عید قرباں قریب آتے ہی ایشیا کی سب سے بڑی مویشی منڈی کراچی (پاکستان) میں سج گئی جہاں پاکستان بھر سے مختلف نسلوں کے جانور فروخت کرنے کیلیے لائے جارہے ہیں جبکہ پاکستانی آرٹسٹ احمد انور نایاب سکوں ، کرنسی نوٹ اور نوادرات کو جمع کرنے کے باعث لوگوں میں مقبول ہورہے ہیں۔
چولستانی، ساہیوال، دیسی ، برہمن ، تھری اور سبی کے بیل، کاموری، گلابی اور ٹابرے بکرے، کھارے اور دیسی دنبے جبکہ اونٹوں میں سیاہ اور سفید ، لاڑی ، کوہ مری اور ڈاچی نسل کے اونٹ کراچی (پاکستان) کی مویشی منڈی کی زینت بن چکے ہیں۔
ساہیوال کے ’کنگ آف ایشیا‘ نامی بیل کی بھی منڈی میں دھوم مچی ہوئی ہے ۔ بیوپاری حسین احمد نے بیل کا وزن 50 من سے زائد ہونے کا دعویٰ کیا ساتھ ہی بیل کی 1 کروڑ 5 لاکھ روپے قیمت بھی لگا دی۔
آرٹسٹ احمد انور کے پاس پچاس سے زائد ممالک کے سکے موجود ہیں ، ساتھ ہی کئی ممالک کے کرنسی نوٹ بھی جمع کر رکھے ہیں ، احمد انور کے مطابق یہ شوق انھیں اپنے والد کو دیکھ کر پیدا ہوا ۔
احمد انور کہتے ہیں ان کے پاس سالوں پرانے ٹکٹس، دہائیوں پرانے کیمرے اور نایاب کتابوں کا خزانہ موجود ہے یہاں تک کہ انھوں نے اپنے گھر میں اتنی کتابیں جمع کرلی ہیں کہ ان کے پاس سونے کی جگہ کم پڑ رہی ہے۔
ایس بی ایس اردو کیلیے یہ رپورٹ پاکستان سے احسان خان نے پیش کی۔
