རང་གི་ཕྲུ་གུའི་བརྟེན་ས་གཅིག་པུ་དེ་ཡིན་པའི་ཧྤ་ར་ཨི་རཱན་ནས་བྲོས་བྱོལ་དུ་ཡོང་ནས་ཨོ་སི་ཁྲུ་ལི་ཡར་འབྱོར་སྐབས་མོས་ངེས་པར་བསྒྲུབ་དགོས་བསམ་པ་ནི་མོ་རང་དཔལ་འབྱོར་ཐོག་རང་མགོ་ཐོན་ཐུབ་པ་བྱེད་རྒྱུ་དེ་རེད།
ལོ་ངོ་བཅུ་ལྷག་གི་རྗེས་སུ། མོ་རང་གཞོན་དུས་ཏེ་ཧི་རཱན་དུ་སྦྱངས་པའི་འཚེམ་བཟོའི་ལག་རྩལ་དེས་མེལ་བྷོན་དུ་འཚེམ་བཟོ་སློབ་ཁྲིད་བྱེད་མཁན་ཞིག་ཏུ་གྱུར་བར་ཕན་ཐོགས་ཡོད་པ་མ་ཟད། གྲོང་ཁྱེར་འདིའི་མཚོན་རྟགས་ལྟ་བུའི་གློག་འཁོར་གྱི་རྐུབ་སྟེགས་ལ་ཡང་གསོན་ཤུགས་འཕར་མ་ཞིག་སྤྲད་ཡོད།
སྤྱི་ཚོགས་ཞབས་ཞུ་བ་ཞིག་གིས་ཧྤ་ར་སི་སི་ཊར་ཝོག་སི་ལ་ངོ་སྤྲོད་བྱས་པ་དང་། དེར་ཨིན་ཇིའི་སྐད་ཡིག་དང་གློག་ཀླད་ཀྱི་སྦྱོང་བརྡར། སྤྱི་ཚོགས་ཀྱི་ལག་རྩལ་སྦྱོང་བརྡར་སྣ་ཚོགས་ཚར་རྗེས། མོ་རང་བུད་མེད་ ༡༥ གཞན་དང་མཉམ་དུ་ལས་ཀ་བྱེད་བཞིན་ཡོད།
སི་སི་ཊར་ཝོག་སི་ནི་མེལ་བྷོན་དུ་གནས་པའི་ཁེ་མེད་སྤྱི་ཚོགས་ཞབས་ཞུ་ཚོགས་པ་ཞིག་ཡིན་པ་དང་། སྐྱབས་བཅོལ་བ་དང་། སྐྱབས་བཅོལ་ཞུ་མཁན། ཡང་ན་གནས་སྤོ་བྱས་པའི་བུད་མེད་ཚོར་དཔལ་འབྱོར་ཐོག་རང་བརྟེན་ཐུབ་པ་བྱེད་པར་རྒྱབ་སྐྱོར་བྱེད་ཀྱི་ཡོད།
སི་སི་ཊར་ཝོག་སི་ཡི་འགན་འཛིན་ཨའེ་ཕི་རིན་ཕི་ཊོག་གིས་བུད་མེད་མང་ཆེ་བར་མཚོན་ན། ལས་ཀ་འདི་ནི་ཨོ་སི་ཁྲུ་ལི་ཡ་ཡི་ལས་རིགས་སྣ་ཚོགས་ནང་ཞུགས་རྒྱུའི་གོམ་པ་དང་པོ་དེ་ཡིན་ཞེས་བརྗོད་ཡོད།
མེལ་བྷོན་དུ་གློག་འཁོར་གྱི་རྐུབ་སྟེགས་བརྒྱ་ཆ་ ༨༠ ཙམ་ནི་ད་ལྟ་སྐྱབས་བཅོལ་བ་དང་། སྐྱབས་བཅོལ་ཞུ་མཁན། ཡང་ན་གནས་སྤོ་བྱས་པའི་རྒྱབ་ལྗོངས་ཡོད་པའི་བུད་མེད་ཚོས་བསྐྱར་བཟོ་བྱེད་བཞིན་ཡོད།
