- ریاست نیو ساؤتھ ویلز کی حکومت کا کہنا ہے کہ بڑے آئل کمپنیوں کو اس بات پر مجبور کرنے کے لیے قانونی اختیارات استعمال کیے جائیں گے کہ وہ یہ معلومات فراہم کریں کہ وفاقی حکومت کی جانب سے جاری کیے گئے اضافی ایندھن کو کس طرح تقسیم کیا جائے گا تاکہ یہ علاقائی کمیونٹیز تک پہنچ سکے۔ وزیر اعلیٰ کرس منس کے مطابق ریاست میں اس وقت 51 پیٹرول اسٹیشن ایسے ہیں جہاں ایندھن دستیاب نہیں، جبکہ 164 اسٹیشنز پر ڈیزل ختم ہو چکا ہے۔ انہوں نے بتایا کہ پیرامیٹا میں ایک ہنگامی آپریشن سینٹر قائم کیا جا رہا ہے تاکہ آنے والے ہفتوں میں ایندھن کی قلت کے تعمیرات، زراعت اور کان کنی کے شعبوں پر ممکنہ اثرات کو بہتر طور پر سمجھا جا سکے۔
- حکومت کے سینئر عہدیداروں نے اس سرکاری مشورے سے خود کو الگ کر لیا ہے جس میں کہا گیا تھا کہ پیٹرول پمپ پر 40 ڈالر کی حد مقرر کرنے سے آسٹریلیا کے بعض حصوں میں شدید ایندھن کی قلت پر قابو پایا جا سکتا ہے۔ مشرقِ وسطیٰ میں جنگ کے باعث پیٹرول، ڈیزل اور جیٹ فیول کی قیمتیں تیزی سے بڑھ گئی ہیں۔ اس کے نتیجے میں گاڑی چلانے والے افراد زیادہ مقدار میں ایندھن ذخیرہ کر رہے ہیں، اور سینکڑوں سروس اسٹیشنز پر ایندھن ختم ہو چکا ہے۔
- گرینز پارٹی نے اعلان کیا ہے کہ وہ ایک بل دوبارہ وفاقی پارلیمنٹ میں پیش کرے گی، جس کے تحت بیرونِ ملک کسی تنازع میں آسٹریلوی فوج بھیجنے سے پہلے پارلیمنٹ کی منظوری لازمی ہوگی۔ وزیر خارجہ پینی وونگ نے واضح کیا ہے کہ مشرقِ وسطیٰ کی جنگ کے تناظر میں زمینی افواج بھیجنے کا کوئی منصوبہ نہیں ہے، البتہ ایک نگرانی کرنے والا طیارہ اور عملہ متحدہ عرب امارات بھیجا گیا ہے تاکہ آپریشن کی نگرانی کی جا سکے۔ گرینز کے خارجہ امور کے ترجمان ڈیوڈ شوبرج کا کہنا ہے کہ اس حوالے سے حفاظتی اقدامات ضروری ہیں۔
- اقوام متحدہ نے اسرائیلی بیانات پر تشویش کا اظہار کیا ہے جن میں جنوبی لبنان میں مزید اندر تک فوج بھیجنے کی بات کی گئی ہے، اور کہا ہے کہ یہ بیانات اور جاری فوجی سرگرمیاں “انتہائی تشویشناک” ہیں۔ اسرائیل کے وزیر دفاع اسرائیل کاٹز نے اعلان کیا ہے کہ اسرائیل دریائے لیتانی تک جنوبی لبنان پر قبضہ کرے گا تاکہ ایک “دفاعی بفر” قائم کیا جا سکے۔ یہ پہلا موقع ہے کہ اسرائیل نے لبنان کے تقریباً دس فیصد علاقے پر قبضہ کرنے کا ارادہ ظاہر کیا ہے۔ اقوام متحدہ کے ترجمان اسٹیفان دوجارک کا کہنا ہے کہ اس تنازع کا کوئی فوجی حل موجود نہیں۔
- آسٹریلیا 2027 میں یورپی یونین کے نمایاں تحقیقی فنڈنگ پروگرام میں شامل ہونے کے لیے معاہداتی مذاکرات شروع کرنے جا رہا ہے۔ دنیا کے سب سے بڑے تحقیق اور جدت طرازی کے فنڈنگ پروگرام ہورائزن یورپ کا بجٹ 95 ارب یورو سے زائد، یعنی تقریباً 157 ارب آسٹریلوی ڈالر ہے، جو بڑے پیمانے پر تحقیقی منصوبوں کی حمایت کرتا ہے۔ سائنس اینڈ ٹیکنالوجی آسٹریلیا نے اس اعلان کا خیرمقدم کیا ہے، جو 24 مارچ کو یورپی کمیشن کی صدر ارسولا فان ڈیر لاین کے کینبرا کے دورے کے دوران آزاد تجارتی معاہدے کے اعلان کے بعد سامنے آیا ہے۔
- مصری سپر اسٹار محمد صلاح نے اعلان کیا ہے کہ وہ سیزن کے اختتام پر لیورپول کو چھوڑ دیں گے اور اپنے معاہدے سے ایک سال پہلے علیحدہ ہو جائیں گے۔ وہ پریمیئر لیگ کی تاریخ میں کسی غیر ملکی کھلاڑی کی جانب سے سب سے زیادہ گول کرنے کا ریکارڈ رکھتے ہیں۔ لیورپول کلب نے صلاح کو “کلب کی تاریخ کے عظیم ترین کھلاڑیوں میں سے ایک” قرار دیا ہے، اور کہا ہے کہ انہوں نے اپنے مستقبل کے بارے میں شفافیت برقرار رکھتے ہوئے مداحوں کے احترام میں یہ اعلان جلد کیا۔ صلاح نے ابھی یہ نہیں بتایا کہ وہ آئندہ کس کلب میں شامل ہوں گے۔ سوشل میڈیا پر جاری ایک ویڈیو میں انہوں نے کہا کہ وہ لیورپول میں اپنے نو سال کے دوران بننے والے تعلقات پر شکر گزار ہیں۔
_________
جانئے کس طرح ایس بی ایس اردو کے مرکزی صفحے کو بُک مارک کریں ہر بدھ اور جمعہ کا پورا پروگرام اس لنک پرسنئے, اردو پرگرام سننے کے دیگر طریقے, “SBS Audio”کےنام سےموجود ہماری موبائیل ایپ ایپیل (آئی فون) یااینڈرائیڈ , ڈیوائیسزپرانسٹال کیجئے
