Fa'amanino e 'Olo Fonoti Fiti Afoa Va'ai le 'auga o lana tete'e i le faai'uga a le fofoga fetalai e soloia lona tofi faipule.

Ua faaulu e le sui faipule o Salega i Sasa'e, 'Olo Fonoti Fiti 'Afoa Va'ai, sana tagi i le Faamasinoga Maualuga e tete'e ai i le faai'uga a le Fofoga Fetalai o le palemene o Samoa, e soloia lona tofi ona ua avea o ia ma sui o le vaega 'upufai le Faatuatua i le Atua Samoa ua Tasi (FAST).

FAST Political Party fast off the mark. Source: SBS/Galumalemana Autagavaia Tipi.

I se talanoaga ma le SBS Samoan, na faaalia e 'Olo e le amata amana'iaina lona avea ma sui o le FAST se'ia faia palota i le tausaga fou ma amata aloa'ia itumalo palota fou i lalo o teuteuga o le Tulafono o Faigapalota.

O lona uiga, o loo avea pea o ia ma faipule o Salega i Sasa'e se'ia mae'a le paea'iga, ae o le a tauva i palota mo le itumalo palota fou i lalo o le teuteuga o le tulafono, le itumalo palota o Salega Numera 2.

Ona o le taimi nei e le o iai se itumalo palota e faaigoa ia Salega Numera 2, e le aloa'ia ai la ona ta'ua o ia o se faipule o le FAST i Salega i Sasa'e.