Talanoaga ma Va'ai Nah Jnr Folasa i fa'afitauli mai le 'ava malosi le Rover i Samoa.

Ona o le molimauina pea o faalavelave e tutupu mai i taimi e tagofia ai e nisi o tupulaga le 'ava malosi le Rover, ua vala'au ai le faalapotopotoga le Logopuiali'i i le pulega faatonutonu, le regulator, e silasila i auala e taofia ai le tupu mai pea o nei faalavelave e pei ona maumau ai ola o nisi i le atunu'u.

Va'ai Nah Junior Folasa o le Logopuialii. Source: Supplied

Na faaalia e se tasi o le Komiti faafoe o le Logopuiali'i, le Afioga Va'ai Nah Jnr Folasa, e matua faigofie ona maua i nu'u i tua le Rover i fale'oloa. E le gata i lea, o loo faatau i se tau taugofie nai lo isi itu'aiga 'ava malosi.

I le malosi e 40% (alc/vol), o le tama'i fagu Rover e tele ina maua i le ST$13 ($6 Ausetalia) ae matua onana ai tagata e to'a tolu. Na o le $2 Ausetalia ae tau ai i le ua (se'i tulou).

O le tu'ualalo a le Logopuiali'i i le malo, ina ia silasila i le laiseneina o fale'oloa e mafai ona maua ai 'ava malosi i le atunu'u, ma aiaiga e puipuia ai le faatau sa'oloto o le Rover i tupulaga ma fanau a Samoa.