Taofia le tumau gaosiga o le Rover Vodka i Samoa.

Ua taofia le tumau i lalo o se faatonuga a le minisita, le sui palemia o Samoa ma le pulega o 'ava malosi le Liquor Board, le toe faatauina o le sipili le Rover Vodka lea e gaosia i Samoa.

Va'ai Nah Folasa (third from left) ma sui o le Logopuiali'i. Source: Supplied

I se talanoaga ma le faatonu o le faalapotopotoga le Logopuiali'i, le Afioga Va'ai Nah Fretton Folasa, na ia ta'ua ai le tele o a'afiaga o tupulaga Samoa mai lenei 'ava malosi.

E le gata i misa ua i'u ai ina maliliu nisi, ae o le tele o isi faafitauli e pei o ta'avale lavevea, ma tupulaga e faia amioga le taupulea i le taimi e 'onana ai.

O le isi faafitauli i le Rover ma 'ava malosi o loo gaosia i totonu o Samoa, ona o le leai o se puipuiga faatonutonu i auala e faatau ai i nu'u ma alaafaga i tua.