຸດຢູໂຣບ ຢ່າງຊັດແຈ້ງ ແລະຢ່າງບໍ່ເຄີຍມີມາກ່ອນ.
ການລະເມີດເຫລົ່ານີ້ ຮວມເຖິງ, ແຕ່ບໍ່ຈໍາກັດພຽງແຕ່ ການຂ້າພົນລະເຮືອນ ແລະທະຫານນອກການສູ້ຮົບ, ການທໍຣະມານ, ການບັງຄັບໃຊ້ແຮງງານ ແລະການກັກຂັງພົນລະເຮືອນ ຢ່າງຜິດກົດຫມາຍ.
Mattias Guyomar ກ່າວວ່າ ການຄົ້ນພົບເຫລົ່ານີ້ ສະແດງໃຫ້ເຫັນ ຂນາດຂອງການລ່ວງລະເມີດ ທີ່ຣັສເຊັຍໄດ້ກະທຳ.
"ໂດຍທົ່ວໄປ, ຫລັກຖານໄດ້ສະແດງໃຫ້ເຫັນຮູບພາບ ຂອງການປະຕິບັດທີ່ຕິດຕໍ່ກັນຢ່າງຊັດແຈ້ງ ຂອງການປະພຶດທີ່ຜິດກົດຫມາຍ ໂດຍຕົວແທນຂອງຣັສເຊັຍ ໃນຂອບເຂດອັນກວ້າງທົ່ວ Ukraine. ສິ່ງນີ້ ຮວມເຖິງ ການໂຈມຕີທາງທະຫານ ທີ່ບໍ່ເລືອກເປົ້າໝາຍ, ບໍ່ສົມສັດສ່ວນ ແລະແນເປົ້າຫມາຍ ໃສ່ພື້ນທີ່ບ້ານເຮືອນ ຊຶ່ງລະເມີດກົດຫມາຍມະນຸດສະທັມ ລະຫວ່າງປະເທດ."
ຣັສເຊັຍ ໄດ້ອອກຈາກອະນຸສັນຍາສິດທິມະນຸດຢູໂຣບ ໃນເດືອນກັນຍາ ປີ 2022, ບໍ່ດົນ ຫລັງຈາກຖືກໄລ່ອອກຈາກສະພາຢູໂຣບ ເພາະການຮຸກຮານ Ukraine.
ດັ່ງນັ້ນ ການຕັດສິນນັ້ນ ຈຶ່ງເປັນສັນຍາລັກເປັນສ່ວນໃຫຍ່, ແລະ Dmitry Peskov ໂຄສົກຂອງ Kremlin ກ່າວວ່າ Moscow ວາງແຜນທີ່ຈະບໍ່ເອົາໃຈໃສ່ຕໍ່ເຂົາເຈົ້າ.
ແຕ່ປະທານາທິບໍດີ Ukraine, Volodymyr Zelenskyy, ກ່າວວ່າ ການຕັດສິນນັ້ນ ເປັນການຕັດສິນຄັ້ງປວັດສາດ ແລະເປັນໄຊຊນະທີ່ປະຕິເສດບໍ່ໄດ້ ສໍາລັບ Ukraine. ແລະຄອບຄົວຂອງຜູ້ເຄາະຮ້າຍ ໄດ້ຍ້ອງຍໍການຕັດສິນໃຈ ວ່າເປັນເຫດການສໍາຄັນ ໃນການສແວງຫາຄວາມຍຸດຕິທັມ ເປັນເວລາ 11 ປີ.
ໃນຂນະດຽວກັນ, ຣັສເຊັຍ ໄດ້ດໍາເນີນການໂຈມຕີ ດ້ວຍ Drone ທີ່ໃຫຍ່ທີ່ສຸດໃນ Ukraine ນັບຕັ້ງແຕ່ສົງຄາມໄດ້ເລີ່ມຕົ້ນ, ໂດຍມີ Drone 728 ລໍາ ແລະຂີປະນາວຸດ 13 ລູກທີ່ຍິງໃນຄືນດຽວ.
ຫລາຍກວ່າ 10 ເຂດຂອງ Ukraine ໄດ້ຮັບຜົນກະທົບ, ຊຶ່ງຖືກກະທົບຫລາຍທີ່ສຸດ ແມ່ນເມືອງ Lutsk, ຊຶ່ງເປັນສູນກາງທີ່ສໍາຄັນ ທີ່ໃຊ້ໃນການຮັບເອົາຄວາມຊ່ອຍເຫລືອທາງທະຫານ ຈາກຕ່າງປະເທດ.
