'Aua le tu'ulafoa'ia matua e malaga mai na o i latou i va'alele.'

Ua fautuaina e le failautusi o le Komiti o puipuiga i taimi o faalavelave faafuase'i i Samoa, Agafili Shem Leo, le mamalu o Samoa i Niu Sila ma Ausetalia, ina ia sauni se tasi o le aiga e tauto'alua ma matua e toe fo'i atu i Samoa i faigamalaga a va'alele.

Agafili Shem Leo - CEO of Samoa prime minister's department, and State of Emergency committee chairperson. Source: RNZ/Autagavaia Tipi.

I le feiloa'iga ma tusitala i Apia na faailoa ai fo'i e le Faatonu o 'au'aunaga soifua maloloina i Samoa, Leausa Dr Take Naseri, ua tatala i tua le tama matua ma le taule'ale'a seila ia na tausi puipuia i le falema'i.

Na fautuaina ai fo'i e le faatonu o le komiti o puipuiga i taimi o faalavelave faafuase'i Agafili Shem Leo tagata Samoa i atunu'u i fafo, e taofi matua i fafo nei e tausi ai ae o feagai le atunuu ma le laolagi ma puipuiga o le faama'i KOVITI-19.

Ae a le mafai ona ua fia fo'i atu le matua i Samoa, sauni seisi e malaga faatasi atu ma le matua, ona e iai isi mana'oga e pei o se wheelchair, ma e tau mana'omia ai se tagata faigaluega e fesoasoani ae o loo pisi i isi tiute.