Ntawm Australia no ces tej zaum koj yeej pom tias muaj peb tug chij txhos ua ke: uas yog Australia tus chij, neeg Aboriginal tus chij thiab neeg txum tim Torres Strait Islander tus chij. Neeg txum tim Aboriginal thiab Torres Strait Islander yeej yog ob co neeg sib txawv ntawm teb chaws Australia, ib co twg nyias yeej muaj nyias tej keeb kwm, tej kab lis kev cai, tej lus thiab tej chij. Yog tham rau coob leej ntau tus neeg Torres Strait islander lawm, ces tus chij yog ib lub cim muaj fwj chim qhia txog lawv lub cim thawj thiab lawv cov kev yog ib feem ntawm Australia, tsis hais lawv yog cov neeg nyob ntawm tej pov txwv, nyob ntawm Australia nrim av loj los yog nyob txawv teb chaws.
Ntsiab lus:
- Torres Strait Islander tus chij sawv cev rau lawv lub teb chaws, tej hiav txwv thiab lawv tej neeg.
- Uncle Bernard Namok Senior uas yog ib tug neeg txum tim Torres Strait Islander thiab yog ib tug artist yog tus tsim tus chij no xyoo 1992 thiab tam sim no ces yog ib tug ntawm Australia peb tug chij.
- Tus chij no muaj tsos ntsuab, xiav, dawb suav lub khawm plaub hau (dari) uas muaj ib lub hnub qub dawb tsib ceg hauv plawv qhia txog tsib lub pov txwv ntawm Torres Strait.
- Tham rau coob leej ntau tus lawm ces tus chij no yog ib lub chim qhia txog cim thawj, cov kev txaus siab zoo siab, cov kev ciaj dim, uas yeej pom thoob ntiaj teb tam sim no lawm.
- Neeg txum tim Torres Strait Islander tus chij tau tshwm sim qhov twg los?
- Neeg txum tim Torres Strait Islander tus chij sawv cev rau dab tsi?
- Cov kev tau loj hlob nrog tus chij no zoo li cas?
- Peb pom tus chij qhov twg?
- Tus choj no yog lub cim qhia txog dab tsi rau tiam neej txuas ntxiv?
Neeg txum tim Torres Strait Islander tus chij tau tshwm sim qhov twg los?
Cov pov txwv Torres Strait ces yog ib co pov txwv nyob ntu nruab nrab ntawm Cape York ntawm Queensland thiab Papua New Guinea. Tej pov txwv no yog:
- Northern Division (Boigu, Dauan, Saibbai)
- Eastern Islands (Erub, Mer, Ugar)
- Western Division (St Pauls, Kubin, Badu, Mabuiag)
- Central Division (Masig, Poruma, Warraber, Iama)
- Southern Division (Thursday, Horn, Prince of Wales, Hammond Islands, NPA thiab Mainland Australia.
Xyoo 1992 ces lub koom haum Island Coordinating Council tau tsim ib co kev sib tw rau neeg txum tim Torres Strait Islander los tsim ib tug chij rau lawv tej zejzog. Thiab
Uncle Bernard Namok uas yog ib tug artist ntawm lub pov txwv Thursday Island.
Bernard Namok Jnr uas yog Uncle Bernard tus tub yeej nco tau lub caij uas nws tab tom saib nws txiv tab tom kos daim duab chij ntawm lawv lub rooj noj mov ntawm chav ua zaub mov noj ntawm lub pov txwv Thursday Island, thiab tau tsim thiab kos cov duab no hmo ntuj coj mus sib tw.
Txawm li cas los Uncle Bernard kuj xub tau tas sim neej tom qab xaus cov kev sib tw no thiab nws tsis pom tias daim duab tus chij nws tsim ntawd tau ras los ua ib lub cim sawv cev rau nws tej neeg lawm. Bernard Jnr cov kev sib cuag nrog nws txiv no thiaj kom khaws tau zaj dab neeg ntawm tus chij no li qub, uas nws yeej tseem nco tau ntau hmo uas nws tau saib nws txiv kos daim duab tus chij no.
