एक नयाँ रिपोर्टका अनुसार अस्ट्रेलिया सबैभन्दा खुसी देशहरू मध्ये १०औँ स्थानमा परेको छ, तर हामी कति खुसी छौँ भन्ने कुरामा भने पुस्तागत विभाजन छ।
संयुक्त राष्ट्रद्वारा प्रायोजित वर्ल्ड ह्याप्पिनेस रिपोर्टमा सम्मिलित १४३ देश र क्षेत्रहरूको सूचीमा नर्डिक देशहरू शीर्ष स्थानमा परेका छन्, जहाँ फिनल्याण्डले पहिलो स्थानको बाजी मारेको छ।
त्यसै गरी, अस्ट्रेलिया १० औँ स्थानमा छ भने अमेरिका (२३औँ), बेलायत (२०औँ) र न्यु जिल्यान्ड (११औँ) स्थानमा रहेको छ।
उमेर अनुसार खुसीमा देखिएको असमानताका बारेमा कुरा गर्नु पर्दा ६० वर्ष र सोभन्दा माथिका अस्ट्रेलियनहरू ९औँ स्थानमा छन् भने युवा (३० वर्ष र मुनिका) अस्ट्रेलियनहरू १९औँ स्थानमा आएका छन्।
अर्को तर्फ, नेपालको तथ्याङ्क हेर्ने हो भने, वृद्ध (६० वर्ष र माथिका) नेपालीहरू ७६ औँ स्थानमा छन् भने युवा (३० वर्ष र मुनिका) नेपाली ९२औँ स्थानमा छन् ।
दुई वर्ष अगाडी सन् २०२२ को रिपोर्टमा नेपाल ८४औँ स्थानमा थियो भने यस वर्ष नेपाल ९३औँ स्थानमा आइपुगेको छ।
तर ह्याप्पिनेस रिपोर्टमा युवा र वृद्ध बिचमा बढ्दो स्थानको अन्तर अस्ट्रेलिया र नेपाल तिर मात्र सीमित थिएन।
रिपोर्टले विश्वका ठुला राष्ट्रहरूमध्ये कुनै पनि शीर्ष १० मा सूचीकृत नभएको देखाएको छ।
केवल अस्ट्रेलिया र छैटौँ स्थानमा रहेको नेदरल्याण्ड्सको जनसङ्ख्या १.५ करोड भन्दा बढी छ।
शीर्ष २० मा पनि, केवल अमेरिका र १५औँ स्थानमा रहेको क्यानडाको जनसङ्ख्या ३ करोड भन्दा बढी छ।
बुधवार प्रकाशित उक्त रिपोर्टले विश्वभरका समान उमेर समूहबिचको खुसीको पनि तुलना गरेको थियो ।
अनुसन्धानकर्ताहरूका अनुसार, युरोप बाहेक सबै क्षेत्रमा खुसीको असमानता बढेको छ, जसलाई उनीहरूले एक "चिन्ताजनक प्रवृत्ति" भनेर वर्णन गरेका छन्।
"अमेरिका, क्यानडा, अस्ट्रेलिया र न्यु जील्याण्डमा हेर्ने हो भने सबै उमेर समूहहरूमा खुसी घटेको छ, तर विशेष गरी युवाहरूबिच यो अझै ठुलो समस्या बनेको छ। यति ठुलो कि युवाहरू अहिले सन् २०२१-२०२३ मा सबैभन्दा कम खुसी हुने उमेर समूहमा परेका छन्," रिपोर्टले जनाएको छ।
