ਸ਼ਿਵਾ ਚੌਹਾਨ ਨੂੰ ਮੈਲਬੌਰਨ ਤੋਂ ਲਾਪਤਾ ਹੋਇਆਂ 10 ਵਰ੍ਹੇ ਬੀਤ ਚੁੱਕੇ ਹਨ, ਪਰ ਅਜੇ ਵੀ ਉਸਦਾ ਕੋਈ ਥੌਹ ਪਤਾ ਨਹੀਂ ਚੱਲ ਸਕਿਆ ਹੈ

ਮਈ 2014 ਵਿੱਚ ਮੈਲਬੌਰਨ ਦੇ ਦੱਖਣ-ਪੂਰਬੀ ਇਲਾਕੇ ਵਿੱਚ ਡਿਲੀਵਰੀ ਦਾ ਕੰਮ ਕਾਰ ਕਰਦੇ ਸਮੇਂ ਸ਼ਿਵਾ ਚੌਹਾਨ ਦੇ ਲਾਪਤਾ ਹੋਇਆਂ ਨੂੰ ਦਸ ਸਾਲ ਬੀਤ ਚੁੱਕੇ ਹਨ, ਪਰ ਉਸ ਬਾਰੇ ਅਜੇ ਤੱਕ ਕੋਈ ਸੁਰਾਗ ਨਹੀਂ ਮਿਲ ਸਕਿਆ ਹੈ ਅਤੇ ਉਸ ਦਾ ਪਰਿਵਾਰ ਸ਼ਿਵਾ ਦੇ ਵਿਛੋੜੇ ਦੇ ਦਰਦ ਨਾਲ ਜੂਝ ਰਿਹਾ ਹੈ।

Indian national Shiva Chauhan, who is missing since May 1, 2014. The family is still searching for answers Source: Supplied

ਸ਼ਿਵਾ ਦੇ ਵੱਡੇ ਭਰਾ ਦਿਨੇਸ਼ ਨੇ ਐਸ ਬੀ ਐਸ ਪੰਜਾਬੀ ਨਾਲ ਕੀਤੀ ਹਾਲੀਆ ਗੱਲਬਾਤ ਦੌਰਾਨ ਆਪਣਾ ਦੁੱਖ ਸਾਂਝਾ ਕਰਦਿਆਂ ਕਿਹਾ, "ਸ਼ਿਵਾ ਦੇ ਗਾਇਬ ਹੋਣ ਤੋਂ ਬਾਅਦ ਇਹ ਸਾਡੇ ਪੂਰੇ ਪਰਿਵਾਰ ਲਈ ਮੁਸ਼ਕਲ ਭਰਿਆ ਸਮਾਂ ਰਿਹਾ ਹੈ।"

"ਅਸੀਂ ਪਿਛਲੇ ਦੱਸ ਸਾਲਾਂ ਤੋਂ ਹਰ ਦਿਨ ਅਨਿਸ਼ਚਿਤਤਾ ਦੇ ਵਿਰੁੱਧ ਲੜਾਈ ਲੜ ਰਹੇ ਹਾਂ, ਜਿਸਦਾ ਸਾਨੂੰ ਕੋਈ ਜਵਾਬ ਨਜ਼ਰ ਨਹੀਂ ਆਉਂਦਾ।"

ਇਸ ਵੇਲੇ ਭਾਰਤ ਵਿੱਚ ਰਹਿ ਰਹੇ ਦਿਨੇਸ਼ ਦਾ ਮੰਨਣਾ ਹੈ ਸ਼ਿਵਾ ਖੁਦ ਕਿਤੇ ਗਾਇਬ ਨਹੀਂ ਹੋਇਆ ਬਲਕਿ ਉਹ ਕਿਸੇ ਸਾਜ਼ਿਸ਼ ਦਾ ਸ਼ਿਕਾਰ ਹੋਇਆ ਹੈ।

ਕਿਸੇ ਠੋਸ ਲੀਡ ਦੀ ਘਾਟ ਕਾਰਨ ਪੈਦਾ ਹੋਈ ਇਸ ਭਾਵਨਾ ਅਤੇ ਅਧਿਕਾਰੀਆਂ ਦੀ ਇਸ ਮਾਮਲੇ 'ਤੇ ਧਾਰੀ ਚੁੱਪੀ ਨੇ ਉਸਦੇ ਪਰਿਵਾਰ ਲਈ ਹਾਲਾਤਾਂ ਨੂੰ ਹੋਰ ਮੁਸ਼ਕਲ ਬਣਾ ਦਿੱਤਾ ਹੈ।

