ཨོ་སི་ཊེ་ལི་ཡའི་ཚན་རིག་པ་ཚོས་སྒོར་དུང་ཕྱུར་མང་པོ་ལ་ཐུག་པའི་དཀའ་ངལ་འདིར་གདོང་ལེན་བྱེད་པའི་ཐབས་ལམ་གསར་པ་ཞིག་གསར་གཏོད་བྱས་ཡོད།
ཨོ་སི་ཊེ་ལི་ཡའི་ཉིན་མོའི་བར་ཟས་ཚོང་བྲིན་མྱུར་ཤོས་ནི་མཚོ་ཟས་རྣམས་ཡིན་པ་དང་། ལྷག་པར་སི་ཌི་ནི་ཡི་ཉ་ཚོང་ཁང་གསར་པའི་ནང་དེ་བས་ཚོང་འབོར་ཆེ།
འོན་ཀྱང་དོན་དངོས་སུ་ང་ཚོས་རིན་བབས་སྤྲད་པ་བཞིན་རང་གི་གང་འདོད་ཀྱི་ཟས་ཐོབ་ཀྱི་ཡོད་དམ།
ཉོ་མཁན་གྱི་ཡིད་ཆེས་འཕེལ་བའི་ཆེད་དུ་ཁྲོམ་ར་དང་རྡུལ་ཕྲན་ཚན་རིག་པའི་ཚོགས་ཆུང་ཞིག་ལྷན་དུ་ཉའི་འབྱུང་ཁུངས་ངོས་འཛིན་བྱེད་རྒྱུ་རེད། ཌོག་ཊར་ཌི་བ་ཤིས་ཤི་མ་ཛུམ་དྷ་ནི་ཨོ་སི་ཊེ་ལི་ཡའི་རྡུལ་ཕྲན་ཚན་རིག་དང་འཕྲུལ་རིག་ལྟེ་གནས་ཁང་ (ANSTO) གི་ཟས་རིགས་ཀྱི་འབྱུང་ཁུངས་ཞིབ་འཇུག་ལས་གཞིའི་འགན་འཛིན་ཡིན།
ཉ་ཤའི་ནང་གི་ཀལ་ཤི་ཡམ་མམ་ཟངས་ལྟ་བུའི་རྫས་འཚོལ་ཞིབ་ཀྱིས་མཛུབ་རིས་དེས་ཉ་དེ་གང་དུ་འཚར་ལོངས་བྱུང་བ་དང་། གང་དུ་གསོ་སྐྱོང་བྱས་མིན་ཏག་ཏག་བསྟན་ཡོང་། ཚོད་ལྟ་ཁང་དུ་གཏེར་ཁ་སྔོག་འདོན་ལས་རིགས་ཀྱི་འཕྲུལ་ཆས་ལ་དཔེ་བླངས་ནས་བཟོས་པའི་ལག་ཐོགས་ཀྱི་ཞིབ་བཤེར་ཡོ་བྱད་ཅིག་གིས་ཨོ་སི་ཊེ་ལི་ཡའི་རང་བྱུང་གི་ཁོར་ཡུག་ནས་བཟུང་པར་གྲགས་པའི་ཉ་ཞིག་དོན་དངོས་སུ་ཨེ་ཤི་ཡའི་ནང་གསོ་སྐྱོང་བྱས་པ་ཞིག་ཡིན་མིན་ཡང་བརྟག་དཔྱད་བྱེད་ཐུབ། དེ་འདྲ་ཡིན་ན་དེ་ལ་ཟས་རིགས་རྫུན་བཟོ་ཟེར།
ཨོ་སི་ཊེ་ལི་ཡའི་མཚོ་ཟས་ལས་རིགས་ལ་ལོ་ལྟར་ཨ་སྒོར་ཐེར་འབུམ་བཞི་ཙམ་གྱི་རིན་ཐང་ཡོད།
