'O lau pule e faatino i lau palota' - Fiame Naomi Mata'afa.

I lana saunoaga 'a'ami i le faatasiga a le vaega 'upufai le Faatuatua i le Atua Samoa ua Tasi (FAST), na fautuaina e le sui faipule o Lotofaga, Fiame Naomi Mata'afa, sui tauva o le FAST ma le 'au tapua'i ina ia fesili muamua i sui faipule o le a tauva i faigapalota i le tausaga fou, pe Ioe pe Tete'e i tulafono e 3 o loo tau fa'aofi e le malo.

Faamanuia faife'au i sui o le FAST ma le Sa'o Faapito, Fiame Naomi Mata'afa. Source: SBS/Galumalemana Autagavaia Tipi.

E pei ona silafia, o tulafono nei o loo aofia ai le tuto'atasi o le Faamasinoga o Fanua ma Suafa, atoa ai ma 'ele'ele o Samoa.

Na saunoa le Sa'o Faapito, a tali mai le sui e Ioe, 'aua e te palota iai. O le auala lena e faatino ai lau pule faatemokarasi, o lou sao i 'upufai mo le lumana'i manuia o Samoa.