O se su'ega pe na gaoi le HRPP?

Na fesiligia e le sui faipule o Anoama'a #1, Alai'asa Sepulona Moananu, le faigamalo a le FAST pe o le sue'ga tusi (audit) fa'apitoa e pei ona faia nei o se auala e sa'ili ai pe na gaoi faigamalo a le HRPP i tausaga ua tuana'i.

Le palemia o Samoa, Fiame Naomi Mata'afa.

Na tali le ta'ita'i o le malo, le palemia, Fiame Naomi Mata'afa, o le autu o le su'ega tusi e le o fa'asino i se su'esu'ega o faigamalo a le HRPP, ae o se ta'iala i le aga'i i luma o fuafuaga mo le atina'e o le tamao'aiga o Samoa.

E le gata i lea, na te'ena e le palemia le lafoga a le sui o Anoama'a #1 na ia fa'apea ai ua fa'atele ona sui faigamalo ae o lea fa'ato'a faia se audit fa'apenei.

Na saunoa le palemia, i le 62 tausaga o le malo tuto'atasi o Samoa, e 40 tausaga o tasi le faigamalo, o le faigamalo a le HRPP.