Sussan Ley uas yog tus coj ntawm lwm pab nom Liberals hais tias tsoom fwv koom tswj tsab cai tswj cov dej num tsiv teb tsaws chaw yuav ''cuam tshuam txog ntau yam txog tej ntawv Askiv thiab tej values'', rau lub caij uas tej nom ntawm pab nom Nationals uas ua hauj lwm ua ke qhia tias xav kom xeem cov values test rau cov neeg thov visa tuaj nyob ib ntus uas tuaj ntawm lwm cheeb tsam hauv ntiaj teb no tuaj, kom thiaj li ua tau raws li Australia tej kev coj taug ua zoo.
Pab nom koom tswj tej cai yeej xav txo kom muaj tej neeg tsiv teb tsaws chaw tuaj tsawg zog.
Lub caij Ms Ley nrog tej neeg nthuav xov xwm tham ntawm Tasmania ces nws kuj tau qhia tias tej zaum yuav ''xeem ntawv thiab xeem cov values test".
"Yus tsis tas tos ntev, thiab yeej yuav qhia txog tej ntsib cai no kom meej, hais tsi ntsees rau ntau yam cuam tshuam txog tej ntawv Askiv thiab tej cai coj taug ua zoo."
Cov kev xeem cov values test rau tej neeg 'tuaj ntawm cheeb tsam tuaj uas muaj teeb meem ntau yam hauv ntiaj teb'
Thaum tseem ntxov ces David Littleproud uas yog tus coj pab nom Nationals raug nug tias seb nws xav li cas txog lub tswv yim uas yuav siv cov kev xeem values test rau tej neeg thov visa tuaj nyob ib ntus ntawm Australia thaum nws raug interview nrog ABC's cov Insiders program.
Nws tau hais tias cov values test yog ib co yuav qhia txog seb ib tug twg ''totaub zoo npaum li cas txog tej txiaj ntsim thiab tej kev coj taug ua zoo ntawm cov kev ua ib tug pej xeem" thiab ''tej ntsib lus tseem ceeb ntawm cov kev ywj pheej".
Littleproud tau hais tias ''Kuv xav tias yuav tsis muaj teeb meem dab tsi,"
"Kuv xav tias ntshe yuav rau kev phom sij rau neeg Australia thiab peb tsis muaj peev xwm yuav coj tej kev ntxub ntxaug ntawm qee cheeb tsam ntawm sab ntuj tuaj rau peb lub teb chaws.
"Thiaj yog tej yam tseem ceeb uas peb yuav tau ua tib zoo xyuas kom thaum peb coj tej neeg ntawm tej chaw ntau cheeb tsam uas tseem muaj ntau yam teeb meem hauv ntiaj teb tuaj no, kom lawv nkag siab tias lawv cov kev tuaj ntawm no muaj lub luag hauj lwm dab tsi, thiab yog ib lub luag hauj lwm uas yuav tsum ua raws li peb cov kev coj taug ua zoo thiab tej ntsiab cai uas peb lub teb chaws vam meej no tau tsim."
Tej neeg uas thov tej visa uas nyob ib ntus los sis nyob ruaj yuav tsum pom zoo nrog Australia tej sob lus coj taug ua zoo thiab yog ib feem ntawm lawv cov kev thov tej visa no siv. Uas teev txog neeg ntiag tug tej kev ywj pheej, kev ywj pheej rau kev ntseeg, cov kev yoog thiab ua raws cai, thiab kev vaj huam sib luag. Hos tej neeg uas xav thov nyob ruaj ces tseem muaj qee yam ntxiv thiab xws li yuav tsum kub siab tiag tiag los kawm kom paub siv lus thiab ntawv Askiv.
Cov kev ua tib zoo txheeb cov kev xeem ntawv Askiv kom ntxaws ntxaws
Dua ntawm tej tau hais dhau los ntawd lawm los, Jonno Duniam uas yog ib tug uas tsim pab nom koom tswj tej cai, thiab yog tus kis ntawm lwm pab nom teb chaws lub tuam chav home affairs los kuj tau hais tias tej zaum kuj yuav teev ib cov kev sim tshiab ntxiv rau thiab.
