བྷོན་ཌི་མཚོ་ཁར་མེ་ཏོག་དང་མིག་ཆུ། སྟོང་ལྷང་ལྷང་གི་ལྷིང་འཇགས་ཤིག་གིས་སྒྲིབ་འདུག།
ཨོ་སི་ཁྲུ་ལི་ཡ་དང་འཛམ་གླིང་ཡོངས། ལྷག་པར་དུ་ཇིའུ་མི་རིགས་ཀྱི་སྤྱི་ཚོགས་ཁྲོད་དུ་སྤྱི་མཐུན་གྱི་ཅི་ཞིག་བོར་སོང་བའི་སེམས་ཚོར་ཞིག་གིས་ཁེངས།
འདི་དག་ནི་བྷོན་ཌི་ཁང་ཆེན་གྱི་ཕྱི་རོལ་གྱི་མེ་ཏོག་དྲན་རྟེན་སྲུང་བརྩི་ཞུ་ཡུལ་དུ་འདུ་འཛོམས་བྱེད་མཁན་མི་བརྒྱ་ཕྲག་མང་པོའི་ཁྲོད་ནས་འགའ་ཤས་རེད།
དྲན་རྟེན་འདི་ནི་ཟླ་བ་ ༡༢ ཚེས་ ༡༤ ཉིན་འཇིགས་སྐུལ་གྱི་དོན་རྐྱེན་ཞིག་བྱུང་རྗེས་བཙུགས་པ་ཞིག་ཡིན་ཞིང་། དོན་རྐྱེན་དེའི་ནང་མི་ ༡༥ ཙམ་ཧ་ནུ་ཀ་དུས་ཆེན་སྲུང་བརྩི་བྱེད་སྐབས་རྐྱེན་འདས་སུ་སོང་ཡོད།
འདི་ནི་རྐྱེན་ངན་དེ་བྱུང་རྗེས་ཐུན་མོང་གི་མྱ་ངན་གྱི་དཔེ་མཚོན་གཅིག་ཙམ་རེད།
འོན་ཀྱང་། ཐུན་མོང་གི་མྱ་ངན་ཅེས་པ་དེ་གང་ཡིན་ནམ། མི་རྣམས་དེ་བརྒྱུད་ནས་ཇི་ལྟར་བསྐྱོད་ཀྱི་ཡོད།
ཨོ་སི་ཁྲུ་ལི་ཡའི་མྱ་ངན་ཚོགས་པའི་འགན་འཛིན་གཙོ་བོ་ཁི་རི་སི་ཊོ་ཧྥར་ཧོལ་གྱིས་འགྲེལ་བཤད་གནང་དོན།
"
དྲག་སྤྱོད་འདིའི་རྐྱེན་གྱིས་གྱོང་གུན་དང་མྱ་ངན་གྱི་ཚོར་ཤུགས་དྲག་ཤོས་ནི་དམིགས་འབེན་དུ་བཟུང་བའི་ཇིའུ་སྤྱི་ཚོགས་ལ་བྱུང་ཡོད།
སྲིད་བློན་མཆོག་གིས་ལོ་གསར་པའི་ནང་ཇིའུའི་སྤྱི་ཚོགས་ཀྱི་ཆེད་དུ་རྒྱལ་ཡོངས་མྱ་ངན་ཞུ་བའི་ཉིན་མོ་ཞིག་གོ་སྒྲིག་བྱེད་བཞིན་ཡོད་པ་དང་། དྲག་སྤྱོད་བྱས་ཏེ་བདུན་ཕྲག་གཅིག་སོང་བའི་རྗེས་སུ་ཟླ་བ་ ༡༢ ཚེས་ ༢༡ ཉིན་ཨོ་སི་ཁྲུ་ལི་ཡའི་མི་ཚང་མས་འདས་པོ་རྣམས་ལ་གུས་བཀུར་ཞུ་ཆེད་རྒྱལ་ཡོངས་བསམ་གཞིག་ཉིན་མོ་ཞིག་བརྩི་སྲུང་ཞུས་ཡོད།
ཆོས་དཔོན་ཇྷོར་ཇི་མོར་ཌི་ས་ཡི་མཆོག་ནི་ཝུ་ལ་ཧ་ར་ཡི་ཡི་ཨི་མ་ནུལ་སི་ན་གྷོ་གྷུས་ནས་ཡིན།
ཁོང་གིས་ཇིའུའི་སྤྱི་ཚོགས་ནི་གཅིག་གྱུར་མིན་པ་དང་། ཁོང་ཚོས་ཐུན་མོང་དུ་མྱ་ངན་བྱེད་བཞིན་ཡོད་ཀྱང་། མི་རྣམས་ཀྱིས་རང་ཉིད་ཀྱི་མྱ་ངན་མཚོན་ཐབས་སྣ་ཚོགས་བྱེད་བཞིན་ཡོད་ཅེས་གསུངས།
"
རེ་བ་དང་བདེ་འཇགས་ཀྱི་ཚོར་སྣང་ཞིག་བསྐྲུན་པའི་ཕྱིར་གཟའ་མཇུག་དེར་ཆོས་དཔོན་མོར་ཌི་ས་ཡི་ཉན་འཇོག་བྱེད་རེས་ཀྱི་ཚོགས་འདུ་ཞིག་གོ་སྒྲིག་བྱས་ནས། དེར་འཇིའུ་མི་རིགས་དང་གཞན་དག་ཚང་མ་མཉམ་དུ་འཛོམས་ནས་སེམས་ཀྱི་སྡུག་བསྔལ་བཤད་ཆོག་གི་ཡོད།
ཁི་རི་སི་ཊོ་ཧྥར་ཧོལ་གྱིས་ཆོ་ག་ནི་མྱ་ངན་གྱི་གལ་ཆེའི་ཆ་ཤས་ཤིག་ཡིན་པར་བརྗོད་ཡོད། རྒྱུ་མཚན་ནི་དེ་དག་གིས་དམིགས་ཡུལ་དང་འགན་དབང་གི་ཚོར་བ་ཞིག་སྟེར་བས་རེད་ཟེར།
འོན་ཀྱང་ཡིད་སྐྱོ་དགོས་པའི་གནད་དོན་དེའི་རྐྱེན་པས་བྷོན་ཌིའི་ནང་གི་ཇིའུ་མི་རིགས་ཀྱི་སྤྱི་ཚོགས་ཁོ་ན་ཙམ་མིན་པར་ཨོ་སི་ཁྲུ་ལི་ཡ་དང་འཛམ་གླིང་ཡོངས་ཀྱི་ཇིའུ་མི་རིགས་ཀྱི་སྤྱི་ཚོགས་ཚང་མས་བློ་ཕམ་ཤིན་ཏུ་ཆེན་པོ་བྱེད་བཞིན་ཡོད།
ཚེས་ ༡༦ སྟེ་རེས་གཟའ་མིག་དམར་ཉིན་ལོན་ཌོན་དུ་ཚོགས་པའི་ཧ་ནུ་ཁ་དུས་ཆེན་གྱི་གསོལ་སྟོན་ཞིག་བྷོན་ཌི་འཇབ་རྒོལ་གྱི་གནོད་འཚེ་ཕོག་པའི་མི་རྣམས་ལ་སྨོན་ལམ་འདོན་པའི་བྱེད་སྒོ་ཞིག་ཏུ་གྱུར། དེ་བཞིན་ཇི་རུ་ས་ལིམ་དུ་ཚོགས་པའི་དུས་སྟོན་ཞིག་གིས་ཇིའུ་མི་རིགས་ཀྱི་ཚོགས་པ་ཁག་མཉམ་དུ་བསྡུས་ནས་གནོད་འཚེ་ཕོག་པའི་མི་རྣམས་ལ་རྗེས་དྲན་ཞུས།
དགེ་རྒན་ཆེན་མོ་ནི་ཁོལ་སེ་ཌི་ལར་ནི་ཧྥི་ནིག་སི་ཨོ་སི་ཁྲུ་ལི་ཡ་ཞེས་པའི་རྐྱེན་ངན་གྱི་ཤུལ་རྗེས་ཕོག་པའི་སེམས་ཁམས་འཕྲོད་བསྟེན་ལྟེ་གནས་ཀྱི་སྤྱི་ཁྱབ་འགན་འཛིན་ཡིན།
ཁོ་མོས་གནོད་འཚེ་ཕོག་པའི་དོན་རྐྱེན་གྱིས་སྤྱི་ཚོགས་མང་པོའི་ནང་དུ་རིམ་པ་དུ་མའི་མྱ་ངན་བྱེད་སྲིད་པར་བརྗོད་ཡོད།
སློབ་དཔོན་སེ་ཌི་ལར་གྱིས་ཁྱབ་ཆེ་བའི་རྐྱེན་ངན་གྱི་དོན་རྐྱེན་དག་གིས་སྤྱི་ཚོགས་ཀྱི་བདེ་འཇགས་ཀྱི་ཚོར་བ་གཏོར་བརླག་གཏོང་གི་ཡོད་ཅེས་གསུངས་ཡོད།
