نوجوانوں کے بینڈ خود غرض نے سات گانوں پر مشتمل اپنا پہلا میوزک البم ’’ہم خود غرض‘‘کیا جاری کیا پاکستان اور بھارت میں میں اس کی دھوم ہی مچ گئی۔
خود غرض بینڈ کے نوجوان گلوکاروں نے ایس بی ایس اردو سے خصوصی گفتگو کی اورہمارے ساتھ اس منفرد ، شاندار اور دلچسپی سے بھرپور سفر کے بارے میں خوشگوار یادیں تازہ کیں۔
بینڈ کے ووکل آرٹسٹ اوسید صدیقی بتاتے ہیں کہ ہمارا یہ خوبصورت سفر کورونا وبا کے دوران ایک چائے کے ہوٹل سے شروع ہوا، ہمیں اندازہ نہیں تھا کہ ہم اتنے مشہور ہوجائیں گے، ڈھائی سال میش اپس اور کور سونگز کیے، جس پر پاکستان سمیت پڑوسی ممالک کے فینز کا ردعمل بڑا شاندار رہا ۔
جب ہم نے ان سے پوچھا کہ آپ نے میوزک بینڈ کا نام ’’خود غرض‘‘ کیوں رکھا ؟ تو اسجد خان نے اس کا کچھ یوں جواب دیا ، اسجد خان کے مطابق خود غرض میوزک بینڈ کے کئی نام رکھے ، لیکن جو بھی نام رکھتے تو ویساہی نام پہلے کسی نہ کسی نے رکھا ہوتا تھا، ایک دن اچانک یہ فیصلہ کیا کہ اپنے میوزک بینڈ کا نام خود غرض رکھیں گے، پہلے اس نام کے مقصد معلوم نہیں تھا تاہم اب اس کا اب مقصد مل گیا کہ جس انداز کا میوزک ہم کرتے ہیں تو وہ دوسروں سے کافی منفرد ہے۔
خود غرض بینڈ کے رکن فرخ صدیقی کے مطابق پورے پاکستان میں بے شمار کنسرٹ میں پرفارم کر چکے ہیں ، لیکن اس کے باوجود سوشل میڈیا پر فینز کو لگتا ہے کہ ہمارا تعلق بھارت سے ہے، فرخ صدیقی کہتے ہیں بھارت میں ہماری فین فالونگ بہت زیادہ ہے، بھارت میں چاہنے والوں نے متعدد درخواست کیں کہ یہاں آکر بھی پرفارم کریں لیکن ان لوگوں کو بتایا کہ ہمارے درمیان کچھ رکاوٹیں موجود ہیں، امید ہے جلد بھارت میں بھی اپنی آواز کا جادو جگائیں گے۔
شایان اسلم ماضی کو یاد کرتے ہوئے بتاتے ہیں کہ کس طرح محلے والے ان کی جیمنگ سے تنگ ہوتے تھے لیکن ایک وقت آیا کہ ان ہی محلے والوں نے ہمیں سراہنا شروع کردیا۔
خود غرض بینڈ میں پیانو بجانے کی ذمہ داری سنبھالنے والے احسن خان نے ایس بی ایس سے گفتگو کرتے ہوئے جذباتی اندار میں بتایا کہ البم کی ریلیز اور فینز کی محبت ایک خواب لگتا تھا لیکن آج یہ سب حقیقت میں بدل چکا ہے۔
_________
ڈیوائیسز پر انسٹال کیجئے
پوڈکاسٹ کو سننے کے لئے نیچے دئے اپنے پسندیدہ پوڈ کاسٹ پلیٹ فارم سے سنئے:
