अर्थशास्त्रीहरूले नयाँ काम पाउने व्यक्तिहरूको सङ्ख्या ३०,००० ले घट्ने अनुमान गरे तापनि गत अक्टोबरमा करिब १७८,००० जनाले जागिर पाएका थिए।
तर रोजगारको खोजीमा रहेका मानिसहरूको सङ्ख्या पनि बढ्दा भने बेरोजगार दर ६.९ प्रतिशतबाट ७ प्रतिशतसम्म बढेको हो।
"बेरोजगारी दरलाई कम गर्नका लागि अझ धेरै काम गर्न बाँकी नै छ, तर हामी अहिले आशावादी हुन सक्छौँ।", कमनवेल्थ सेक्युरिटीका प्रमुख अर्थशास्त्री क्रेग जेम्सले भने।
"रोजगार अवसरका विज्ञापनहरूमा भएको पछिल्लो तीव्र वृद्धि पछि आउँदो समयमा धेरै भन्दा धेरै मानिसहरुले काम गर्ने छन्।"
कामको खोजिमा लागेका मानिसहरूको दर भने ६४.९ प्रतिशतबाट ६५.८ प्रतिशतमा उक्लेको हो। यो यस वर्षको मार्च महिना यताकै अधिकतम सङ्ख्या हो।
त्यस्तै, मार्चमा रोजगार रहेका मानिसहरूको तुलनामा अहिले रोजगार दर मात्र १.७ प्रतिशतले कम रहेको पनि अस्ट्रेलियाली तथ्यांक विभागले बताएको छ।
अक्टोबर महिनामा फुल-टाइम जागिरमा आवद्ध मानिसहरूको सङ्ख्या ९७,००० ले बढेको थियो भने थप ८१,८०० जना पार्ट-टाइम काम गर्न थालेका थिए।
गत जुलाईको ७.५ प्रतिशत बेरोजगार दर २२ वर्षमा पहिलो पटक देखिएको थियो। यस वर्षको अन्त्यसम्म उक्त दर ८ प्रतिशतसम्म बढ्ने ट्रेजरी र रिजर्भ बैङ्कको अनुमान छ।
A woman a a job interview Source: Getty Images
अक्टोबर महिनामा अन्य राज्यको तुलनामा बढी रहेको तास्मेनिया, क्विन्सल्याण्ड र भिक्टोरियाको बेरोजगारी दर क्रमश ८.२, ७.७ र ७.४ प्रतिशत थिए।
अहिलेका लागि धेरै भन्दा धेरै मानिसहरूलाई जागिर प्रदान गर्ने प्रथामिकता रहेको रिजर्भ बैङ्कको भनाइ छ।
बेरोजगारी दर ५ प्रतिशतको हाराहारीमा पुर्याउने लक्षलाई हासिल गर्नका लागि सन् २०२२ सम्म पर्खनु पर्ने पनि बताइएको छ।
