Key Points
- عوامی مسلم لیگ کے سربراہ شیخ رشید احمد گرفتار
- غیر شرعی نکاح کیس، عمران خان اور بشرہ بی بی پر فرد جرم عائد
- سیاسی گہما گہمی، تحریک انصاف میں اختلافات پھوٹ پڑے
- ججز کیخلاف سوشل میڈیا مہم پر ایکشن کا فیصلہ
پاکستان نے ایران کی جانب سے بلوچستان میں پاکستان کی فضائی حدود کی خلاف ورزی کی بھرپور مذمت کی ہے۔ پاکستانی دفتر خارجہ کی جانب سے جاری بیان میں کہا گیا ہے کہ ایرانی حملے کے نتیجے میں دو معصوم بچے شہید اور تین بچیاں زخمی ہوئیں ہیں۔ ترجمان دفتر خارجہ ممتاز زہرہ بلوچ نے کہ ہے کہ پاکستان کی خودمختاری کی یہ خلاف ورزی کسی بھی طرح قابل قبول نہیں، اس خلاف ورزی کے انتہائی سنگین نتائج برآمد ہوسکتے ہیں، ترجمان کی جانب سے کہا گیا کہ زیادہ افسوس کی بات یہ ہے کہ پاکستان اور ایران کے درمیان رابطہ کے متعدد زرائع کی موجودگی کے باجود یہ غیر قانونی قدم اٹھایا گیا۔
پاکستان کی جانب سے ایرانی وزارت خارجہ میں پہلے ہی متعلقہ سینیئر حکام کے ساتھ شدید احتجاج ریکارڈ کروا دیا گیا ہے، اس کے علاوہ ایرانی ناظم۔الامور پاکستان کی خودمختاری کی سرحدی خلاف ورزی پر کے شدید رد عمل سے آگاہ کرنے کے لئے دفتر خارجہ میں طلب کیا گیا اور واضح طور پر بتا دیا گیا ہے کہ اس عمل کے نتائج کی تمام تر زمہ داری ایران پر عائد ہوگی۔
عوامی مسلم لیگ کے سربراہ و سابق وزیر داخلہ شیخ رشید احمد کو 9 مئی مقدمے میں ضمانت خارج ہونے پر عدالت کے باہر سے گرفتار کرلیا گیا۔ راولپنڈی پولیس نے شیخ رشید احمد کو گرفتار کرکے تھانے منتقل کردیا۔ شیخ رشید احمد حساس ادارے کے دفتر میں جلاؤ گھیراو کے مقدمے میں نامزد تھے۔ گرفتاری کے وقت میڈیا سے گفتگو میں شیخ رشید نے کہا کہ خدا کو گواہ بنا کر کہتا ہوں کہ 9 مئی کے واقعات میں ملوث نہیں ہوں۔ انہوں نے کہا کہ 8 فروری کو راولپنڈی کے دونوں حلقوں میں قلم دوات کی فتح ہوگی۔ دوسری جانب جی ایچ کیو حملہ کیس میں شیخ رشید کی ضمانت ہو گئی۔
Pakistani Railways Minister Sheikh Rasheed Ahmad smokes a cigar as he speaks to the media to announce the suspension of Samjhota Express train operations between India and Pakistan. Source: AFP / AAMIR QURESHI/AFP via Getty Images
غیر شرعی نکاح کے کیس میں سابق وزیراعظم و سابق چیئرمین تحریک انصاف عمران خان پر فرد جرم عائد کردی گئی ہے۔ سینئر سول جج قدرت اللہ نے اڈیالہ جیل میں کیس کی سماعت کی۔ جس میں سابق وزیراعظم عمران خان اور ان کی اہلیہ بشریٰ بی بی اور وکلاء کمرہ عدالت میں موجود تھے۔ عدالت میں فرد جرم پڑھ کر سنائی گئی تو ملزمان نےصحت جرم سے انکار کر دیا۔ اس دوران عمران خان نے جج سے مکالمہ کرتے ہوئے کہا کہ چھ سال کے بعد خاور مانیکا کو یاد آیا کہ نکاح غیر شرعی تھا۔ اس دوران بشریٰ بی بی کی غیر موجودگی پر عدالت نے برہمی کا اظہار کیا۔
