چُڑیلز پہلی پاکستانی سیریز ہے جو زی ۵ گلوبل پرویب سیریز کے طور پر شروع کی جا رہی ہے ۔ چُڑیلز چارایسی خود ساختہ چڑیلوں کی کہانی ہے جو کچھ دقیانوسی تصورات کو توڑنے کے لئے مل بیٹھتی ہیں اور معاشرتی منافقت کو چیلنج کرتی ہیں۔
کیک فلم کی ہدایات سے شہرت پانے والے عاصم عباسی کی ہدایتکاری میں بننے والی ، چُڑیلز’ سیریز میں معروف فنکارہ ثروت گیلانی ، نمرا بُچہ ، مہر بانو ، اور یاسرا رضوی مرکزی کرداروں میں شامل ہیں۔
آنے والی سیریز کے بارے میں بات کرتے ہوئے اداکارہ یاسرا رضوی نے کہا کہ چُڑیلز خواتین کے چار مضبوط کرداروں کی کہانی ہے لیکن اس میں یہ دکھایا گیا ہے کہ ہر ایک عورت صرف ایک خاص ملک میں ہی نہیں بلکہ عالمی سطح پر بھی برے سلوک کا نشانہ بنتی ہے۔۔ نمرا بُچہ کا کہنا ہے کہ ان کرداروں نےانہیں تقویت بخشی ہے اور انہیں یقین ہے کہ جو لوگ اسے دیکھیں گے وہ بھی انِ کرداوروں سے خود کو قریب محسوس کریں گے۔
معروف فنکارہ ثروت گیلانی نے کہا کہ چُڑیلز اس بات کا احساس دلانے کی کوشش ہے کہ ایک عورت کی حیثیت سے آپ کیا کرسکتے ہیں۔ ڈرامے میں کرداروں اور کہانی کے ذریعے سمجھ ، بصیرت ، آگاہی ، اور زندگی کی مکمل حقیقت کا عکس دکھایا گیا ہے۔ کہانی بہت اچھی طرح سے لکھی گئی ہے اور عاصم عباسی نے بہت ہی عمدہ ہدایتکاری کی ہے
۔ اس ڈرامے کے ذریعے ایک خاموش انقلابی تبدیلی کا حصہ بننا ایک حیرت انگیز احساس دلاتا ہے ۔ میرے خیال میں چیڑیلز کے بعد پاکستانی میڈیا یقینی طور پر بدل جائے گا۔
میرے لئے بین الاقوامی سطح پر چڑیلز جیسی ویب سیریز کا حصہ بننا ایک شاندار سفر رہا
مہر بانو اور یاسرہ رضوی نے بھی اس بات کی تائید کرتے ہوئے کہا کہ شوٹنگ کے دوران آنے والی تمام مشکلات اس احساس اور خوشی کے باعث دھندلی پڑ گئیں کہ یہ ڈرامہ عالمی سطح پر عورتوں کی طاقت اور ان کے حقوق کا مثبت پیغام دینے جا رہا ہے۔
اس سیریز کے فنکار وں کی بات چیت سننے کے لئے اوپر دئے اسپیکر بٹن پر کلِک کیجئے
