Ntsiab lus:
- Tau muaj ib co kev tshuaj ntsuam qhia tias Australia tej hluas muaj nqe ntau yam siv thiab ntsib teeb meem ntau yam ntawm lawv lub neej ua hauj lwm..
- Tej kws teeb txheeb hais tias ntau phaum neeg tam sim no yeej nplua nuj tshaj qub ntxiv tab sis yeej tseem yuav ntsib teeb meem nyuaj ntau yam ua rau lawv tsis muaj peev xwm yuav ua tau lub neej raws li qhov tsim nyog ua thaum lawv so tsis ua hauj lwm lawm.
Raws li tau muaj ib co kev teeb txheeb tshiab qhia ces tej hluas neeg Australia yeej ua tau lub neej tib yam li lawv niam lawv txiv phaum neeg, tab sis ntshe yuav muaj ntau yam nqe siv thaum tseem ntxov ntawm lawv lub neej ua hauj lwm.
Raws li tau muaj ib co kev tshuaj ntsuam ntawm lub koom haum E61 Institute uas yog lub koom haum teeb txheeb NGO tau txheeb tau tias tej hluas neeg Australia yuav khwv tau nyiaj ntau tshaj lawv niam lawv txiv txawm tias muaj kev txhawj xeeb tias tsam tsis muaj peev xwm yuav tsev nyob, tseem khwv tau nyiaj hauj lwm li qub thiab muaj ntau yam nqe siv ua lub neej.
Tej kws sau tsab ntawv tshuaj ntsuam no cav tias txawm tias tej hluas yuav ntsib tej xwm txheej lagluam tsis zoo uas khwv tsis tau nyiaj zoo los yog tau hauj lwm ruaj ua dua ntau phaum neeg dhau los, los txog thaum lawv so tsis ua hauj lwm ces lawv yuav nplua nuj dua.
Txawm li cas los ntshe yeej yuav muaj ib txhia hlua ua hauj uas ntshe yuav tsis tshua tau txais kev ruaj ntseg rau sab nyiaj txiaj siv piv rau lawv niam lawv txiv, thiab thaum uas tej laus tso lawv tej qub txeeg qub teg rau tej hluas ces ntshe haj yam ua rau muaj cov kev tsis tau txais kev vaj huam sib luag ntawm tej cuab yig uas txhom nyem dua thiab nplua nuj dua tuaj ntxiv thiab.
Tej xov xwm txheeb tau los qhia txog dab tsi?
E61' tsab ntawv cej luam tau txheeb tau tias tej nyiaj khwv tau thiab tsoom fwv cov kev pab cuam rau ntau pab pawg neeg hnoob nyoog sib txawv ntawm lawv lub neej ua hauj lwm tag lawv ib sim neej ces yuav tau nyiaj ntau tshaj phem neeg dhau los.
Tsab ntawv cej luam no tau muab tej hlua ua hauj lwm tej nyiaj khwv tau coj los piv nrog rau ntau phaum neeg dhau los tej nyiaj uas lawv khwv tau ntau caum xyoo dhau los.
Ces lub koom haum no tau txheeb tau tias tej nyiaj khwv tau xyoo 2023 xam raws theem nrab ntawm ib tug neeg hnoob nyoog 35 xyoos ces khwv tau txog li ntawm $90,000 — uas khwv tau yuav laug txog 80 feem pua ntau dua piv rau tej neeg hnoob nyoog 35 xyoos tib yam rau yav lig lub caij xyoo 1980s — txawm li cas los pom tias Australia tej hluas khwv tau nyiaj tsawg thaum xub thawj thiab tom qab tuaj mam li khwv tau nyiaj ntau ntxiv.
Ces yog xam raws li tej xov xwm tshiab uas teev txog tej cuab yig neeg hnoob nyoog 35 xyoos cov kev nplua nuj ces lawv yeej khwv tau txog li ntawm $380,000, uas yeej khwv tau tib yam li ntau phaum neeg ua ntej dhau los uas muaj hnoob nyoog tib yam, ''tab sis Australia tej hluas yuav tsev lig dua thiab muaj nyiaj super ntau dua vim lawv ua hauj lwm ntev dua."
