Ntsiab lus:
- Tsev kawm qib siab University of New South Wales (UNSW) hais kom nws tej neeg teeb txheeb los txheeb txog lawv cov kev koom tes nrog tej teb chaws uas raug txwv.
- Tau muaj ib tug kis ntawm lub koom haum Group of Eight (Go8) hais tias yeej ua raws li tsoom fwv teb chaws tej kev taw qhia.
Muaj Australia ib lub tsev kawm qib siab tsem ceeb ntawm ntau lub tau tab tom los txwv cov kev teeb txheeb nrog Iran, Russia, Belarus thiab North Korea kom nruj tuaj ntxiv, thiab kuj muaj cov kev ceeb toom tias yog tsem koom tes nrog ces yuav yuam cov kev txwv thiab yuav raug txim nplua.
Thiaj tau muaj tej xwm txheej no rau lub caij uas tej tsev kawm qib siab thoob teb chaws txheeb txog cov kev koom tes nrog txawv teb chaws rau lub tsam thawj uas tsoom fwv teb chaw tau muaj cov kev txheeb tej hauj lwm no ntau tuaj ntxiv, rau qhov tau muaj lub koom haum Group of Eight (Go8) uas tau teeb txheeb txog tej tsev kawm qib siab ntawm Australia tab tom tshuaj ntsuam tias seb cov kev koom tes teeb txheeb no puas cuam tshuam dab tsi nrog tej teb chaws uas raug txwv lagluam no.
Raws li Dane McCamey uas yog ib tug coj tseem ceeb ntawm tsev kawm qib siab University of New South Wales (UNSW) uas txhawb nqa cov kev teeb txheeb thiab lagluam tau hais ces kuj tau qhia kom nws tej neeg ua hauj lwm tsis txhob pib los yog tsis txhob muaj kev koom tes txuas ntxiv nrog tej neeg ntiag tug los yog ib co koom haum twg ntawm 4 lub teb chaws no yam tsis tau txais kev tso cai los ntawm tej coj tseem ceeb.
McCamey thiaj tau hais cov lus no hauv ib tsab email tias "Vim tau muaj tej laj fai kum xeeb pauv hloov sai heev rau ib thaj chaw twg ces tsoom fwv Australia thiaj muaj kev cia siab ntau tuaj ntxiv tias tej tsev kawm qib siab yuav xyuam xim ceev faj tshaj qub thiab ua tib zoo txheeb cov kev koom tes nrog pej kum haiv."
"Thiaj yog tej yam tseem ceeb uas UNSW yeej paub zoo txog tag nrho nws cov kev koom tes nrog tej neeg ntiag tug, thiab tej koom haum ntawm Iran, Russia, Balarus los yog Democratic People's Republic of Korea (North Korea) kom tsis txhob koom tes ua ntau yam, tsis hais yog txhob txwm los tsis yog li, uas yuav cov nyom nrog tej kev txwv cov teb chaws no los yog ua tej yam uas cov nyom tej tsoom fwv Australia tsis pub ua.
"Txhais tias tam sim no ces yeej tsis tau txais kev tso cai los ua ib yam hauj lwm dab tsi nrog tej neeg ntiag tug los yog ib co koom haum ntawm tej teb chaws no, tsuas yog tias tau txais kev tso cai pom zoo los ntawm yus tus coj Dean (tus coj dej num kev kawm ntawm ib lub teej kawm) los yog tus coj cov kev teeb txheeb thiab lagluam ntawm tsev kawm qib siab (Pro Vice-Chancellor Research) xwb."
McCamey kuj tau hais ntxiv tias tej neeg teeb txheeb uas yuam cov kev txwv no tej zaum yuav ''raug teeb meem loj'', suav cov kev raug txim txhaum vim yuam tsoom fwv tej kev txwv uas tej zaum yuav raug kaw tsev laj cuj txog li 10 xyoo thiab.
Nws tau hais tias "Txawm tias pab cov technical assistance (li editorial quidance) rau tej neeg ntiag tug los yog tej koom haum ntawm tej teb chaws no xwb los tej zaum kuj raug xam tias yog ib cov kev yuam cov kev txwv no thiab,''
McCamey tau hais tias tej hauj lwm uas lub tsev kawm qib siab no ua ces yog hloov raws li ''tsoom fwv Australia tsab cai foreign policy uas siv rau tej tsoom fwv ntawm tej teb chaws no."
Nws tau hais ntxiv tias "Tsis yog yuav plam txiaj ntsim rau tej neeg ua hauj lwm ntawm UNSW uas tuaj ntawm tej teb chaws no, los yog muaj kev sib raug nrog tej teb chaws no."
Tau muaj UNSW ib tug kis ntawm Sydney tau hais tias lub tsev kawm qib siab no yeej ''tau txais cov kev taw qhia tshiab'' ntawm tsoom fwv Australia ua ntej yuav xa email mus ceeb toom qhia rau lawv tej neeg ua hauj lwm tias yuav tsum tau thov kev tso cai ua ntej yuav ua ib yam dab tsi nrog ntau cov koom haum uas raug txwv ntawm tej teb chaws no."
Raws li Australia tej cai teev tseg ces yeej muaj ntau cov kev txwv rau tej teb chaws raug txwv no, suav cov kev nug kom tej tsev kawm qib siab tsis txhob ua ib yam dab tsi pab, los yog tsis txhob cuam tshuam nrog ib tug neeg twg los yog ib lub koom haum twg ntawm tej teb chaws raug txwv no.
Raws li cov kev taw qhia ntawm Australian Sanctions Office ces tej kev txwv no yeej kuav txog ib tug tub kawm cov kev teev zwm npe kawm, cov kev ntiav ib tug neeg ua hauj lwm, thiab cov kev koom tes nrog lwm tus neeg los yog ib lub koom haum twg ntawm ib lub teb chaws uas raug txwv.
Thiaj muaj ib tug kis ntawm ntawm lub koom haum Go8 uas sawv cev rau Australia 8 lub tsev kawm qib siab cov kev teeb txheeb tau qhia rau SBS News tias tej tsev kawm qib siab yeej tab tom los txheeb thiab ua raws li tsoom fwv cov kev taw qhia.
Tus kis no tau hais tias "Tej tsev kawm qib siab yeej raug txib kom tshuaj ntsuam cov kev sib raug zoo ntawm lawv lub koom haum nrog lwm lub koom haum, thiab tej tsev kawm qib siab no yuav tau ua tib zoo los nrog xyuas tej hauj lwm no raws li qhov tsim nyog ua,"
"Lub koom huam Go8 yeej kub siab tiag tiag txog cov kev ruaj ntseg haiv thiab tab tom los pov puag tej tsim nyog tau txais kev pov puag, thiab yuav ua tib zoo koom tes nrog tsoom fwv."
Lub tuam chav tswj dej num kev kawm (Department of Education) thiab lub tuam chav Department of Home Affairs ces yog ob lub uas saib xyuas lub tuam chav University Foreign Interference Taskforce, los yeej raug SBS News nug seb lawv xav li cas tab sis kuj tsis tawm tswv yim dab tsi.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
