བསྡུས་དོན།
- ཉེ་བའི་ལོ་ཤས་རིང་ཨོ་སི་ཊེ་ལི་ཡའི་དབུས་ཉེན་རྟོག་ལས་ཁུངས་ལ་ཆབ་སྲིད་པ་ཚོར་བྱུང་བའི་ཉེན་ཁ་སྙན་སེང་ཞུས་པ་འབོར་ཆེན་བྱུང་ཡོད་པ་རེད།
- ཨོ་སི་ཊེ་ལི་ཡའི་ཆབ་སྲིད་ཀྱི་འགོ་ཁྲིད་ཚོས་བདུན་ཕྲག་འདིའི་ནང་སྲིད་བློན་གྱི་གཟིམ་ཁང་ལ་འཇིགས་སྐུལ་བྱུང་རྗེས་ཞི་འཇམ་དང་ལྷོད་བབས་དགོས་པའི་རེ་སྐུལ་བྱས་ཡོད།
གཟའ་མིག་དམར་གྱི་དགོང་མོར། སྲིད་བློན་གྱི་གཟིམ་ཤག་གི་ཉེ་འཁོར་དུ་འབར་རྫས་བཞག་ཡོད་པའི་དཀྲོག་གཏམ་ཞིག་བྱུང་རྗེས། ཆུ་ཚོད་འགའ་ཤས་རིང་ཁོང་གནས་གཞན་ཞིག་ཏུ་གནས་སྤོས་བྱས་པ་དང་། དེའི་རིང་རྒྱལ་ཡོངས་ཉེན་རྟོག་པས་ཁོང་གི་ཁྱིམ་ལ་བསྔོག་བཤེར་བྱས་ཏེ་ཞིབ་འཇུག་བྱས་ཡོད། འཇིགས་སྐུལ་གྱི་ཉེན་བརྡ་དེ་ཨེ་སི་བྷི་ཨེ་སི་གསར་ཁང་གིས་མཐོང་ཡོད་པ་ལྟར་། དེའི་ནང་དུ་འབྱུང་འགྱུར་ཨོ་སི་ཊེ་ལི་ཡའི་ནང་ཧྲན་ཡུན་ཞབས་བྲོ་ཚོགས་པའི་འཁྲབ་སྟོན་བྱེད་དུ་བཅུག་པ་ཡིན་ན། གཞིས་ཀ་དེ་"རྩ་མེད་དུ་གཏོང་རྒྱུ་ཡིན་"ཞེས་དང་། "ཁྲག་རྒྱུག་ཆུ་བཞིན་གཏོར་རྒྱུ་ཡིན་"ཞེས་བརྗོད་ཡོད།
ཚོགས་པ་འདི་ནི་ཆོས་ལུགས་ཀྱི་ལས་འགུལ་ཕ་ལུན་གུང་དང་འབྲེལ་བ་ཡོད་པ་དང་། དེས་རྒྱ་ནག་གི་སྲིད་གཞུང་ལ་སྐྱོན་བརྗོད་བྱེད་ཀྱི་ཡོད་པ་མ་ཟད། ཕྱི་ལོ་ ༡༩༩༩ ལོ་ནས་བཟུང་རྒྱ་ནག་ནང་ཁྲིམས་འགལ་དུ་བརྩི་བཞིན་ཡོད།
ཨོ་སི་ཊེ་རེ་ལི་ཡའི་དབུས་ཉེན་རྟོག་ལས་ཁུངས་ཀྱིས་དོགས་གཞི་ཅན་གྱི་དངོས་པོ་གང་ཡང་མ་རྙེད་ཀྱང་། དོན་རྐྱེན་འདིས་ཨོ་སི་ཊེ་ལི་ཡའི་ཆབ་སྲིད་ཁྱབ་ཁོངས་ཡོངས་སུ་ཞེ་འཁོན་གྱི་རྣམ་པ་ཤུགས་ཆེ་རུ་འགྲོ་བཞིན་པའི་བློ་འཚབ་བྱིན་ཡོད།
ཨལ་བྷ་ནི་སི་མཆོག་གི་བརྗོད་དོན་ལྟར་ན། དོན་རྐྱེན་འདི་ནི་མི་དམངས་ལ་གོ་སྐབས་ཡོད་ཚད་ལ་ཞེ་སྡང་ཆུང་དུ་གཏོང་དགོས་པའི་སྐུལ་མ་བྱེད་རྒྱུར་དྲན་གསོ་བྱེད་ཀྱི་ཡོད།