Tej hluas neeg Australia ces muaj ntau yam nqe yuav tau siv thaum tseem ntxov ntawm lawv cov kev ua hauj lwm, piv txwv li tej nuj nqe nyiaj qev kawm qib siab HECS-HELP (HECS) los yog lwm yam nuj nqe uas tsab ntawv cej luam no tau piav tias tias yog ''tej nqe ntau yam''.
Ua ke no los Australia tej laus neeg hais tsi ntsees rau tej neeg uas yuav tau tsev (them tag lawm) yog cov uas tau txais kev ruaj ntseg rau nyiaj txiaj siv dua rau thaum lawv so tsis ua hauj lwm lawm.
Pib qeeb dua
Angela Jackson ces yog ib tug economist ntawm lub koom haum Productivity Commission, uas yog tsoom fwv Australia lub koom haum ywj pheej uas sab laj tawm tswv yim txog lagluam.
Nws tau hais tias Australia ces yog lub teb chaws uas tej neeg yeej muaj peev xwm khwv tau nyiaj ntau ntxiv tuaj, txhais tias tej neeg feem coob uas muaj peev xwm khwv tau nyiaj zoo yeej tsis cuam tshuam dab tsi txog tias seb lawv niam lawv txiv cov kev khwv tau nyiaj los yog lawv lub meej mom dab tsi.
Txawm tias tej neeg feem coob yeej tsis rau teev nrog tej neeg nplua nuj tshaj plaws los yog txom nyem tshaj plaws, los kuj pom tias yeej muaj cib fim ''tau txais kev vaj huam sib luag raws li qhov hauj sim'' tib yam li ntau phaum neeg dhau los thiab, tab sis tej hluas ua hauj lwm yeej pib ua hauj lwm lig zog ntawm lawv lub neej.
Nws tau qhia rau SBS News tias ''Muaj neeg coob ntxiv tuaj tab tom mus kawm qib siab thiab siv sij hawm ntev zog mus kawm, thiab tej zaum kuj tsuas ua hauj lwm casual rau lub caij ntawd xwb.''
"Ces lawv thiaj siv sij hawm mus kawm kom lawv ras los ua cov neeg muaj txuj ci paub ua hauj lwm, tab sis zoo li lawv yeej khwv tsis tau nyiaj ntau tuaj ntxiv kom sai li.''
Jackson tau qhia ntxiv tias tej hlua ua hauj lwm khwv tau nyiaj tsawg los yeej pom tias tsuas khwv tau nyiaj li qub xwb vim tau muaj tej tub kawm pej kum haiv thiab neeg tsiv teb chaws chaw sib tw nrog lawv ntau tuaj ntxiv.
Thiab txawm tias lawv yuav khwv tau nyiaj ntau dua lawv niam lawv txiv, tam sim no tej neeg ua hauj lwm hluas tseem tsis tshua tau txais kev ruaj ntseg rau nyiaj txiaj dua thiab yuav tau ntiav tsev nyob ntev dua thiab raws li nws tau tshab txhais.
Txawm li cas los cov kev kawm ntev dua yeej tau txais txiaj ntsim zoo rau lawv lub neej ua hauj lwm thiab raws li lub koom haum E61 hais, thiab pab kom lawv khwv tau nyiaj ntau tuaj ntxiv sai dua thiab thaum kawg ces ras los ua cov neeg khwv tau nyiaj ntau lawm.
Muaj tej peev txheej pab kom lawv nplua nuj rau yav lig ntawm lawv lub neej
E61 tsab ntawv cej luam kuj tau txheeb tau ntxiv thiab tias Australia tej laus neeg yeej tau txais txiaj ntsim los ntawm ''cov kev tau them se tsawg los yog tau them se me ntsis rau lub caij tej nqe tsev tau nce kim tuaj ntxiv los yog tej peev txheej muaj nqe tuaj ntxiv'', ces thiaj pab kom lawv nplua nuj rau yav lig ntawm lawv lub neej.
