پاکستان سمیت کئی ممالک کی افغان شہریوں کی ملک بدری مہم کےآسٹریلیا میں پناہ کی درخواستوں پر اثرات

آسٹریلیا کے محکمہ داخلہ کے ایک ترجمان نے ایس بی ایس کو بتایا کہ پاکستان میں درست ویزے کے بغیر مقیم افراد کو پاکستانی حکومت کے غیر قانونی غیر ملکیوں کی وطن واپسی کے منصوبے کے تحت ملک بدری کے بڑھتے ہوئے خطرے کا سامنا ہو سکتا ہے۔ ایک بیان میں محکمہ خارجہ و تجارت نے کہا کہ ان حالات اور پاکستان کے اندر درخواست گزاروں کی نقل و حرکت پر پابندیوں کے باعث ویزا درخواستوں پر کارروائی اور ضروری بائیومیٹرک اور طبی معائنے تک رسائی متاثر ہو رہی ہے۔

پاکستان نئی ملک بدری کی پالیسی پر عمل درآمد کے لیے گھروں اور بازاروں میں چھاپے مار کر بغیر دستاویزات کے مقیم افغان شہریوں کو تلاش کر رہا ہے اور ملک بدری میں تیزی لا رہا ہے۔

افغان خواتین کے حقوق کی 25 سالہ کارکن لینا امانی پاکستان میں چھپ کر زندگی گزارنے پر مجبور ہیں

لینا امانی کہتی ہیں کہ انہیں سب سے زیادہ خوف جبراً اسی جگہ واپس بھیجے جانے کا ہے جہاں سے وہ محفوظ اور بہتر زندگی کی تلاش میں فرار ہوئی تھیں۔

آزاد سینیٹر ڈیوڈ پوکاک نے افغان شہریوں کو آسٹریلیا لانے کے حکومتی عزم پر سوال اٹھاتے ہوئے کہا:

"میں نے سابق فوجیوں سے سنا ہے کہ آسٹریلیا واپس آنے کے بعد انہیں اس بات کا احساسِ جرم رہا کہ ان کے افغان ساتھی اور دوست پیچھے رہ گئے۔ ایک شخص، جس کا نام اس کی حفاظت کے لیے ظاہر نہیں کیا جا رہا، ارزگان میں ہمارے فوجیوں کے شانہ بشانہ کام کرتا رہا، لیکن اس کا کیس چھ سال تک التوا میں پڑا رہا، یہاں تک کہ طالبان نے اس پر بم حملہ کیا اور وہ زندگی اور موت کی کشمکش میں مبتلا ہو گیا۔ وہ فیصلے کا انتظار کرتے ہوئے تقریباً جان سے ہاتھ دھو بیٹھا۔ کیا حکومت ہر تصدیق شدہ مقامی افغان ملازم کو آسٹریلیا لانے کا عہد کرے گی؟"

افغان ایل ای ای، یعنی افغان لوکلی انگیجڈ ایمپلائی پروگرام، آسٹریلوی حکومت نے 2012 میں شروع کیا تھا۔ اس کا مقصد افغانستان میں آسٹریلوی حکومت کے لیے کام کرنے والے افغان شہریوں کی انسانی ہمدردی کے ویزوں کی درخواستوں کو ترجیحی بنیادوں پر پراسیس کرنا تھا۔

یہ پروگرام مئی 2024 میں بند ہو گیا، تاہم زیرِ التوا ویزا درخواستوں پر اب بھی کارروائی جاری ہے۔

وزیر خارجہ پینی وونگ کا کہنا ہے کہ ان کی جانب سے طلب کی گئی ایک رپورٹ کے مطابق افغان ایل ای ای پروگرام کے تحت 660 سے زیادہ درخواستوں کی تصدیق کی گئی ہے۔ یہ تعداد 2012 میں پروگرام شروع ہونے کے بعد ان سے پہلے کے تمام وزرائے خارجہ کے ادوار میں مجموعی طور پر منظور کی گئی درخواستوں سے زیادہ ہے۔

ہر بدھ اور جمعہ کا پورا پروگرام اس لنک پرسنئے , اردو پرگرام سننے کے دیگر طریقے SBS Audio کے نام سے موجود ہماری موبائیل ایپ ایپل (آئی فون) یا اینڈرائیڈ , ڈیوائیسزپرانسٹال کیجئے۔ پوڈکاسٹ سننے کے لئے نیچے دئے اپنے پسندیدہ پوڈ کاسٹ پلیٹ فارم کا انتخاب کیجئے:  Spotify Podcast , Apple Podcasts