དོན་རྐྱེན་འདིར་ཆབ་སྲིད་ཀྱི་ལྟ་བ་མི་འདྲ་བ་ཚང་མའི་ཁྲོད་ནས་སྐྱོན་བརྗོད་ཕོག་པ་དང་། ཚང་མས་དྲག་སྤྱོད་ཀྱི་ཁོར་ཡུག་ལྷིང་འཇགས་སུ་གཏོང་དགོས་པ་དང་། ཆབ་སྲིད་ཀྱི་མི་མཐུན་པའི་ཆ་རྣམས་ཞི་འཇམ་ངང་སེལ་བཟོ་དགོས་པའི་འབོད་སྐུལ་ཡང་གནང་ཡོད།
ཕྱོགས་འགལ་ཚོགས་པའི་འགོ་ཁྲིད་ཨང་གྷ་སི་ཊེ་ལར་གྱིས་གྲོས་ཚོགས་འཐུས་མི་གང་ཞིག་ལའང་འཇིགས་སྐུལ་བྱེད་པ་དེ་ངོས་ལེན་བྱེད་ཐབས་མེད་པ་ཞིག་ཡིན་པ་དང་། བགྲོ་གླེང་བརྒྱུད་ནས་མི་མཐུན་པ་སེལ་རྒྱུ་དེ་ཨོ་སི་ཊེ་ལི་ཡའི་གཞི་བརྟེན་དུ་གྱུར་ཡོད་ཅེས་བརྗོད།
འཇིགས་སྐུལ་གྱི་ཉེན་ཁ་ཆེ་རུ་ཕྱིན་པའི་ཁོར་ཡུག
ཕྱི་ལོ་ ༢༠༢༤-༢༥ ལོའི་དངུལ་རྩིས་ནང་དབུས་ཉེན་རྟོག་ལས་ཁུངས་སུ་དབུས་གྲོས་ཚོགས་ཀྱི་འཐུས་མི་རྣམས་ལ་འཇིགས་སྐུལ་དང་། བརྙས་བཅོས། བསུན་གཙེར། དམའ་འབེབས་བཅས་ཀྱི་འཕྲིན་ཡིག་ ༩༥༡ འབྱོར་ཡོད། ལོ་བཞིའི་ནང་གནད་དོན་དེའི་རིགས་ཀྱི་གྲངས་འབོར་བརྒྱ་ཆ་ ༦༣ འཕར་ཡོད།
ཟླ་བ་འདིའི་སྟོད་དུ་གྲོས་ཚོགས་ཀྱི་ཚོད་དཔག་ཚོགས་འདུའི་སྐབས་སུ་དམག་དཔོན་ཀི་རི་སི་བྷ་རེཊ་krrissy Barrettཡིས་གསུངས་པ་ལྟར་ན། ཟླ་བ་དགུ་པའི་ནང་དབུས་ཉེན་རྟོག་ལས་ཁུངས་ཀྱིས་རྒྱལ་ཁབ་བདེ་འཇགས་ཀྱི་ཞིབ་འཇུག་རུ་ཁག་གསར་པ་བཙུགས་པ་ནས་བཟུང་མི་ ༢༡ ལ་ཉེས་འཛུགས་བྱས་ཡོད་པ་དང་། དེའི་ཁྲོད་ནས་མང་ཆེ་བ་ནི་དབང་འཛིན་པ་དང་ཇིའུ་སྤྱི་ཚོགས་ལ་འཇིགས་སྐུལ་བྱས་པ་དང་འབྲེལ་བ་ཡོད།
ཁོ་མོས་"ང་ཚོས་མཐོང་བཞིན་པ་ནི་མི་སྒེར་གྱི་འཁོན་འཛིན་མུ་མཐུད་ནས་འཕེལ་བཞིན་པ་དེ་ཡིན་ལ། དེའི་ནང་དུ་དྲྭ་ཐོག་ཏུ་འཇིགས་སྐུལ་བྱེད་འདོད་པ་དང་དེ་དོན་དངོས་སུ་ལག་བསྟར་བྱེད་མཁན་ཚུད་ཡོད།" ཅེས་བརྗོད་འདུག།