རྒྱུན་ལྡན་གྱི་ཚོར་བ་སླར་གསོ་བྱ་ཆེད་མི་ཚོས་རེས་གཟའ་ལྷག་པའི་ཞོགས་པ་སྟེ་ཟླ་བ་༡༢ ཚེས་༡༠ ཉིན་དྲན་གསོའི་ཆེད་དུ་ཆུ་རྐྱལ་འགྲན་བསྡུར་ཞིག་ཚུགས་ནས་འདས་པོ་རྣམས་ལ་གུས་འདུད་ཞུས་པ་དང་། ཇིའུ་མི་རིགས་ཀྱི་སྤྱི་ཚོགས་དང་མཉམ་དུ་གདུང་སེམས་མཉམ་སྐྱེད་བྱས་ཡོད།
བྷོན་ཌི་པེན་གུན་ཆུ་རྐྱལ་ཚོགས་པའི་ཁོངས་མི་ཁོར་ཁྲི་ནི་མོ་རན་ནི་བྱེད་སྒོ་དེ་གོ་སྒྲིག་བྱེད་མཁན་གཙོ་བོ་ཞིག་ཡིན།
ཁོ་མོས་ཆུ་རྐྱལ་ཚོགས་པ་རྣམས་ལ་ཇིའུ་མི་རིགས་ཀྱི་སྤྱི་ཚོགས་ལ་གུས་བརྩི་ཞུ་ཆེད་དུ་འགྲན་ཚོགས་དེ་ཚུགས་རྒྱུ་ཡིན་མིན་ཐད་ཐོག་མར་ཐེ་ཚོམ་བྱུང་ཡོད་ཀྱང་། མཐར་གནད་དོན་གང་བྱུང་བ་དེར་ངོས་འཛིན་བྱེད་པ་དང་ཇིའུ་མི་རིགས་ཀྱི་སྤྱི་ཚོགས་ཀྱི་གྱོང་གུན་ལ་ངོས་འཛིན་བྱེད་པའི་གུས་བརྩི་ལྡན་པའི་ཐབས་ལམ་ཞིག་ཏུ་ཐག་གཅོད་བྱུང་ཡོད།
འཇིའུ་ཆོས་ལུགས་སུ་མྱ་ངན་གྱི་དུས་ཡུན་གྱི་ཐོག་མའི་ཉིན་བདུན་གྱི་སྐབས་ལ་ཤི་ཝ་ཞེས་འབོད་ཅིང་། དེའི་ནང་དུ་མྱ་ངན་བྱེད་མཁན་ཚོས་གཤིན་པོ་རྣམས་ལ་དྲན་གསོ་བྱེད་པ་དང་། ཀ་ཌི་ཤ་འདོན་པ། དེ་བཞིན་དུར་ས་ནས་ཕྱིར་ལོག་རྗེས་མྱ་ངན་བྱེད་མཁན་ཚོར་ཟས་བཟོ་བ་སོགས་ཀྱི་ཆོ་ག་མང་པོ་འདུས་ཡོད།
ཆོས་དཔོན་ཡོ་སི་ཧྥ་རི་ཌི་མན་གྱིས་འཇིའུ་ཆོས་ལུགས་ཀྱི་སྲོལ་རྒྱུན་ལྟར་ན། གཤིན་པོ་རྣམས་ལ་གུས་ཞབས་བྱེད་ཆེད་རྡོ་ཞིག་འཇོག་སྲོལ་ཡོད་པ་དང་། འོན་ཀྱང་བྷོན་ཌི་མེ་ཏོག་གི་དྲན་རྟེན་འདིས་ཡེ་ཤུའི་ཆོས་ལུགས་མ་ཡིན་པའི་ཨོ་སི་ཁྲུ་ལི་ཡ་བ་ཚོས་གདུང་སེམས་མཉམ་སྐྱེད་དང་རྒྱབ་སྐྱོར་བྱེད་པའི་བརྡ་ལན་གལ་ཆེན་ཞིག་སྤྲོད་ཀྱི་ཡོད་ཅེས་གསུངས།
ཆོས་དཔོན་མོ་ཌི་ས་ཡིས་གདུང་སེམས་མཉམ་སྐྱེད་དེ་ཆབ་སྲིད་ཀྱི་ངོ་བོར་མི་འགྱུར་ཡས་གལ་ཆེན་ཡིན་པར་གསུངས་ཡོད།
ཁོང་གིས་ཆོ་ག་གང་འདྲ་ཞིག་ཡིན་རུང་ཨོ་སི་ཁྲུ་ལི་ཡའི་མི་ཚང་མས་གྲོས་མོལ་དང་། ཉན་འཇོག་མྱ་ངན་སོགས་མཉམ་དུ་ཞུ་ཐུབ་པའི་རེ་བ་བྱེད་ཀྱི་ཡོད་ཅེས་གསུངས།