ນາຍົກຣັຖມົນຕີ German, Friedrich Merz, ກ່າວວ່າ ການຍົກລະດັບຂອງຣັສເຊັຍ ບໍ່ແມ່ນກ່ຽວກັບເປົ້າຫມາຍທາງທະຫານອີກຕໍ່ໄປ.
"ບັດນີ້ ຣັສເຊັຍກໍາລັງຖິມລະເບີດໃສ່ເມືອງຕ່າງໆຂອງ Ukraine ຢ່າງຫລວງຫລາຍ ແລະຈົງໃຈທຸກຄືນ. ຄືນທີ່ຜ່ານມາ, ພວກເຮົາໄດ້ປະສົບກັບການໂຈມຕີດ້ວຍລະເບີດ ແລະຈະຫລວດທີ່ຮຸນແຮງທີ່ສຸດ ນັບຕັ້ງແຕ່ການເລີ່ມຕົ້ນຂອງສົງຄາມ. ເຂົາເຈົ້າພຽງແຕ່ແນເປົ້າຫມາຍໃສ່ສະຖານທີ່ພົນລະເຮືອນເທົ່ານັ້ນ; ມັນເປັນການກໍ່ການຮ້າຍ ຕໍ່ປະຊາຊົນ ແລະບໍ່ກ່ຽວຂ້ອງກັບສົງຄາມ ຫຼືເປົ້າຫມາຍຂອງທະຫານອີກຕໍ່ໄປ."
ໃນການຕອບໂຕ້ ຫລັງຈາກການໂຈມຕີ, Volodymyr Zelenskyy ກ່າວວ່າ ປະທານາທິບໍດີ Vladimir Putin ຂອງຣັສເຊັຍ ກໍາລັງພະຍາຍາມຊີ້ແຈງ ກ່ຽວກັບສັນຕິພາບ ທີ່ນໍາໂດຍສະຫະຣັດອາເມຣິກາ ເມື່ອບໍ່ດົນມານີ້.
ໂດຍທີ່ມີ Decoy Drones ທີ່ຍິງຂຶ້ນໂດຍຣັສເຊັຍ ໃນຫລາຍອາທິດຜ່ານມານີ້, ເບິ່ງຄືວ່າ ຣັສເຊັຍກໍາລັງພະຍາຍາມ ເອົາຊນະລະບົບປ້ອງກັນທາງອາກາດຂອງ Ukraine.
ສິ່ງນີ້ ເກີດຂຶ້ນໃນຂນະທີ່ ປະທານາທິບໍດີ Donald Trump ປະກາດວ່າ ສະຫະຣັດອາເມຣິກາ ຈະສົ່ງອາວຸດໄປໃຫ້ Ukraine ອີກ ຫລັງຈາກໄດ້ຢຸດຊົ່ວຄາວ.
Maria Zakharova ໂຄສົກການຕ່າງປະເທດ ຂອງຣັສເຊັຍກ່າວວ່າ ການກັບມາສົ່ງອາວຸດ ຈາກສະຫະຣັດອາເມຣິກາ ຈະເຮັດໃຫ້ສະພາບການຮ້າຍແຮງຂຶ້ນ.
"ຫລັງຈາກ Washington ໄດ້ປະກາດການຕັດສິນໃຈ ທີ່ຈະຢຸດການຈັດຫາ ທາງທະຫານ ໃຫ້ແກ່ລະບົບການປົກຄອງຂອງ Kyiv ໃນລະຫວ່າງ ການກວດສອບສາງ ຂອງ Pentagon, ສະຫະຣັດອາເມຣິກາ ໄດ້ປະກາດ ກ່ຽວກັບການກັບຄືນມາ ຂອງເຂົາເຈົ້າ. ຜົນສະທ້ອນຂອງການເຄື່ອນໄຫວດັ່ງກ່າວ ຍັງບໍ່ໄດ້ຖືກປະເມີນ, ແຕ່ສາມາດເວົ້າໄດ້ຢ່າງແນ່ນອນວ່າ ການສົ່ງອາວຸດໄປໃຫ້ Ukraine ຕໍ່ໄປ ຈະບໍ່ຊ່ອຍໃນການແກ້ໄຂ ຄວາມຂັດແຍ້ງຢ່າງສັນຕິ, ຊຶ່ງຊຸມຊົນທົ່ວໂລກ, ຮວມທັງຝ່າຍຕາເວັນຕົກ, ເບິ່ງຄືວ່າຮຽກຮ້ອງໃຫ້ມີການແກ້ໄຂ."
