Tsaib no ces tau muaj neeg Australia tau qhia tias lawv raug neeg phem dag ntau tuaj ntxiv tshaj txhua xyoo, thiab tau poob nyiaj ntau billions dollars rau tej neeg phem.
Lub koom haum Australian Competition and Consumer Commission (ACCC) thiaj hais tias tej neeg Australia uas muaj hnoob nyoog dua thiab yog cov neeg zej zog uas coj ntseeg ntau yam kab lis kev cai thiab hais ntau hom lus yog cov raug teb teeb meem no loj tshaj plaws.
Thiaj tau ua rau tej neeg uas muaj hnoob nyoog tshaj 65 xyoos raug neeg phem dag poob nyiaj ntau dua lwm pawg neeg.
Tsaib no ces tau muaj neeg Australia coob tshaj 600,000 tus raug neeg phem dag poob nyiaj txog $2.7 billion dollars.
Cov teeb meem uas neeg raug dag coob tshaj plaws ces yog cov kev dag kom nqes peev ua lagluam ib yam dab tsi, ntxiv ntawd ces yog tej neeg phem cov kev dag yus kom lawv nyiag nkag tau rau yus tej twj tej devices thiab cov kev plees nkauj nraug (tham hluas nkauj hluas nraug).
Ces Stephen Jones uas yog tus neeg ua hauj lwm pab tus nom tswj nyiaj txiaj rau tsoom fwv teb chaws thiaj hais tias tsoom fwv tseem tab tom tsim ib co code of practice thiab yuav siv los tswj tej online platforms.
Nws hais tias 'Yog lawv tsis kub siab nrog tawm tsam tej neeg ntxias dag lwm tus uas pheej dag tej neeg poob nyiaj ntau million dollars ces peb yuav hais kom them tej nyiaj tej neeg poob los yog yuav muab lawv nplua vim rau qhov lawv tsis kub siab nrog xyuas kom tej neeg siv lawv tej platforms tau txais kev nyab xeeb.'
Txawm li cas los Stephanie Tonkin uas yog tus coj lub koom haum Consumer Action Law Centre kuj hais tias tsoom fwv teb chaws tej cai uas xav thov tsim coj los siv ntawd yeej tseem tsis tau zoo txaus.
'Tus neeg pab tus nom tswj nyiaj txiaj rau tsoom fwv teb chaws yeej tsis tham dab tsi txog cov kev hais kom tej tuam txhab them nyiaj rau tej neeg raug dag li yog tias lawv siv lub tuam txhab ntawd. Vim cov kev yuav tau them tej nyiaj no rov qab rau tej customers yuav ua kom lawv kub siab los pov puag tej neeg no kom tsis txhob raug neeg phem dag,' raws li Tonkin hais.
Vim rau qhov tias teb chaws Askiv los twb tau yuam kom tej tuam txhab nyiaj yuav tsum them tej customers tej nyiaj uas raug neeg phem dag rov qab, thiab New Zealand thiab Singapore los tseem tab tom npaj yuav los ua tib yam li ntawd thiab.
Yog li ntawd lub koom haum Scamwatch thiaj hais tias tej neeg sawv daws muaj peev xwm pov puag tau yus tus kheej li tsis txhob lam tau lam qhia yus tej xov xwm ntiag tug rau lwm tus, yuav tsum txheeb kom ntxaws tias seb tej xwm txheej ntawd puas yog ib cov kev ntxias dag, thiab yog thaum yus raug dag lawm los yog poob nyiaj lawm yuav tsum tau kub siab maj ceev nrooj qhia rau yus lub tuam txhab los yog nom tswv paub.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
