Susan Ley e ta'ita'ia le Liberal Party.

Ua tofia Susan Ley i le palota a le fa'afaletui a le Liberal Party e avea ma ta'ita'i o le vaega 'upufai ma le itu-agai i le paea'iga lenei a le palemene tele.

Ta'ita'i o le itu-agai ma le Liberal Party, Susan Ley. Source: AAP

E to'alua sui na faia iai le palota, o Susan Ley ma Angus Taylor lea sa umia le tofi teutupe fa'aolioli (Shadow Treasurer) i le paea'iga na te'a nei.

O le manumalo o Susan Ley, ua avea ai o ia ma tama'ita'i muamua ua tula'i mai i le ta'ita'iga o le Liberal Party, ma o loo fesiligia pe na te mafaia ona tosina atu le palota a le itupa o teine ma tama'ita'i i le lagolagoina o lana vaega 'upufai.

Na fa'aalia e Susan Ley, o mata'upu uma ma faiga fa'avae a le Liberals, o le a toe iloiloina mae'ae'a ona o le tulaga o le faia'ina i palota i le amataga o le masina nei.

E aofia ai i fuafuaga nei le fesiligia o le fa'aauau ona tuleia e le Liberal Party o le gaosia o le malosi 'eletise i le niukilia.