Faaalia popolega o le Iuni a tagata faigaluega le AWU i le Ag Visa.

Na faaalia le popolega o le failautusi aoao o le Australian Workers' Union, Daniel Walton, i a'afiaga o le polokalame o galuega faavaitaimi mo tagata Pasefika le Pacific Islands Workers' Scheme, pe a taunu'u le faamoemoe o le malo tele i se visa mo galuega vaitaimi le Ag Visa.

Tagata faigaluega vaitaimi mai Samoa. Source: Galumalemana Autagavaia/SBS

I se talanoaga ma le SBS Samoan, na saunoa Daniel Walton o lona mana'o ina ia na o le Pacific Islands Workers Scheme le polokalame mo galuega faavaitaimi i Ausetalia.

"E aoga mo le atina'e o faato'aga i Ausetalia o loo mana'omia tagata faigaluega, ae aoga fo'i mo le atina'e o aiga, nu'u ma atunu'u o le Pasefika."

O le Ag Visa, pe a taunuu ma faatagaina ai tagata faigaluega vaitaimi mai Asia, o le a faateteleina ai faiga saua ma le amiotonu e pei ona tu'ua'ia ai nei nisi o pule o faato'aga ma kamupani i Ausetalia.

I molimau a nisi o tagata faigaluega vaitaimi mai Samoa i se Komisi su'esu'e a le Senate, na ta'ua ai le tulaga le tala feagai o nofoaga o loo nonofo ai, ma le tigaina i galuega ae le fetaui totogi, atoa ai ma le 'ese o aiaiga na sainia i Samoa, ma aiaiga o loo faafaigaluega ai nei i nisi o faato'aga.

(O le talanoaga lenei o loo faia i le gagana Peretania).