ཌི་ཀིན་སློབ་ཆེན་གྱི་ཆབ་སྲིད་རིག་པའི་སློབ་དཔོན་ཆེན་མོ་ཡིན་པའི་ཆབ་སྲིད་སྤྱི་ཚོགས་རིག་པ་བ་ཇོཤ་ རུ་སི་(Josh Roose)ཡིས་བརྗོད་པར་གཞིགས་ན། སྙན་སེང་ཞུས་པའི་དོན་རྐྱེན་དེ་དག་ནི་ "འཁྱག་རོམ་གྱི་རྩེ་མོ།" ཙམ་ཡིན་པའི་ཚོད་དཔག་བྱེད་ཀྱི་ཡོད་ལ། ལྷག་པར་དྲྭ་ཐོག་གི་གླེང་མོལ་ལ་དེ་བས་མང་བ་ཡོད་པའི་དོགས་པ་བྱེད་ཀྱི་ཡོད།
ཁོང་གིས་"འདིར་ཉེན་ཁ་ངོ་མ་ནི་ཆབ་སྲིད་པ་ཚོར་དྲ་ཐོག་ཏུ་ཞེ་སྡང་བསྟན་པ་དེ་ཙམ་མ་ཡིན་པར། དེ་དག་བྱ་སྤྱོད་དུ་འགྱུར་བའི་མཚམས་ལ་སླེབས་པ་དེ་རེད།" ཅེས་ཨེ་སི་བྷི་ཨེ་སི་གསར་ཁང་ལ་བརྗོད་འདུག།
ཉེ་བའི་ལོ་ཤས་ནང་ཆབ་སྲིད་ཀྱི་སྤྱི་ཚོགས་ཁྱོན་ཡོངས་སུ་དམིགས་འབེན་བཟུང་བ་དང་དོན་རྐྱེན་བྱུང་བ་དེ་དག་ "ཧ་ཅང་སེམས་འཚབ་སྐྱེ་དགོས་པ་" ཡིན་སྐོར་བརྗོད་འདུག། དེའི་ནང་དུ་འཐུས་མིའི་ལས་ཁུངས་ཁག་ཀྱང་ཚུད་ཡོད།
སྤྱི་ཟླ་བརྒྱད་པའི་གྲོས་ཚོགས་ཀྱི་ལས་ཁུངས་ཁག་གི་ཐོན་ཁུངས་བསྐྱར་ཞིབ་ལྷན་ཚོགས་ཀྱིས་སྙན་ཐོ་ཞིག་གི་ནང་འཐུས་མིའི་ལས་ཁུངས་ཁག་ལ་ཉེན་ཁ་ཆེ་ཤོས་ཡོད་པའི་བསམ་ཚུལ་བསྟུད་མར་འབྱོར་ཡོད་པར་བཤད།
སྙན་ཐོ་དེས་རྒྱལ་ཡོངས་སུ་གྲོས་ཚོགས་འཐུས་མིའི་ལས་ཁུངས་ཁག་ལ་སྡིགས་ར་དང་། བརྙས་གཙེར། སྐབས་རེ་དྲག་རྩུབ་བཅས་ཀྱི་འོག་ས་གནས་ཀྱི་འོས་ཁོངས་ཀྱི་མི་སེར་དང་འབྲེལ་འདྲིས་མང་པོ་བྱེད་དགོས་ཀྱི་ཡོད་པ་བསྟན་ཡོད། འདྲི་རྩད་བྱས་པའི་གྲོས་ཚོགས་འཐུས་མི་དང་ལས་བྱེད་བརྒྱ་ཆ་བརྒྱད་ཅུ་ལྔ་ཡིས་འདི་རིགས་ཀྱི་སྤྱོད་ཚུལ་དང་འཕྲད་མྱོང་ཡོད་པར་བརྗོད། ཨལ་བྷ་ནི་སེ་ཡི་མཆོག་ཉེན་གཡོལ་དུ་ཕེབས་དགོས་པ་དེ་ཉེ་ཆར་བྱུང་བའི་དབུས་གཞུང་གི་གྲོས་ཚོགས་འཐུས་མི་དང་འབྲེལ་བའི་དོན་རྐྱེན་མང་པོའི་ནང་གི་གཅིག་ཡིན། ཟླ་སྔོན་མར་སི་ཌི་ནི་ནས་མི་ཞིག་གིས་བྷོན་ཌི་མཚོ་ཁ་རུ་འཇིགས་སྐུལ་གྱི་དོན་རྐྱེན་བྱུང་བའི་ཉིན་རྗེས་མ་དེར་སྲིད་བློན་ལས་ཁུངས་སུ་སྡིགས་རའི་ཁ་པར་བཏང་བའི་ཉེས་མིང་འོག་ཁྲིམས་ཁང་དུ་བཅར་དགོས་བྱུང་ཡོད།
ཟླ་བ་བཅུ་གཉིས་པར། སྐྱེས་པ་ཞིག་གིས་དྲྭ་རྒྱའི་ཐོག་འབྲེལ་མཐུད་བློན་ཆེན་ཨ་ནི་ཀ་ཝེལ་སི་ (Anika Wels) བསད་རྒྱུའི་འཇིགས་སྐུལ་བྱས་པའི་ཉེས་མིང་འོག་འཛིན་བཟུང་བྱས་ཡོད།
ཟླ་བ་བཅུ་གཅིག་པར། རང་དབང་ཅན་གྱི་གྲོས་ཚོགས་འཐུས་མི་ཨ་ལེ་གྷར་སི་པེན་ཌར་(Allegra Spender)དང་། ནིའུ་སའོ་ཐ་ཝེལ་སི་མངའ་སྡེའི་ཕྱོགས་འགལ་ཚོགས་པའི་འགོ་ཁྲིད་ཁེ་ལི་སི་ལོའོ་ནེ་(Kellie Sloane)གཉིས་ཀས་ཉེན་རྟོག་པར་གྲོས་ཚོགས་ཁང་གི་ཕྱི་རོལ་དུ་བྱུང་བའི་ནཱ་ཛི་རིང་ལུགས་གསར་མའི་ལས་འགུལ་ལ་སྐྱོན་བརྗོད་བྱས་རྗེས་དྲག་པོའི་འཇིགས་སྐུལ་བྱུང་བའི་ཞུ་སྙན་ཕུལ་ཡོད།
ནཱ་ཛི་རིང་ལུགས་གསར་མ་བ་ཇོ་ཨེལ་ཌ་ཝིས་(Joel Davis)ནི་རྒྱལ་ཡོངས་སྤྱི་ཚིགས་རིང་ལུགས་འབྲེལ་ཐག་ཚོགས་པའི་མི་ཡིན་པ་དང་། ད་ལྟ་ཚོགས་པ་དེ་ཁ་འཐོར་དུ་སོང་ཟིན་པར་བརྗོད་ཀྱི་ཡོད། ཌ་ཝིས་ཀྱིས་ཊེ་ལེ་གྷ་རམ་བེད་སྤྱོད་བྱས་ནས་སི་པེན་ཌར་ལ་ "ཚིག་ཐོག་བཙན་གཡེམ་" བྱ་དགོས་པར་ཚོགས་མི་རྣམས་ལ་བརྒྱུད་སྐུལ་བྱས་རྗེས་འཛིན་བཟུང་བྱས་ཡོད།
ཌ་ཝིས་ལ་གཏའ་དངུལ་གྱིས་ཉེས་གཡོལ་བྱེད་རྒྱུའི་ཐོབ་ཐང་བཅད་ཡོད། ཁོ་པའི་ཁྲིམས་རྩོད་པས་ཁོས་སི་པེན་ཌར་གྱི་ལུས་ལ་གནོད་འཚེ་གཏོང་དགོས་པར་སྐུལ་མ་བཏང་མེད། "བཙན་གཡེམ་ཞེས་པ་ཐ་སྙད་ཀྱི་ནུས་པའི་ཐོག་ནས་གོ་བ་ལེན་རྒྱུར་ཚིག་གི་བཀོལ་སྤྱོད་བྱས་པ་ཙམ་ཡིན་པར་བརྗོད་ཡོད།