Neeg txum tim Torres Strait Islander tus chij sawv cev rau dab tsi?
Cov tsos (Xim) thiab tej cim tej ntsiab lus:
- Tsos ntsuab ces yog lub teb chaws.
- Tsos xiav ces yog tej dej ntawm Torres Strait.
- Tsos dub ces yog cov neeg txum tim Torres Strait Islander.
- Tus khawm plaub hau dawb (Dari) ces sawv ces rau cov neeg txum tim Torres Strait Islander tej cim thawj kab lis kev cai.
- Thiab lub hnub qub dawb tsib ceg ces yog sawv cev rau tsib koog pov txwv ntawm Torres Strait.
Tyrell Viti uas yog ib tug tub kawm neeg txum tim Aboriginal thiab Torres Strait Islander uas tau yug thiab tau loj hlob ntawm pov txwv Thursday Island, thiab tam sim no nyob ntawm Townsville ntawm xeev Queensland.
"Kuv mloog tau tias yog ib feem ntawm peb tej cim thawj kab lis kev cai. Yog ib feem tseem ceeb heev ntawm peb tej dab neeg. Thiab yog tej yam zoo heev uas pab mloog tau tias muaj cov kev sawv cev rau peb thiab. Hais tsi ntsees rau peb cov kev yog ib cov zejzog me, ces yog pom tus chij no, ces kuj qhia txog ib zaj dab neeg tias peb yog leej twg, peb yuav ua dab tsi txuas ntxiv, thiab peb yuav ua lub neej rau yav pem suab li cas, qhia txog tag nrho txhua cov kev tsis tau txais kev ncaj ncees uas tau tshwm sim dhau los thaum muaj tej neeg tuaj nam nias txeeb teb chaws tswj hwm.
"Peb tej neeg tsuas raug xam tias yog tej nroj tsuag xyoob ntoo thiab tsiaj txhu xwb, thiab tsis yog neeg. Ntawm kuv ces tus chij no yeej qhia nws tus kheej lawm tias yog sawv cev rau dab tsi. Yog tej yam ua rau kuv mloog tau tias ua rau lwm tus pom tias yus yog ib tug neeg, vim yog tej yam sawv cev rau yus cov neeg."
Cov kev tau loj hlob nrog tus chij no zoo li cas?
Both Bernard Jnr thiab Tyrell ces yeej tau loj hlob ntawm pov txwv Thursday Island kuj piv tias lub pov txwv no yog ib lub me me xwb tab sis kuj muaj tej zejzog ua neej fab fo nrog lawv tsev neeg thiab lawv tej kab lis kev cai.
Ntawm Tyrell ces tus chij no yog ib feem ntawm txoj kev ua lub neej txhua hnub.
Nws hais tias "Cov kev pom tus chij no ntawm ntau thaj chaw tsis hais hauv chav hais plaub, los yog txhua qhov chaw ntawm Australia nrim av loj, ua rau kuv pom tias lwm tus kub siab txog yus, paub tias kuv tuaj ntawm ib lub pov txwv me mus nyob rau nrim av loj. Tab sis thaum mus rau nrim av loj thiab ho pom kuv tus chij ntawm tej chav hais plaub, tej chaw xav ntawv zos, thiab pom tej neeg coj los luam rau tej khaub ncaws hnav — ua rau kuv mloog tau tias tej neeg ntawm nrim av loj yeej muaj txoj kev hlub tshua thiab hwm peb tej neeg ntawm tej pov txwv no thiab.
"Thiab ua kom tag nrho peb sawv daws mloog tias peb yog ib feem ntawm Australia, thiab peb muaj kev sib cuam tshuam thiab pab kom peb ua tau lub neej txuas ntxiv tam li yog tib lub teb chaws."