Shiva Chauhan, who is missing from Melbourne since May 2014 Source: Supplied

ਦਿਨੇਸ਼ ਨੇ ਆਪਣੀ ਨਿਰਾਸ਼ਾ ਜ਼ਾਹਿਰ ਕਰਦਿਆਂ ਕਿਹਾ ਕਿ, "ਪੁਲਿਸ ਨੇ ਸਾਨੂੰ ਪਿਛਲੇ ਕਈ ਸਾਲਾਂ ਤੋਂ ਕੋਈ ਵੀ ਅਪਡੇਟ ਨਹੀਂ ਦਿੱਤਾ ਹੈ।"

"ਮੇਰੇ ਮਾਤਾ-ਪਿਤਾ ਹੁਣ ਕਾਫੀ ਬਜ਼ੁਰਗ ਹੋ ਚੁੱਕੇ ਹਨ ਅਤੇ ਉਨ੍ਹਾਂ ਦੀ ਸਿਹਤ ਵੀ ਕਮਜ਼ੋਰ ਰਹਿੰਦੀ ਹੈ, ਪਰ ਉਹ ਹਰ ਰੋਜ਼ ਇਹੀ ਉਮੀਦ ਜਗਾਈ ਰੱਖਦੇ ਹਨ ਕਿ ਸਾਨੂੰ ਸ਼ਿਵਾ ਬਾਰੇ ਕੋਈ ਨਾ ਕੋਈ ਖਬਰਸਾਰ ਜ਼ਰੂਰ ਮਿਲੇਗੀ।"

ਦਿਨੇਸ਼ ਨੇ ਕਿਹਾ ਕਿ, "ਦੱਸ ਸਾਲ ਬੀਤ ਜਾਣ ਦੇ ਬਾਵਜੂਦ ਵੀ ਸਾਨੂੰ ਅਜੇ ਇਹੀ ਲੱਗਦਾ ਹੈ ਕਿ ਸ਼ਿਵਾ ਸਾਡੇ ਕੋਲ ਵਾਪਸ ਆਉਣ ਦਾ ਰਸਤਾ ਜਲਦ ਹੀ ਲੱਭ ਲਵੇਗਾ।"

ਜ਼ਿਕਰਯੋਗ ਹੈ ਕਿ ਗਾਇਬ ਹੋਣ ਤੋਂ ਪਹਿਲਾਂ ਸ਼ਿਵਾ ਭਾਰਤ ਵਾਪਸ ਪਰਤਣ ਦੀ ਤਿਆਰੀ ਕਰ ਰਿਹਾ ਸੀ, ਪਰ 1 ਮਈ 2014 ਦੀ ਰਾਤ ਨੂੰ ਉਹ ਅਚਾਨਕ ਗਾਇਬ ਹੋ ਗਿਆ ਸੀ।

ਪੁਲਿਸ ਵੱਲੋਂ ਜਾਂਚ ਅਜੇ ਵੀ ਜਾਰੀ ਹੈ

ਹਾਲ ਹੀ ਵਿੱਚ ਐਸ ਬੀ ਐਸ ਪੰਜਾਬੀ ਨੇ ਸ਼ਿਵਾ ਦੇ ਕੇਸ ਬਾਰੇ ਅਪਡੇਟ ਲਈ ਵਿਕਟੋਰੀਆ ਪੁਲਿਸ ਨਾਲ ਸੰਪਰਕ ਕੀਤਾ ਸੀ।

ਆਪਣੇ ਅਧਿਕਾਰਤ ਬਿਆਨ ਵਿੱਚ ਉਨ੍ਹਾਂ ਕਿਹਾ ਕਿ, "2014 ਵਿੱਚ ਲਾਪਤਾ ਹੋਣ ਸ਼ਿਵਾ ਚੌਹਾਨ ਦੇ ਕੇਸ ਬਾਰੇ ਮਿਸਿੰਗ ਪਰਸਨਜ਼ ਸਕੁਐਡ ਦੁਆਰਾ ਕੀਤੀ ਜਾ ਰਹੀ ਜਾਂਚ ਅਜੇ ਵੀ ਖੁੱਲ੍ਹੀ ਹੈ।"