ཉེན་ཚབ་ཀྱི་གློག་དམར་འཁྱུག་བཞིན་པ།
ཨོ་སི་ཊེ་ལི་ཡའི་རྒྱལ་ཁབ་བདེ་འཇགས་ལས་ཁུངས་ཀྱིས་ཕྱི་ལོ་ ༢༠༢༥ ལོའི་ལོ་འཁོར་གྱི་ཉེན་ཁའི་དཔྱད་ཞིབ་ནང་དུ། ཆབ་སྲིད་ཀྱིས་སྐུལ་བའི་དྲག་པོའི་བྱ་སྤྱོད་དེ་ཨོ་སི་ཊེ་ཡའི་ནང་དུ་རྒྱུན་ལྡན་དུ་གྱུར་ཡོད་པ་གསལ་བཏོན་བྱས་ཡོད། དེའི་ནང་དུ་ངོ་རྒོལ་དྲག་པོའམ་འཐུས་མི་ལས་ཁུངས་ལ་གཏོར་བཤིག་གཏོང་བ་སོགས་ཆབ་སྲིད་ཀྱི་དམིགས་ཡུལ་ཞིག་སྒྲུབ་ཆེད་དུ་དྲག་པོའི་བྱ་སྤྱོད་དམ་འཇིགས་སྐུལ་གྱི་བྱ་སྤྱོད་ཁག་ཚུད་ཡོད།
སྐབས་དེར་ཨོ་སི་ཊེ་ལི་ཡའི་རྒྱལ་ཁབ་བདེ་འཇགས་ལས་ཁུངས་ཀྱི་འགན་འཛིན་མ་ཡིག་བྷར་གྷེ་སི (Mike Burgess) ཡིས་མ་འོངས་པའི་ལོ་ལྔའི་ནང་དུ་འགྱུར་འགྲོས་འདི་མུ་མཐུད་དུ་གནས་རྒྱུ་ཡིན་པའི་སྔོན་དཔག་བྱས་ཤིང་། བདེ་འཇགས་ཐད་ཉེན་ཚབ་ཀྱི་གློག་དམར་འཁྱུག་བཞིན་པ་'རེད་བརྗོད་ཡོད།
སྤྱི་ཚོགས་ཀྱི་མཐུན་སྒྲིལ་དང་སྒྲིག་འཛུགས་ཁག་ལ་ཡིད་ཆེས་ཉམས་རྒུད་དུ་འགྲོ་བཞིན་པའི་སྐབས་འདིར་ཆབ་སྲིད་ཀྱི་དྲག་པོའི་བྱ་སྤྱོད་ཐད་ཀྱི་སེམས་ཁྲལ་དེ་ནི་ཨོ་སི་ཊེ་རི་ཡའི་བདེ་འཇགས་ཀྱི་ཁོར་ཡུག་ནང་སྤྱི་ཡོངས་ཀྱི་ཉམས་ཞན་དུ་འགྲོ་བའི་ཆ་ཞིག་ཡིན་པར་བརྗོད་ཡོད།
དེ་བཞིན་ཁོང་གིས་ཨུ་རུ་སུ་དང་ཡུ་ཀེ་རེན་བར་གྱི་དམག་འཁྲུག་རྒྱུན་རིང་པོ་དང་། འཛམ་གླིང་ཡོངས་ཁྱབ་ཀྱི་ནད་ཡམས། དེ་བཞིན་གྷ་ཛར་ཨི་སི་རལ་གྱིས་དམག་བརྒྱབ་པ་དེས་དཀྱིལ་ཤར་ས་ཁུལ་དུ་གཞན་གྱི་འཁྲུག་རྩོད་དང་རྙོག་ཟིང་སློང་བཞིན་པ་སོགས་ཀྱི་རྐྱེན་པས་ནོར་འཁྲུལ་དང་འཁྱོག་བརྗོད་ཅན་གྱི་གནས་ཚུལ་ཁྱབ་སྤེལ་འགྲོ་བཞིན་པར་ཡང་མཛུབ་མོ་བཙུགས་ཡོད།"
