Tsoom fwv teb chaws Australia xav kom lub koom haum Fair Work Commission nces nyiaj hauj lwm uas tej neeg tsim nyog khwv tau (minimum wages) kom sib npaug li cov kab theem nyiaj poob nqe (inflation rate) uas tam sim no nyob rau ntawm 4.1 feem pua.
Jim Chalmers uas yog tus noj tswj nyiaj txiaj rau tsoom fwv Albanese tau hais tias ''peb xav ua tib zoo xyuas kom tej neeg ua hauj lwm kwv tau nyiaj tsawg ntawm lub teb chaws no tsis txhob ua lub neej poob qab.''
Hos lub koom haum Australian Council of Trade Union (ACTU) tus coj uas yog Sally McManus hais tias kom nce cov nyiaj hauj lwm no 5 feem pua rau tej neeg ua hauj lwm. Vim thauj nyiaj poob nqe tej lagluam yeej nce nqe muag khoom kim kom tau lagluam, tab sis pheej tsis nce nyiaj hauj lwm rau tej neeg ua hauj lwm.''
Tab sis lub koom haum Australian Chamcer of Commerce and Industry (ACCI) tsuas xav kom nce tej nyiaj hauj lwm no 'tsis tshaj 2 feem pua' xwb, rau qhov tej lagluam los kuj muaj ntau yam nuj nqes siv cov los ua lagluam.
Hos Jane Hume uas yog ib tug nom ntawm lwm pab nom teb chaws (Coalition) qhia tias 'yog nce nyiaj hli ntau ces ntshe yuav ua rau muaj teeb meem nyiaj poob nqe ntau tuaj ntxiv thiab xav kom tsoom fwv Albaese kub siab nrog daws tej nyiaj poob nqe no.
Txawm li cas los Dr Jim Standford uas yog ib tug economist thiab kuj yog tus coj lub koom haum Centre for Future Work hais tias raws li nws pawg neeg tau muaj cov kev teeb txheeb lawm ces 'tsis muaj kev sib cuam tshuam dab tsi ntawm cov kev nce nyiaj hauj lwm thiab cov nyiaj poob nqe no.'
Ces thiaj li tseem tos lub koom haum Fair Work Commission mus txheeb xyuas tej ntaub ntawv uas nom tswv, tej lagluam, thiab tej koom haum sawv cev rau tej neeg ua hauj lwm xa rau nws thiab txheeb ntau yam ntawm tej lagluam tso mam los txiav txim siab tias seb yuav nce cov nyiaj minimum wages no li cas rau Australia tej neeg ua hauj lwm. Thiab thaum txiav txim siab teeb cov nyiaj no tshiab lawm ces yuav pib coj los siv txij hnub tim 1 lub 7 hli ntuj xyoo no mus.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