Bernard Jnr yeej tseem nco tau lub neej ua ntej yuav pom muaj tus chij no txhua qhov chaw. Thiab nws yeej tau pom tias maj mam muaj tus chij no ntawm tej pov txwv no tom qab tau muaj cov kev sib tw tsim tus chij no rau lub caij xyoo 1990, thiab tam sim no ces yeej pom tus chij no ntawm tej chaw uas tsis xav tias yuav pom tab sis kuj pom thiab.
Peb pom tus chij no qhov twg?
Tam sim no ces yeej neeg txum tim Torres Strait Islander tus chij raug coj mus txhos thoob Australia lawm. Tej zaum yus kuj yuav pom sab nraum tej teej kawm, tej tsev kawm qib siab, tej tsev tsoom fwv, tej nom tswv zos, tej tsev hais plaub uas yeej ib txwm pom txhos ua ke nrog neeg txum tim Aboriginal thiab Australia tej chij.
Ntawm Tyrell ces tej no yog ib co muaj fwj chim heev. Cov kev pom tus chij no ntawm tej chav hais plaub, tej chaw xa ntawv thiab tej ris tsho tej neeg hnav ua rau nws mloog tias raug lees paub thiab muaj feem koom.
Bernard Jnr los kuj tau pom tias tau muaj neeg coj neeg txum tim Torres Strait Islander tus chij coj mus txhos nrug deb heev ntawm nws tsev. Thaum nws tau ntoj ncig thiab nqa nws cov ntaub ntawv Carrying The Flag coj mus koom tej koom txoos txawv teb chaws ces yeej tau pom tus chij no ntawm Australia lub embassy ntawm London, Paris thiab New York.
Ib zaug twg uas Bernard Jnr pom tus chij no ces yeej ua rau nws mloog tau tias nws tau rov qab mus pom tej xwm txheej thaum nws tseem yog ib tug me nyuam yaus ntawm lub pov txwv Thursday Island.
Nws hais tias "Tsis hais kuv mus rau qhov twg li, thaum kuv pom tus chij lawm ces pheej ua rau kuv rov qab nco txog lub caij kuv tab tom loj hlob ntawm lub pov txwv thiab sawv ntawm kuv txiv xwb pwg saib nws tab tom kos daim duab tus chij no."
Tus choj no yog lub cim qhia txog dab tsi rau tiam neej txuas ntxiv?
Bernard Jnr xav kom tej me nyuam tau loj hlob paub txog tej keeb kwm ntawm neeg txum tim Torres Strait Islander tus chij no. Nws los yeej tau koom nrog Thomas Mayo sau phau ntawv hu ua 'Our Flag, Our Story' uas Tory-Jay Mordey yog tus kos duab.
Bernard Jnr tham txog qhov tseem ceeb ntawm Peb tus chij, Peb zaj dab neeg tias:
"Kuv yeej tau nyeem ntawv ntau heev ntawm tej teej kawm, hais tsi ntsees rau nyem rau lub caij Reconciliation Week thiab NAIDOC Week. Ces yeej tau muaj tag nrho tej lus tawm tswv yim ntawm tej lees kais thiab tej neeg ua hauj lwm pab lwm tus ntawm tej teej kawm thiab tej me nyuam yaus hais tias lawv nyiam nyeem phau ntawv no heev."
Tyrell hais tias "Yog tej yam zoo uas peb yog tus kub siab thiab yog tus tsim tus chij no rau peb siv, yog ib co kev txhawb siab rau peb kom ua lub neej txuas ntxiv thiab ua lub neej rau yav tom ntej, kom peb muaj kev txaus siab rau cov kev lees paub peb tej cim thawj kab lis kev cai.''
Thaum yus pom neeg txum tim Torres Strait Islander tus chij ces ua rau tab tom pom ib lub caim muaj sia ntawm lub teb chaws, tej hiav txwv thaib tej neeg tej kab lis kev cai uas tseem coj los txog tam sim no ntawm Torres Strait Islands, thoob plaws ntawm Australia thiab thoob ntiaj teb no.
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