ཨོ་སི་ཊེ་ལི་ཡས་མཚོ་ཟས་མང་པོ་ཕྱིར་ཚོང་བྱེད་ཀྱི་ཡོད་ཀྱང་། འདིར་བཙོང་བའི་མཚོ་ཟས་ཚང་མའི་ནང་ནས་བརྒྱ་ཆ་དྲུག་ཅུ་ཙམ་ནི་ནང་འདྲེན་བྱས་པ་ཡིན།
དེས་རྫུན་བཟོའི་ཉེན་ཁ་ཇེ་ཆེར་གཏོང་གི་ཡོད།
ཊེ་བྷལ་ནི་རྫུན་བཟོའི་ཟས་རིགས་ལམ་སྟོན་ཁང་གི་སློབ་སྟོན་པ་གཙོ་བོ་ཞིག་རེད།
ཕྱི་ལོ་ ༢༠༢༡ ལོའི་ཨོ་སི་ ཊེ་ལི་ཡའི་མ་འོངས་སོ་ནམ་ལས་དོན་ཁང་གི་སྙན་ཐོར་གཞིགས་ན་འཛམ་གླིང་ཡོངས་ཀྱི་ཟས་རིགས་རྫུན་བཟོས་ལོ་ལྟར་ཨ་སྒོར་ཐེར་འབུམ་བདུན་ཅུ་དོན་ལྔ་ཙམ་གྱི་གྱོང་གུན་བཟོ་བཞིན་ཡོད་པ་དང་། ཨོ་སི་ཊེ་ལི་ཡ་ཁོ་ནར་ཨ་སྒོར་ཐེར་འབུམ་གསུམ་ཙམ་གྱི་གྱོང་གུན་ཕོག་གི་ཡོད་པའི་ཚོད་དཔག་བྱས་ཡོད། དེའི་ཁྲོད་ཉེན་ཚབ་ཆེ་ཤོས་སུ་ཡོད་པ་ནི་ཆང་དང་། སྦྲང་རྩི། མཚོ་ཟས་བཅས་ཡིན།
སློབ་དཔོན་ཆེན་མོ་ཇེ་སི་སམ་མི་ཊི་ནི་ནེའུ་སོ་ཐི་ཝལ་སི་གཙུག་ལག་སློབ་ཆེན་གྱི་ཆུའི་སྲོག་ཆག་གསོ་སྐྱོང་ཞིབ་འཇུག་ཚོགས་པའི་འགོ་ཁྲིད་ཡིན།
ཁོང་གིས་ཟས་རིགས་ཀྱི་འབྱུང་ཁུངས་ར་སྤྲོད་བྱེད་པའི་འཕྲུལ་རིག་གསར་པ་དེར་མཚོ་ཟས་ཚུད་པའི་ལས་རིགས་ཁག་གི་རྒྱབ་སྐྱོར་ཡོད་པར་གསུངས་ཡོད།
ཟས་རིགས་རྫུན་བཟོ་བྱས་པ་བརྒྱུད་འཕྲོད་བསྟེན་ལ་ཉེན་ཁ་ཡང་ཧ་ཅང་ཆེན་པོ་ཡོད།
འཛམ་གླིང་འཕྲོད་བསྟེན་ལྷན་ཚོགས་ཀྱིས་བསྲེས་ལྷད་བྱས་པའི་ཟས་རིགས་གི་རྐྱེན་པས་ལོ་ལྟར་འཛམ་གླིང་ཡོངས་སུ་མི་ས་ཡ་དྲུག་བརྒྱ་ནད་ཀྱིས་མནར་བ་དང་བཞི་འབུམ་གཉིས་ཁྲི་རྐྱེན་འདས་སུ་འགྲོ་ཡི་ཡོད་པར་བརྗོད། འབུམ་རམ་པ་མ་ཛུམ་དྷ་ལགས་ཀྱིས་ཨོ་སི་ཊེེ་ལི་ཡ་ནང་དུའང་བསྲེས་ལྷད་ཅན་གྱི་ཟས་རིགས་ནི་དཀའ་ངལ་ཆེན་པོ་ཞིག་ཡིན་པར་གསུངས།
