ኣብ ሱዳን ኣብ ልዕሊ ሰላማዊ ሰልፈኛታት ተኲሲ ተኸፊቱ ሰላማዊያንን ሓደ ወተሃደርን ተቐቲሎም።

ትማሊ ተዂሲ ዝኸፍተን ሰባት ክቕተሉ ዝገበረ  እቲ ንሱዳን ዝመርሓ ዘሎ ወተሃደራዊ ስርዓት ከምዝኾነ ሰላማዊ ሰልፈኛታት ሱዳን ከሲሶም

እዚ ኣብ ሱዳን ዳግም ዝተወለዐ ደማዊ ናይ ጽርግያ መጥቃዕቲ እቲ ንሱዳን ክመርሓ ስልጣን ሒዙ ዝርከብ ወተሃደራዊ ሓይሊ ተሓታቲ ከምዝኾነን ነጻ መርማሪ ኣካል ክቐውም ናይ ሱዳን ተቓዋሚ ልፍንቲ ከምዝገለጸ ኣልጀዚራ ጸብጺቡ።

ትማሊ መሰጋገሪ ወተሃደራዊ  ባይቶን ተቓዋሚ ሓይሊታት ኣዋጅ ነጻነትን ለውጢን (DFCF) ብዛዕባቲ መሰጋገሪ መድረኽ ከፊላዊ ስምምዕ ጌርና ኣብ ዝበልሉ እዩ ትማሊ  ኣብ ኣፍደገ ማእከላይ ቤት ጽሕፈት ምክልኻል ኣብ ካርቱም ዝነበረ ናይ ተቓዉሞ ሰልፊን ዝሰዓበ ተዂሲ ኣርባዕተ ሰባት ከምተቐትሉን ዓሰርተታት ሰባት ከምዝቖሰሉን ተገሊጹ ዘሎ።

ኣብቲ ናይ ሰኑይ ፍጻመ ሓደ ኣባል ወተሃደራዊ ፖሊን ሰለስተ ሰላማዊ ሰልፈኛታትን ከምተቐትሉ ናይ ሱዳን ተለቪዥን ጸብጺቡ ኣሎ። እቲ ብዶክተራት ዝምራሕ ናይ ተቓዉሞ ኮሚተ ነቲ ጉዳይ ምስ ኣጻረየ እዩ እቲ ብዝሒ ሞት ካብ ሽዱሽተ ናብ ኣርባዕተ ኣውሪድዎ ዘሎ።

እቲ ብሓይልታት ፈጣናት ደገፍ ተባሂሉ ዝጽዋዕ ኣዛዚኡ ድማ ምክትል ናይቲ መሰጋገሪ ወተሃደራዊ ባይቶ ኮይኑ ዘሎ ሚሸት ኣብ ጽርግያታት ካርቱም ጸጥታ ንምኽባርን ንሰልፈኛታት ንምብታን ናይ ዘንብዕ ጋዝን ጥይትን ተዂሲ ከምዝኸፈተ እዩ ተፈሊጡ ዘሎ።

እዚ ከምዚሉ እንከሎ እቲ ካብስልጣኑ ዝተዓልወ ዑመር ኣልበሺር ብቅትለት ሰላማዊ ሰልፈኛታት ተኸሲሱ ኣሎ።

ሰልፈኛታት ናብ ሎሚ ዘውግሐውን ጽርግያታት ብምዕጻው ተቓዉሞኦም ቀጺሎም ከምዘለዉ ሮይተርስ ካብቲ ቦታ ጸብጺቡ ኣሎ፡፤