རུ་སི་ཡིས་བཤད་པ་ལྟར་ན། རྟོག་དབྱིབས་རིམས་ནད་ཀྱིས་མི་མང་རྣམས་སེམས་ཤུགས་ཆག་པ་དང་གཞུང་ལ་ཁོང་ཚོས་འཕྲད་བཞིན་པའི་དཀའ་ངལ་དང་དེའི་ཐད་ལན་འདེབས་ཀྱི་སྲིད་བྱུས་ལ་ཁག་དཀྲི་བྱེད་རྒྱུའི་གནས་སྟངས་ཤིག་བསྐྲུན་ཡོད་པ་དེས། འདིས་སྐྱོ་ངལ་གྱི་གཏམ་རྒྱུད་སྣ་ཚོགས་དྲྭ་ཐོག་ཏུ་ཁྱབ་སྤེལ་བྱུང་ཡོད།
"ང་ཚོས་མཐོང་བ་ནི་ལྐོག་ཇུས་རིང་ལུགས་ཀྱི་ཤུགས་རྐྱེན་དང་བསམ་བློ་བ་སྣ་ཚོགས་མང་དུ་ཕྱིན་པ་ཙམ་མ་ཡིན་པར། དེ་དག་རྒྱུགས་ཆེན་པོར་གྱུར་བ་དེ་ཡིན།" ཅེས་ཁོང་གིས་བཤད་ཡོད།
"འཛམ་གླིང་རྒྱང་གྱེས་ཆེ་རུ་ཕྱིན་ཡོད།"
ཉེ་ཆར་རྒྱལ་སྤྱིའི་གྲོས་ཚོགས་མཐུན་ཚོགས་ཀྱིས་ཨར་ཇེན་ཊེ་ན། བྷེ་ནིན། ཨི་ཊ་ལི། མ་ལེ་ཤི་ཡ། ཧོ་ལན་ཌི་བཅས་ཀྱི་གྲོས་ཚོགས་འཐུས་མི་རྣམས་ལ་བསམ་འཆར་བསྡུ་ལེན་བྱས་པའི་སྙན་ཐོ་ཞིག་ལྟར་ན། དྲ་ཐོག་དང་དངོས་ཐོག་གཉིས་ཀ་ནས་ཆབ་སྲིད་པ་རྣམས་ལ་འཇིགས་སྐུལ་བྱེད་པ་ནི་འཛམ་གླིང་ཡོངས་སུ་ཁྱབ་གདལ་དུ་གྱུར་ཡོད།
"གྲོས་ཚོགས་འཐུས་མི་མང་པོས་འཇིགས་སྐུལ་ལ་བརྟེན་ནས་རང་གི་བྱ་སྤྱོད་ལ་འགྱུར་བ་གཏོང་བཞིན་ཡོད་པ་དང་། ལ་ལས་དེ་འདྲའི་བརྙས་གཙེར་མྱོང་རྒྱུ་ནི་ཆབ་སྲིད་ཀྱི་འཚོ་བའི་ཁྱད་ཆོས་ཤིག་ཏུ་ངོས་འཛིན་བྱེད་ཀྱི་ཡོད།" ཅེས་སྙན་ཐོའི་ནང་དུ་འཁོད་ཡོད།
"འཇིགས་སྐུལ་རྒྱུན་ལྡན་དུ་བསྒྱུར་བ་འདིས་དམངས་གཙོའི་བགྲོ་གླེང་ལ་ཚད་བཀག་བཟོ་བ་དང་། མཉམ་ཞུགས་བྱེད་མཁན་རྣམས་འགོག་པ། འཐུས་མིའི་ལས་ཁུངས་ཉམས་རྒུད་དུ་གཏོང་བའི་ཉེན་ཁ་ཡོད།"
ལི་ཛ་ཝལ་ཌེཀ་(Lise Waldek) ནི་མེག་ཁོ་གཙུག་ལག་སློབ་ཆེན་དུ་འཇིགས་སྐུལ་དང་དྲག་སྤྱོད་རིང་ལུགས་ཞིབ་འཇུག་གི་མཐོ་རིམ་སློབ་དཔོན་ཞིག་ཡིན།
ཁོ་མོས་" ང་ཚོ་རྒྱང་གྱེས་ཧ་ཅང་ཆེ་རུ་འགྲོ་བཞིན་པའི་འཛམ་གླིང་སྤྱི་དང་། དེ་བས་རྒྱང་གྱེས་ཆེ་རུ་འགྲོ་བཞིན་པའི་ཨོ་སི་ཊེ་ལི་ཡའི་ཁོར་ཡུག་ནང་གནས་ཡོད་པ་གསལ་པོ་རེད།" ཅེས་ཨེ་སི་བྷི་ཨེ་སི་གསར་ཁང་ལ་བརྗོད་བྱུང་།
