Na faaalia e Talipope Kalolo, o se tagata faigaluega fa'avaitaimi mai Samoa o loo galulue ma nisi tagata Samoa i lalo o le polokalame o galuega fa'avaitaimi, le tulaga le talafeagai ma le amiotonu o loo galulue ai i se faato'aga i Vitoria.
Na ia ta'ua i se talanoaga ma le SBS Samoan, na saini le maliega i Samoa e totogi ta'i itula a latou galuega i Ausetalia i le AUD$25 i le itula mo se faato'aga i Queensland.
Peita'i na taunu'u mai ma suia i le pikiina o le strawberry i se faato'aga i Vitoria.
Na o le aso muamua na totogi ai i latou i le totogi itula mai le 6.30am i le tasi i le aoauli, ae o le aso na soso'o ai na faatonuina ai i latou e sainia seisi maliega e totogi piece rate.
O le piece rate, e totogi ai i le aofa'i o pusa e piki e le tagata. Na amata i le $7 i le pusa, ae i le taimi o le talanoaga ma le SBS Samoan, ua pa'u i le $3 i le pusa.
Na ta'ua fo'i e Talipope Kalolo le leai o se fesoasoani mai sui o le malo Samoa i Ausetalia o loo gafa ma le polokalame o galuega faavaitaimi, ae maise i le 10 as na pesia ai i le KOVITI-19 i le tausaga na te'a nei.