جیل انتظامیہ نے بتایا کہ بشریٰ بی بی 11:30 پر داخل ہوئیں اور 1:45 پر عدالت سے چلی گئیں ۔ عدالت کے استفسار پر وکیل نے بتایا کہ بشریٰ بی بی کی طبیعت ناساز ہوگئی تھی اس لیے وہ واپس چلی گئیں۔ وکلاء صفائی کی جانب سے بشریٰ بی بی کی استثنیٰ کی درخواست منظور کرنے کی استدعا کی گئی۔ تاہم عدالت نے بشریٰ بی بی کی حاضری سے استثنیٰ کی درخواست خارج کر دی۔ اڈیالہ جیل میں میڈیا کے نمائندوں سے غیر رسمی گفتگو کرتے ہوئے سابق وزیراعظم عمران خان نے کہا کہ چیف جسٹس سے کہنا چاہتا ہوں کہ نفرت اتنی بھی نہ کرو کے عدل بھی نہ کرسکو۔ عدلیہ پر اب میرا اعتماد ختم ہو چکا ہے۔ لندن پلان کے تحت رول آف لا کو روندا جارہا ہے۔ ہماری ساری پارٹی کو ختم کردیا گیا۔ انہوں نے کہا کہ 9 مئی کی سی سی ٹی وی فوٹیجز چوری کی گئیں۔
Imran Khan, former Prime Minister and head of political party Pakistan Tehrik-e-Insaf, talks with journalists at Shaukat Khanum hospital where he was admitted after suffering a gunshot wound the day before near Wazirabad, in Lahore, Pakistan, 04 November 2022. Source: EPA / RAHAT DAR/EPA
الیکشن کمیشن نے 8 فروری کو ہونے والے عام انتخابات کے لیے بیلٹ پیپرز کی چھپائی کے لیے کوائف پرنٹنگ کارپوریشن کو بھیج دیے ہیں۔ بڑی تعداد میں امیدواروں نے انتخابی نشان کی تبدیلی کیلئے عدالتوں سے رجوع کیا ہے۔پشاو ہائیکورٹ نے پی ٹی آئی رہنما تیمور سلیم جھگڑا کی انتخابی نشان کےخلاف درخواست منظور کرتے ہوئے الیکشن کمیشن کو انہیں ٹریفک سگنل کا نشان جاری کرنے کا حکم دے دیا۔ پشاور ہائیکورٹ نے ہی تحریک انصاف کے رہنماوں شہریار آفریدی ، آفتاب عالم اور دیگر کی انتخابی نشانوں سے متعلق درخواست خارج کردی۔الیکشن کمیشن نے شہریار آفریدی کو بوتل ، آصف خان کو گاڑی ،آفتاب عالم کو بینگن اور شفیع اللہ کو گوبھی کا انتخابی نشان الاٹ کیا تھا۔ الیکشن کمیشن کو تشویش ہے کہ اگر عدالتوں کی جانب سے انتخابی نشانات تبدیل کرنے کے احکامات دیئے تو انتخابات میں تاخیر ہوسکتی ہے۔
8 فروری کے انتخابات قریب آتے ہی ملک میں سیاسی گہماگہمی عروج پر پہنچ گئی ہے۔ سیاسی جماعتوں کی جانب سے عوامی رابطہ مہم جاری ہے۔ ورکرز کو متحرک کرنے کیلئے جلسے جلوس اور ریلیوں کا انعقاد کیا جارہا ہے۔ پارٹی ٹکٹوں کی تقسیم کے معاملے پر تحریک انصاف اختلافات کا شکار ہوگئی ہے۔پارٹی رہنماوں کیساتھ اختلافات کے باعث پی ٹی آئی کے سینئر نائب صدر شیر افضل مروت نے سندھ میں الیکشن مہم اچانک ختم کرنے کا اعلان کردیا۔
