Aso Fa'ava-o-malo mo tagata e iai mana'oga tumau; talanoaga ma Olitta Tuiloma.

O le Aso Tofi Aso 3 Tesema, o le aso ua faatauaina i le lalolagi o le Aso faava-o-malo mo tagata e iai mana'oga faapitoa poo mana'oga tumau, le International Day for People with a Disability.

Olitta Tu'ipine Tito Tuiloma Source: Supplied

O le tina ia Olitta Tu'ipine Tito Tuiloma, o se tama'ita'i Samoa na fanau i Niu Sila ae o loo aumau nei i Melbourne.

Na amata ina ua faato'a 2 tausaga lona matua ona iloa e ona matua se faafitauli i lana va'ai, ma o ia ma ona tuagane e to'a 2 e po le va'ai, pe tauaso.

O se tala'aga e faagae'etia ai le mafaufau le soifuaga o Olitta, ona e ui i lona mana'oga tumau, ae le'i taofia ai lona naunau e su'esu'e ma soifua tuto'atasi - ua fai lona aiga ma lana fanau.

Na ia faaalia le faailoga tagata na feagai ma ia i le taimi e sa'ili ai sana galuega poo se fale mau totogi. Na ia faaalia foi le sauaina o ia e tamaiti i le taimi o la'ititi ma 'upu so'ona lafo e pei ona masani ai nisi o le fanau i tagata e iai mana'oga faapitoa.