وکٹوریا میں مفرور ملزم ڈیذی فری مین پولیس مقابلے میں ہلاک ہو گیا ہے۔ پولیس کے مطابق یہ واقعہ آج صبح ساڑھے آٹھ بجے شمال مشرقی وکٹوریا میں پیش آیا۔ ملزم پر الزام تھا کہ اس نے چھ ماہ قبل پورپنکہ میں دو پولیس اہلکاروں کو قتل کرنے کے بعد فرار اختیار کیا تھا۔واقعے میں کوئی پولیس اہلکار زخمی نہیں ہوا، جبکہ تفتیش پروفیشنل اسٹینڈرڈز کمانڈ کے تحت جاری ہے۔
آسٹریلیا میں فیول بحران کے پیش نظر نیشنل کابینہ کا اجلاس جاری ہے۔
حکام کے مطابق فی الحال ایندھن کی سپلائی معمول کے مطابق ہے اور راشن بندی زیر غور نہیں، تاہم اسٹریٹ آف ہرمز کی صورتحال کے باعث مستقبل میں قیمتوں میں اضافے کے خدشات موجود ہیں۔ ٹریژرر جم چالمرز کا کہنا ہے کہ ایندھن کی بچت کے لیے ورک فرام ہوم جیسے اقدامات پر غور کیا جا رہا ہے، جبکہ اپوزیشن کی جانب سے فیول ایکسائز میں کمی کا مطالبہ بھی سامنے آیا ہے۔
پاکستان سپر لیگ کے میچز اس وقت خالی اسٹیڈیمز میں کھیلے جا رہے ہیں، جس پر شائقین، فرنچائز مالکان اور کھلاڑیوں کی جانب سے شدید ردعمل سامنے آ رہا ہے۔ پاکستان کرکٹ بورڈ نے خطے میں جاری کشیدگی کے باعث احتیاطی تدابیر کے تحت یہ فیصلہ کیا تھا۔ تاہم مختلف فرنچائزز نے مطالبہ کیا ہے کہ محدود تعداد میں شائقین کو اسٹیڈیم آنے کی اجازت دی جائے تاکہ کرکٹ کا ماحول بحال ہو سکے۔ کئی پاکستانی کرکٹرز نے بھی سوشل میڈیا پر اپنے تحفظات کا اظہار کرتے ہوئے کہا ہے کہ شائقین کے بغیر میچز کا جوش متاثر ہوتا ہے-