ਉਨ੍ਹਾਂ ਅੱਗੇ ਕਿਹਾ ਕਿ, "ਇੱਕ ਡਿਲੀਵਰੀ ਮੈਨ ਵਜੋਂ ਕੰਮ ਕਰਦੇ 27 ਸਾਲਾ ਨੌਜਵਾਨ ਸ਼ਿਵਾ, ਨੇ ਵੀਰਵਾਰ, 1 ਮਈ, 2014 ਦੀ ਸ਼ਾਮ ਨੂੰ ਆਪਣਾ ਕੰਮ ਸ਼ੁਰੂ ਕੀਤਾ ਸੀ। ਉਸ ਨੂੰ ਆਖਰੀ ਵਾਰ ਸ਼ੁੱਕਰਵਾਰ, 2 ਮਈ ਨੂੰ ਸਵੇਰੇ 12:30 ਵਜੇ ਦੇ ਕਰੀਬ ਸਾਊਥ ਪਾਰਕ ਰੋਡ, ਡੈੰਡੇਨੋਂਗ ਸਾਊਥ 'ਤੇ ਇੱਕ ਬੇਕਰੀ ਵਿੱਚ ਦੇਖਿਆ ਗਿਆ ਸੀ।"

"ਸ਼ੁੱਕਰਵਾਰ, 2 ਮਈ ਨੂੰ ਦੁਪਹਿਰ 3 ਵਜੇ ਦੇ ਕਰੀਬ ਉਸਦੀ ਡਿਲੀਵਰੀ ਵੈਨ 'ਕੀਜ਼ਬੋਰੋ' ਦੇ ਹਟਨ ਰੋਡ ਤੋਂ ਬਰਾਮਦ ਕੀਤੀ ਗਈ।"

Shiva's van, which was found locked at Keysborough with his belongings intact, on 2 May 2014 Credit: Victoria Police

"ਜਾਂਚਕਰਤਾਵਾਂ ਦਾ ਮੰਨਣਾ ਹੈ ਕਿ ਇੱਕ ਚੋਰੀ ਹੋਈ 2006 ਮਾਡਲ ਮਾਰੂਨ ਟੋਇਟਾ ਕੈਮਰੀ ਸੇਡਾਨ, ਰਜਿਸਟ੍ਰੇਸ਼ਨ ULO 972, ਸ਼ਾਇਦ ਸ਼ਿਵਾ ਦੇ ਲਾਪਤਾ ਹੋਣ ਦੇ ਕੇਸ ਵਿੱਚ ਸ਼ਾਮਲ ਹੋ ਸਕਦੀ ਹੈ। ਪਰ ਕਈ ਪੁੱਛਗਿੱਛਾਂ ਦੇ ਬਾਵਜੂਦ, ਇਹ ਗੱਡੀ ਕਦੇ ਨਹੀਂ ਮਿਲ ਸਕੀ।"

ਸ਼ਿਵਾ ਨੂੰ ਲਾਪਤਾ ਹੋਏ ਦੱਸ ਸਾਲ ਬੀਤ ਜਾਣ ਬਾਰੇ ਗੱਲ ਕਰਦਿਆਂ ਪੁਲਿਸ ਦੇ ਬੁਲਾਰੇ ਨੇ ਕਿਹਾ ਕਿ, "ਪਿਛਲੇ 10 ਸਾਲਾਂ ਵਿੱਚ ਇੱਕ ਮਹੱਤਵਪੂਰਨ ਜਾਂਚ ਦੇ ਬਾਵਜੂਦ, ਸ਼ਿਵਾ ਦਾ ਅਜੇ ਤੱਕ ਕੁਝ ਵੀ ਪਤਾ ਨਹੀਂ ਲੱਗਿਆ ਹੈ ਅਤੇ ਨਾ ਹੀ ਕਿਸੇ 'ਤੇ ਉਸਦੇ ਲਾਪਤਾ ਹੋਣ ਦਾ ਦੋਸ਼ ਲਗਾਇਆ ਗਿਆ ਹੈ।"

"ਸਾਡੇ ਵਿਚਾਰ ਸ਼ਿਵਾ ਦੇ ਪਰਿਵਾਰ ਨਾਲ ਹਨ। ਪੁਲਿਸ ਨੂੰ ਦਿੱਤੀ ਗਈ ਕਿਸੇ ਵੀ ਨਵੀਂ ਜਾਣਕਾਰੀ ਦੀ ਪੂਰੀ ਤਰ੍ਹਾਂ ਨਾਲ ਜਾਂਚ ਕੀਤੀ ਜਾਵੇਗੀ, ਪੁਲਿਸ ਨੇ ਐਸ ਬੀ ਐਸ ਪੰਜਾਬੀ ਨੂੰ ਦਿੱਤੇ ਬਿਆਨ ਵਿੱਚ ਕਿਹਾ।"

ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ ਸਾਡਾ ਪੰਜਾਬੀ ਪ੍ਰੋਗਰਾਮ ਐਸਬੀਐਸ ਸਾਊਥ ਏਸ਼ੀਅਨ 'ਤੇ ਸੁਣੋ।

ਸਾਨੂੰ ਫੇਸਬੁੱਕ ਤੇ X 'ਤੇ ਵੀ ਫਾਲੋ ਕਰੋ।