Teb chaws Australia tseem tab tom ntsib tej teeb meem tsis tau vaj tse nyob vim tej nqe ntiav tsev los kim thiab tej nqe yuav tsev los kim tuaj ntxiv lawm.
Australia yog lub teb chaws ntawm cov teb chaws OECD uas muaj tej neeg tsis tau vaj tse nyob coob tshaj plaws. Vim ib hmo twg yeej muaj tej neeg tshaj 122,000 tus tsis tau tsev nyob.
Thiab raws li tau muaj ib tsab ntawv cej luam tsis ntev los no tau qhia ces yog tias yus tseem yog tus neeg ua hauj lwm khwv tau nyiaj tsawg thiab ces yeej nyuaj tshaj qub ntxiv rau yus yuav muaj peev xwm ntiav tau tsev nyob.
Brendan Wilhelmi kuj yog ib tug ntawm tej neeg ze txog li 250,000 tus uas teev npe tos kom tau cov social housing nyob tom qab uas nws ua ib siab tawm hauj lwm los tu thiab saib xyuas nws tus tab zag uas muaj mob ces ua rau nws tsis muaj peev xwm yuav nrhiav tau tsev ntiav nyob lawm.
Nws kuj hais tias 'kuv raug teev npe tos seb puas tau tsoom fwv cov social housing nyob, tab sis tej neeg ua hauj lwm no tseem qhia rau kuv tias ntshe tseem yuav tau tos txog 2 xyoos diam. Ces thiaj ua rau kuv poob rau cov xwm txheej uas seb puas yuav mus nyiag khoom noj los pub kuv tsev neeg los yog yuav mus tsa phiaj thov tej neeg tej nyiaj seem los yuav zaub mov rau kuv tsev neeg noj lawm xwb.'
Txawm tias tsoom fwv Albanese yeej npaj cov tswv yim Housing Australia Future Fund $10 billion uas yuav tsim kom tau tej vaj tse 30,000 lub rau 5 xyoos ntxiv no thiab yuav siv nyiaj ntxiv txog li $2 billion los tsim kom tau tej social housing sai li 4,000 lub rau tej neeg nyob, los Kasy Chambers uas yog tus coj lub koom haum Anglicare Australia hais tias yuav tsum tsim kom tau tej vaj tse txog 25,000 lub txhua txhua xyoo rau 20 xyoo ntxiv no mas thiaj yuav muaj vaj tse txaus nyob.
Thiaj uas rau Julie Collins uas yog Australia tus nom tswj dej num vaj tse hais tias 'nws yeej kub siab nrog txhua theem nom tswv thiab tej koom haum zejzog los ua tib zoo xyuas kom tej neeg Australia tau txais cov kev pab cuam uas lawv xav tau.'
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
