Ono toe faoa le aia tatau a tama'ita'i i Amerika e faamuta ai ma'itaga (abortions).

Na molimauina i Amerika savali tete'e aga'i i se faai'uga a le faamasinoga sili e ono toe soloia ai le aia tatau a tina ma tama'ita'i e faamutaina ai ma'itaga o tina, poo le faia o abortions.

Protesters march from the Capitol to the United States Federal Courthouse to rally for abortion rights in Austin, Texas, Tuesday, May 3, 2022. Source: Austin American-Statesman

Na molimauina i le vaiaso nei savali tete'e i taulaga tetele o Amerika na auai iai le faitau afe o tagata ona o se pepa o faamatalaga na liki mai le faamasinoga sili, le Supreme Court i Amerika o loo ta'ua ai le ono toe soloia e le faamsinoga sili o se faai'uga o le 1973 lea o loo mafai ai e tamaita'i i Amerika ona faamuta o latou ma'itaga o tina, poo abortions.

O le faai'uga i le 1973 na alia'e mai i le mata'upu Roe vs Wade, ma o le popolega i nisi o tamaita'i na auai i le tete'e, o le toe ta'aia i tua e le faamasinoga o le faai'uga ia Roe vs Wade, o le a toe fo'i ai i se tulaga lamatia le faitau miliona o tamaita'i e le gafatia le tau o se ta'otoga ma toe fananau mai ai auga tupulaga o tamaiti e le mafaia e tina ona tausi ma ola ai i se tulaga mativa.