"ང་ཚོའི་འབྲེལ་ལམ་ནི་ཧ་ཅང་མི་མཐུན་པ་ཆགས་ཡོད། དེ་ནི་ང་ཚོའི་དྲ་ཐོག་གི་ཁོར་ཡུག་དང་འབྲེལ་བ་ཡོད་པ་ཞིག་རེད།"
ཁོང་གིས་"ཆབ་སྲིད་པ་ཚོར་འཇིགས་སྐུལ་བྱེད་པ་དེ་སྤྱི་ཚོགས་ནང་གི་དྲག་སྤྱོད་དང་ཆབ་སྲིད་ཀྱི་ཁེ་ཕན་ཆེད་དྲག་སྤྱོད་བེད་སྤྱོད་བྱེད་ཆོག་མིན་དང་འབྲེལ་བའི་གནད་དོན་ཞིག་ཡིན་པར་བརྗོད།
ཕྱི་ལོ་ ༢༠༢༥ ལོའི་མཱ་ཀི་ནོན་དཀར་ཆག་ཅེས་པའི་མང་གཙོ་ཚགས་ཚུད་ཡོད་མེད་ཀྱི་ལོ་འཁོར་ཚད་གཞི་ཞིག་གི་བརྒྱུད་ཨོ་སི་ཊེ་ལི་ཡའི་ནང་བརྟག་དཔྱད་བྱས་པའི་མི་མང་བརྒྱ་ཆ་དགུ་ཙམ་གྱིས་རང་ཉིད་ཀྱིས་དོ་ཁུར་བྱེད་པའི་གནད་དོན་ཞིག་ཡར་རྒྱས་གཏོང་ཆེད་དྲག་སྤྱོད་ལྟ་བུའི་ཐབས་ལམ་མཐར་ལྷུང་བ་བེད་སྤྱོད་བྱེད་པར་སྐབས་རེ་རྒྱུ་མཚན་ལྡན་པ་ཡིན་ཚུལ་བརྗོད་མཁན་གྱི་གྲངས་འབོར་ "སེམས་འཚབ་སྐྱེ་གཞི་" ཞིག་ཡོད་པར་བསྟན་ཡོད།
"རུའུ་སི་(Roose)ཡིསམཐའ་ལྷུང་རིང་ལུགས་ཀྱི་ཆ་ལ་ཨོ་སི་ཊེ་ལི་ཡ་རྒྱབ་ཏུ་ལུས་མེད། དེའི་ཐད་ཨོ་སི་ཊེ་ལི་ཡ་ནི་བདེ་འཇགས་ལྡན་པའི་ས་ཆ་ཞིག་ཀྱང་མིན།"ཞེས་བརྗོད།
ཨ་རིའི་ནང་གི་གཡས་ཕྱོགས་མཐའ་ལྷུང་རིང་ལུགས་ཀྱི་ལས་འགུལ་ཁག་གིས་ཨོ་སི་ཊེ་ལི་ཡའི་ནང་ཤུགས་རྐྱེན་ཆེན་པོ་ཐེབས་ཡོད་པ་དང་། དེས་ "གཡས་ཕྱོགས་མཐའ་ལྷུང་ཕྱོགས་ཀྱི་ཐལ་ཆེ་བའི་ཞེ་སྡང་དེ་རྒྱུན་ལྡན་ཅན་དུ་འགྱུར་བཞིན་ཡོད་པ་" མཐོང་གི་ཡོད་པར་བརྗོད།
"དྲྭ་ཐོག་ཏུ་ཁྱབ་སྤེལ་བྱེད་བཞིན་པའི་ [ཞེ་སྡང་སློང་བའི་རྒྱུ་ཆ་] མང་དུ་འགྲོ་བ་འགོག་ཐབས་བྱེད་པ་ཙམ་མ་ཟད། ཨོ་སི་ཊེ་ལི་ཡའི་ནང་དྲྭ་ཐོག་ཏུ་ཞེ་སྡང་ཁྱབ་སྤེལ་བྱེད་མཁན་ཚོ་གཅུན་རྒྱུའི་དགོས་མཁོ་དེ་བས་ཆེ་བ་ཡོད།"