A security personnel stands guard at the headquarters of Election Commission of Pakistan in Islamabad on September 21, 2023. Source: AFP / AAMIR QURESHI/AFP via Getty Images
پیپلزپارٹی کی جانب سے شہید بے نظیر بھٹو کی چھوٹی صاحبزادی آصفہ بھٹو نے بھی انتخابی میدان میں انٹری ڈالی ہے۔ آصفہ بھٹو نے کراچی میں ریلی نکالی اور کارکنان کا لہو گرمایا۔ چیئرمین پیپلزپارٹی بلاول بھٹو زرداری نے کہا ہے کہ ایک شخص کو اگر چوتھی بار مسلط کیا گیا تو عوام نقصان اٹھائیں گے۔انتخابی جلسے سے خطاب کرتے ہوئے انہوں نے کہا کہ ملک میں نفرت اور تقسیم کی سیاست کی جارہی ہے جس کا ملک کو نقصان ہوگا۔ مسلم لیگ ن کی رہنما مریم نواز نے لاہور میں ریلی نکالی جہاں کارکنوں کی جانب سے ان کا شاندار استقال کیا گیا۔ کارکنوں سے خطاب میں مریم نواز نے کہا کہ 8 فروری کو شیر دھاڑے گا۔ مخالفین نے جو منصوبے بند کردیئے تھے الیکشن جیتنے کے بعد دوبارہ شروع کریں گے۔ ایم کیو ایم کے رہنما مصطفی کمال نے کہا ہے کہ پیپلزپارٹی نے سندھ کو محرومیوں کے سوا کچھ نہیں دیا۔
Latif Khosa Source: AFP / AAMIR QURESHI/AFP via Getty Images
ادھر سپریم کورٹ بار کے صدر شہزاد شوکت نے کہا ہے کہ ملک میں ججز کے خلاف مہم جوئی کی بدقسمت روایت چل پڑی ہے، فیصلے پر تنقید کرنے کے بجائے ججز کو نشانہ بنایا جارہا ہے۔اسلام آباد میں پاکستان بار کونسل کے رہنماؤں کے ہمراہ پریس کانفرنس کرتے ہوئے صدر سپریم کورٹ بار شہزاد شوکت نے کہا کہ مرضی کے خلاف فیصلہ آنے پرعدلیہ کو ٹارگٹ کیا جاتا ہے، عدلیہ کے خلاف مہم قابل مذمت ہے، اداروں اور ججز پر تنقید کرنے کی روش کو روکنا ہوگا۔
دوسری جانب حکومت پاکستان نے سپریم کورٹ کے ججز کیخلاف سوشل میڈیا پر گمراہ کن مہم چلانے والوں کیخلاف کاروائی کیلئے جی آئی ٹی تکشیل دے دی ہے۔ وزارت داخلہ کے نوٹیفکیشن کے مطابق ایڈیشنل ڈی جی ایف آئی اے سائبر کرائم ونگ جے آئی ٹی کےکنوینر ہوں گے، اس کے علاوہ آئی بی ، آئی ایس آئی کے نمائندے اور ڈی آئی جی اسلام آباد پولیس جے آئی ٹی میں شامل ہوں گے جبکہ پی ٹی اے کا نمائندہ بھی شامل ہوگا۔ نوٹیفکیشن کے مطابق جے آئی ٹی پندرہ دن میں رپورٹ دے گی اور ججر کیخلاف مہم چلانے والوں کو کہٹرے میں لانے کے ساتھ ساتھ مستقبل میں ایسے واقعات کی روک تھام کیلئے سفارشات دے گی ۔
(رپورٹ: اصغرحیات)
