Toatele o le a maliliu mai le oge e afua mai i le Coronavirus.

Ua faaalia e le faalapotopotoga a malo aufaatasi e gafa ma mataupu i mea'ai, le World Food Program, o le a matua to'atele tagata i le lalolagi e maliliu ona o se oge e a'afia ai nisi o atunu'u e mafua mai i le pepesi o le COVID19.

Testing for COVID19 in Johannesburg, South Africa. Source: AAP/ AP Photo/Themba Hadebe

O nisi o atunu'u o Aferika ua tele tausaga o feagai ma le mugala ma le oge ona o le naumati o laufanua me leai se mea'ai e maua ai.

Na saunoa le faatonu o le World Food Program, David Beasley, o nisi o atunu'u e pei o South Sudan e leiloa tonu i le taimi nei le aofa'i o tagata ua pesia i le coronavirus ona o le vaivai o 'au'aunaga soifua maloloina ma le le talitonuina o su'esu'ega ma faamaumauga, ae o le a molimauina i lea atunu'u se tulaga pagatia i le oge ma le matelaina o tagata.

O loo masalomia le o'o i le 265 miliona tagata i le lalolagi o le a maliliu mai se oge tele e tula'i mai ona o le COVID19.

O isi atunu'u o loo i se tulaga lamatia i le oge ma le matelaina mai le coronavirus, e aofia ai Afghanistan, Suria, Yemen ma Venezuela.