Nws tau qhia rau lub chaw nthuav xov xwm News Corp tias "Peb tab tom txheeb tias seb yuav ua li cas kom thiaj muaj peev xwm txheeb tau zoo tshaj plaws tias ib tug neeg twg yeej kub siab tiag tiag txog peb lub teb chaws ... thiab yeej muaj ntau txoj xub ke ua tau tej ntawd, tej zaum kuj tsim ib co lus zoj khi rau ib hom visa twg uas yog ib yam ntawm ntau yam uas peb yuav tau txheeb txog, los sis peb yuav rov qab txheeb peb cov kev xeem ua pej xeem dua."
Tsis tas li ntawd los kuj muaj xov xwm cej luam tias tej zaum yuav xyuas kom tej tug kawm pej kum haiv paub ntawv Askiv zoo tshaj qub ntxiv thiab yog tias pab nom koom tswj yeej cov kev xaiv tsa tsoom fwv teb chaws tshiab tom ntej no.
Duniam tau hais tias "Kuv xav tias peb yuav tsum xyuas kom ua tau tej no thiab kho peb cov kev xeem ntawv Askiv kom siv tau zoo tshaj qub ntxiv."
Ms Ley kuj tseem tsis tau qhia kom meej txog Duniam tej ncauj lus no thaum nws raug lub chaw nthuav xov xwm Sky News nug, tab sis yeej qhia tias nws yuav qhia txog nws pab nom no tej cai ua ntej yuav xaus xyoo laus.
Greens ib tug nom kis xeev siab (Senator) hais tias lub tswv yim values test yuav txhawb nqa kom muaj kev faib cai ntxub ntxaug tsis nyiam ib tsav neeg twg los sis yuav tsis tau txais kev vaj huam sib luag:
Mehreen Faruqi uas yog ib tug nom kis xeev siab (Senator) tau tib cov kev xav thov los siv cov kev txeem values test tias ''yog ib tsab xo muaj ntsiab lus zais uas yuav ua rau ib co neeg twg tsis raug kub sib los yog ua rau lwm tus ntau nqe tsis zoo rau lawv."
Nws tau hais tias "Yus tsis muaj peev xwm hais tias tej neeg tsiv teb tsaws chaws yog ib co teeb meem thiab txawm yuav nqua hu kom tsim ib co values test coj los xeem lawv thiab ntaus nqes tsis zoo rau lawv dua ntawm lawv yog neeg tsiv teb tsaws chaws xwb."
"Tej no yog tej uas tab tom txhawb nqa kom haj yam muaj cov kev faib cais ntxub ntxaug lwm tsav neeg ntau tuaj ntxiv ntawm lub tebchaws no."
Thiaj ua rau pab nom koom tswj (Coalition) raug tib thaum tseem ntxov xyoo no tom qab uas Jacinta Nampijinpa Price uas yog ib tug nom kis xeev siab ntawm xeev Northern Territory tau hais ib co lus tawm tswv yim.
Ley tau hais tias "Kuv cov kev tib txog tus tsoom fwv no tsab cai tswj cov dej num tsiv teb tsaws chaw ... tsis yog ib cov kev tib ib co neeg tsiv teb tsaws chaw twg los yog ib co neeg zejzog tsiv teb tsaws chaw twg,"
"Pom tias tej tsoom fwv los yeej tsis muaj peev xwm yuav tsim tau tej hauv paus txhim kho uas peb tej zejzog xav tau siv, thiab lawv yeej muaj kev txhawj xeeb heev txog tej ntawd."
Koj muaj peev xwm saib tau Dr Lucky Vang DO piv txog cov kev siv tus da Vinci robotic surgery system seb yuav siv li cas los phais mob tau ntawm qhov link no: https://fb.watch/DXq4zSKGis/
Share