ໃນຂນະດຽວກັນ, Mr Zelenskyy ກໍາລັງຊຸກຍູ້ ໃຫ້ພັນທະມິດ
ຂອງ Ukraine ໃຫ້ຂວ້ຳບາດຕໍ່ນ້ຳມັນຂອງຣັສເຊັຍ ແລະຜູ້ທີ່ຊ່ອຍເຫລືອສົງຄາມຂອງຣັສເຊັຍ ໂດຍການບໍ່ຊື້ມັນ.
ໃນການໄປຢ້ຽມຢາມ Italy ກ່ອນກອງປະຊຸມນານາຊາດ ກ່ຽວກັບການຟື້ນຟູປະເທດ Ukraine, ລາວໄດ້ພົບກັບ Keith Kellogg ຜູ້ຕ່າງໜ້າຂອງອາເມຣິກາປະຈຳ Ukraine ສໍາລັບສິ່ງທີ່ລາວກ່າວວ່າ ເປັນການສົນທະນາທີ່ "ສໍາຄັນ" ກ່ຽວກັບການຈັດຫາອາວຸດ ແລະການເພີ່ມຄວາມເຂັ້ມແຂງ ໃຫ້ແກ່ການປ້ອງກັນທາງອາກາດ.
ມັນເປັນເທື່ອທໍາອິດ ທີ່ສະຫະຣັດອາເມຣິກາ ໄດ້ມີສ່ວນຮ່ວມໃນກອງປະຊຸມຂອງ Coalition of the Willing, ກຸ່ມປະເທດຢູໂຣບທີ່ ສນັບສນູນ Ukraine.
Kyiv ກໍາລັງຊອກຫາ ທີ່ຈະຊື້ລະບົບປ້ອງກັນອາກາດ Patriot ຈາກ Washington, ຊຶ່ງຖືວ່າ ເປັນກຸນແຈສໍາຄັນ ໃນການປົກປ້ອງເມືອງຂອງຕົນ.
Donald Trump ກ່າວວ່າ ລາວກໍາລັງພິຈາຣະນາການຂາຍ.
"ເຂົາເຈົ້າຕ້ອງການມັນ. ເຂົາເຈົ້າໄດ້ຂໍມັນ. ມັນເປັນຂອງຫາຍາກຫລາຍ ເພາະມີຫຼາຍລະບົບ ໄດ້ຖືກສົ່ງໄປ Ukraine. ແຕ່ເຂົາເຈົ້າຕ້ອງການມັນ. ຂ້າພະເຈົ້າຮູ້ວ່າ ເຂົາເຈົ້າໄດ້ຂໍຮ້ອງ. ພວກເຮົາຕ້ອງພິຈາຣະນາເລື້ອງນີ້. ລາຄາແພງຫຼາຍ. ລະບົບລາຄາແພງຫຼາຍ. ມັນໜ້າເສັຍດາຍ ທີ່ເຮົາຕ້ອງໃຊ້ຈ່າຍເງິນຢ່າງຫລວງຫລາຍ ໃນສົງຄາມທີ່ຈະບໍ່ເກີດຂຶ້ນ ຖ້າຫາກຂ້າພະເຈົ້າເປັນປະທານາທິບໍດີ. ນັ້ນເປັນສົງຄາມທີ່ຮ້າຍແຮງ. ແລະມັນເປັນຄວາມອັບອາຍແທ້ໆ. ມັນແມ່ນ, ເອີ...ໂສກເສົ້າຫລາຍ. ທ່ານຮູ້ບໍ່ວ່າ ເມື່ອທ່ານເວົ້າເຖິງລະບົບເຊັ່ນນັ້ນ, ແມ່ນລະບົບທີ່ຊັບຊ້ອນຫຼາຍ... ມີລາຄາແພງຫລາຍ, ແລະເຂົາເຈົ້າເຮັດ ເພາະເຂົາເຈົ້າຢາກປ້ອງກັນຊີວິດ. ເຂົາເຈົ້າກໍາລັງຖືກໂຈມຕີຢ່າງຫນັກ, ຫນັກຫລາຍ. ສະນັ້ນ ພວກເຮົາຈຶ່ງກໍາລັງເບິ່ງມັນ."
ເນື້ອເລື່ອງໂດຍ Sydney Lang ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