ད་ལོའི་ཟླ་བདུན་པ་ནས་བཟུང་ཨོ་སི་ཊེ་ལི་ཡའི་གསོལ་མགྲོན་ཁང་གི་ཚོང་ལས་ཁང་ཚོས་ཁྲིམས་གསར་པ་ལྟར་རྒྱ་མཚོའི་ཟས་རིགས་ཚང་མར་ཐོན་ཁུངས་ཀྱི་རྒྱལ་ཁབ་མཚོན་བྱེད་ཀྱི་མཚན་བྱང་བཀོད་དགོས་པ་དང་། དེ་ལྟར་མ་བྱས་ཚེ་ཉེས་ཆད་ཕོག་གི་ཡོད། ཀ་རན་ཀོན་སི་ཊེ་བྷལ་ལགས་ཀྱིས་ལག་བསྟར་གྱི་མདུན་བསྐྱོད་དེ་ལ་དགའ་བསུ་ཞུ་བཞིན་ཡོད།
ཁོ་མོས་གཞན་ཡང་ཕྱི་རྒྱལ་དུ་རིན་གོང་མཐོ་པོར་བཙོང་རྒྱུའི་དངོས་རྫས་དེ་དག་ཨོ་སི་ཊེ་ལི་ཡའི་ས་ཐོག་ནས་བྱུང་བ་ཡིན་ཚུལ་གྱིས་མཚན་བྱང་རྫུན་མ་བཀོད་པ་དེ་ཡང་དཀའ་ངལ་ཞིག་ཡིན་པར་གསུངས།
འབུམ་རམ་པ་མ་ཛུམ་དྷ་ལགས་ཀྱིས་གསུངས་པ་ལྟར་ན། ཨོ་སི་ཊེ་ལི་ཡའི་ཁྱད་ཆོས་ལྡན་པའི་ཀ་ཀ་ཌུ་ཤིང་ཏོག་ནི་ཚབ་རྫུས་བཟོ་སླ་ཤོས་ཀྱི་ཐོན་རྫས་ཀྱི་གྲས་ཤིག་ཡིན་པ་རེད།
ཨོ་སི་ཊེ་ལི་ཡའི་རྡུལ་ཕྲན་ཚན་རིག་དང་འཕྲུལ་རིག་ལྟེ་གནས་ཁང་གིས་འཕྲུལ་རིག་གསར་པ་དེ་འཛམ་གླིང་ཡོངས་ལ་འགྲེམས་སྤེལ་གྱིས་ཚན་རིག་པ་ཚོ་དང་ལྷན་དུ་མཉམ་ལས་བྱས་ཏེ་ཟས་རིགས་ཀྱི་ཐོ་གཞུང་འབོར་ཆེན་བསྡུ་རུབ་ཐོག་དེ་དག་གི་འབྱུང་ཁུངས་འཚོལ་ཞིབ་ལས་དོན་གཉེར་བཞིན་ཡོད།
འབུམ་རམ་པ་མ་ཛུམ་དྷ་ལ་མཚོན་ན་ཟས་རིགས་ཀྱི་འབྱུང་ཁུངས་འཚོལ་ཞིབ་བྱེད་པ་ནི་ལོ་བཅུ་ཕྲག་གཅིག་གི་རིང་གི་དགའ་ཞེན་ཆེ་བའི་ལས་གཞི་ཞིག་ཡིན་པ་དང་། ཁོང་གིས་འཕྲུལ་རིག་གསར་པ་འདི་བརྒྱུད་མི་ཚང་མར་ཟས་རིགས་ཀྱི་འབྱུང་ཁུངས་གསལ་ཁ་དོད་དུ་འགྲོ་རྒྱུའི་རེ་བ་འཆང་བཞིན་ཡོད།