ད་ལྟ་སི་སི་ཊར་ཝོག་སི་ཡིས་ཟླ་རེར་རྐུབ་སྟེགས་ ༧༠ ཙམ་བསྐྱར་བཟོ་བྱེད་ཀྱི་ཡོད་པ་དང་། དེས་ལོ་གཅིག་གི་ནང་དུ་ལས་ཀའི་དུས་ཚོད་ ༡༥༠༠ ལྷག་བསྐྲུན་པ་མ་ཟད། གད་སྙིགས་ ༡༢༠༠ ལྷག་གད་སྙིགས་སྡེབ་སྦད་བྱེད་ས་ནས་བཏོན་ཐུབ་ཡོད།
ཡ་རཱ་གློག་འཁོར་གྱི་སྤྱི་ཚོགས་མཁོ་སྒྲུབ་འགན་འཛིན་ཧྤ་རན་སི་སི་ཁ་མེག་ལི་ཡན་གྱིས་མཉམ་ལས་འདི་ནི་འགྱུར་བ་ཆུང་ཆུང་ཞིག་ཡིན་ཡང་། དེ་ནི་གཞུང་གི་ཚོགས་པ་ཞིག་གིས་རང་གི་ལྟེ་བའི་ཞབས་ཞུ་ལས་ལྷག་པའི་འགྱུར་བ་ཆེན་བའི་ཞབས་ཞུ་སྒྲུབ་ཐུབ་ཀྱི་ཡོད་པ་སྟོན་ཐུབ་ཅེས་བརྗོད་ཡོད།
ཁོ་མོས་བརྗོད་པ་ལྟར་ན། འདི་ནི་མེལ་བྷོན་གྱི་མི་རིགས་མང་པོ་འདུས་པའི་སྤྱི་ཚོགས་ནང་དུ་སྔོན་ནས་ཡོད་པའི་ལག་རྩལ་ལ་ངོས་འཛིན་བྱེད་པ་དང་། ཁོ་ཚོར་དར་རྒྱས་ཡོང་བའི་གོ་སྐབས་སྤྲོད་པའི་ཐབས་ལམ་ཞིག་ཡིན།
མེལ་བྷོན་དུ་མི་ས་ཡ་གསུམ་ཙམ་གྱིས་བདུན་ཕྲག་རེར་གློག་འཁོར་བེད་སྤྱོད་བྱེད་ཀྱི་ཡོད།
རྐུབ་སྟེགས་ཤིག་ལ་གནོད་སྐྱོན་བྱུང་ཚེ། དེ་ཕྱིར་འདོན་པ་དང་ཞིབ་བཤེར་བྱས་ནས་བསྐྱར་དུ་བཟོ་དགོས་པའི་རིགས་དེ་སི་སི་ཊར་ཝོག་སི་ལ་གཏོང་གི་ཡོད།
སི་སི་ཊར་ཝོག་སི་ཡིས་རྐུབ་སྟེགས་དེ་དག་སྡོད་བདེ་པོ་ཡོང་རྒྱུར་ཟབ་ནན་ཆེན་པོ་བྱེད་ཀྱི་ཡོད།
ཧྤ་ར་དང་ཁོ་མོའི་ལྷན་དུ་ལས་ཀ་བྱེད་བཞིན་པའི་བུད་མེད་མང་པོ་ཞིག་ལ་མཚོན་ན། ཁབ་རེ་རེ་བཙུགས་པ་དེས་དཔལ་འབྱོར་ས་བརྟན་ཡོང་བར་གོམ་པ་རེ་རེ་སྤོས་པ་དང་། ད་ལྟ་ཁྱིམ་དུ་འབོད་པའི་གྲོང་ཁྱེར་འདིའི་ནང་དུ་མཉམ་ཞུགས་བྱེད་པའི་ཐབས་ལམ་ཞིག་ཀྱང་རེད།