Txawm li cas los cov kev nplua nuj feem ntau yeej cuam tshuam txog tej nyiaj uas tsuas tau hauv ntaub ntawv xwb (tsis yog nyiaj tuav ntawm tes tiag) li yim neeg ntawd lub tsev, thiab dua ntawv ntxiv ces tej laus neeg uas yuav tsev thiab them tag lawm ces yeej tsis muag lawv tej tsev thiab.
Tej nyiaj tsam uas khwv tau rau Australia tej laus neeg no feem ntau yeej khaws cia xwb tsis siv, txhais tias yuav raug coj mus faib ua khoom plig tsis sib npaug rau ntau phaum hluas.
Jackson tau hais tias tej no thiaj yuav ua rau tsis tau txais vaj huam sib luag rau tej nyiaj txiaj ntawm tej neeg muaj thiab tej neeg txom nyem uas tau txais tej qub txeeg qub teg no.
Nws tau hais tias "Yeej muaj ntau yam tsis paub tseeb xyov yuav zoo li cas cuam tshuam rau tej nyiaj uas yuav tau ntawm lawv niam lawv txiv tam li yog ib co kev faib tej peev txheeb qub txeeg qub teg no ... tej hluas yeej xav kom lawv ua tus tswj tau lawv lub neej pem suab kheej, uas tej zaum kuj yuav tsis muaj peev xwm pab kom lawv ua tau lub neej raws li qhov tsim nyog peb xav kom lawv ua."
Puas yog thaum tej hluas so tsis ua hauj lwm lawm yuav ua tau lub neej zoo dua?
Ib feem tseem ceeb ntawm Australia tej kev nplua nuj ces yog cov nyiaj superannuation (super).
Tam sim no ces tej tswv lagluam yuav tsum tau them cov nyiaj Superannuation Guarantee 12 feem pua (Per cent) ntawm tej nyiaj yus khwv tau kiab tam sim no txij tim 01/07/2026 no mus lawm.
Jackson tau hais tias tej nyiaj superannuation yog ib co tseem ceeb rau lub caij so tsis ua hauj lwm, tab sis cov kev muaj peev xwm ua tau lub neej xws teb xws chaw tsis nco txhawj yog cuam tshuam txog cov kev yuav tau ib lub tsev rau yus nyob ntau dua.
Nws tau hais tias ''Tsuas yog ntshe yus ho yuav tau thiab them tsev tag lawm xwb, tsis li ntawd ces yuav muaj kev cuam tshuam txog tej kev ruaj ntseg rau nyiaj txiaj siv thiab ntau yam thaum so tsis ua hauj lwm lawm."
Lub koom haum E61 tau hais tias peb los kuj tseem tab tom ntsib teeb meem lagluam nyuaj ntau yam ntev ntxiv thiab, piv txwv li tej lagluam loj hlob ib nyuag qeeb zog thiab kuj muaj tej pej xeem muaj hnoob nyoog laus zuj zus tuaj ntxiv lawm.
Tej kws teeb txheeb thiaj ceeb toom tias Australia cov fiscal system (tej cai tswj lagluam kom sau se tau nyiaj txiaj coj los pab txhim kho teb chaws, pab lagluam thiab muaj hauj lwm ua) yog cov uas ''raug tsim kom tej lagluam loj hlob tshaj tej uas peb muaj tam sim no,'' ces thiaj yuav ua rau ntau phaum neeg yav pem suab raug tsub nias kom them se rau ntau cov kev pab cuam ntev txuas ntxiv rau yav tom ntej los sis yuav ua rau haiv neeg no tiv nuj nqe ntau ntxiv.
Tsab ntawv cej luam no kuj tau qhia tias tsoom fwv yuav taum tau los kho tej lagluam kom daws tau cov kev tsis tau txais vaj huam sib luag li kho tej capital gain taxes los yog hloov cov se GST (Good and Services Tax).
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
