Bangladesh tus qub thawj pwm tsav Sheikh Sahina raug ib lub tsev hais plaub ntawm Dhaka teem txim tuag rau nws, vim liam tias nws tau ua txhaum leej tib neeg txoj cai (Crimes against humanity).
Tos tau tsub lub txim no rau nws los twb vim yog tus qub thawj pwm tsav no raug liam tias, yog tus hais kom tej tub ceev xwm xuas phom tua tej tub kawm uas mus rwg npoj tawm tsam thiaj ntxeev nws tus tsoom fwv thiab ua rau nws poob nom. Ces nws thiaj tau khiav mus nkaum ntawm teb chaws India lawm, thiaj tseem tsis tau paub tias xyov puas yuav muaj peev xwm coj nws los rau txim.
Txawm li cas los nws yeej tsis lees tej txim txhaum no, thiab qhia tias tsis yog cov kev txiav txim raug kev raug cai vim tsis cia nws ua tib zoo hais plaub ntug tso, tsuas yog tub ceev xwm ua tej hauj lwm tsim nyog lawv ua xwb. Thiab yog ib co kev txhob txwm siv tej xwm txheej no ua ib co laj fai kum xeeb tawm tsam nws xwb.
Raws li nom tswv Meskas tej xov xwm qhia ces kwv yees tias tej tub kawm cov kev rwg npoj tawm tsam lub 7 hli ntuj xyoo 2024 dhau los no ua rau muaj tej tub kawm txog li 1,400 tus raug tub ceev xwm tua tuag, thiab muaj tej neeg txog li 25,000 tus raug mob, vim raug tej tub ceev xwm siv tej riam phom, nyob hoom kiv tshuab thiab tej drones mus tawm tsam tej neeg rwg npoj tawm tsam tsoom fwv. Lub chiv keeb tiag ces vim tej tub kawm qib siab tsis txaus siab rau tej neeg ua hauj lwm uas lawv xam tias tsuas tau txais txiaj ntsim rau tej xeeb leej xeeb ntxwv uas tau ua tsov rog daws tso lub teb chaws no 50 tawm xyoo dhau los no xwb. Ces lawv pom tias yog ib co kev faib cais ua tsis ncaj rau lawv raws li Meskas lub koom haum teeb txheeb txog kev thaj yeeb hais.
