Raws li tau muaj ib tsab ntawv cej luam tshiab qhia ces muaj tej chaw kho mob (Medical clinics) ntau tuaj ntxiv tig los siv cov fully bulk billing ntau tshaj ib xyoos dhau los lawm, tab sis kuj tab tom ua rau tej neeg mob yuav tau rho lawv tej nyiaj ntiag tug ntau tuaj ntxiv coj mus pab them tej nqe kho mob thiab.
Hnub zwj Hli (Monday, 12 Jan 2026) dhau los ces lub koom haum Cleanbill tau coj nws cov kev teeb txheeb nrog tej chaw kho mob (clinics) tshaj 6,800 thoob teb chaws no uas tau coj los qhia ces txheeb tau tias nyob rau lub caij ib xyoos tau muaj tej clinics uas siv bulk billing kho txhua yam mob ntawd ntau tuaj ntxiv yuav laug txog li ob npaug, uas tau muaj cov feem pua nce ntawm 20.7 mus ua 40.2 feem pua lawm.
Cov kev teeb txheeb uas tau muaj txij tim 1 lub 11 hlis ntuj txog lub 12 hlis ntuj nrab xyoo 2025, thiab tsoom fwv teb chaws los yeej tsis pom zoo nrog tej uas tau txheeb tau no, tsis tas li ntawd los kuj tseem txheeb tau ntxiv thiab tias tej neeg mob uas tsis tau sov cov kev kho mob siv bulk billing ntawd tau ua rau lawv yuav tau rho lawv tej nyiaj ntiag tug mus siv ntau tuaj ntxiv.
Tej zauv no ho qhia txog dab tsi?
Lub koom haum Cleanbill cej luam tias muaj tej clinics tshaj 1,000 lub tau hloov ntawm cov kev kho mob ntiav thiab kho mob ntiav xyaw nrog cov kev siv bulk billing tig mus siv cov kev kho mob txhua yam uas siv bulk billing rau xyoo 2025 lawm xwb.
Raws li tsab ntawv cej luam no qhia ces cov kev yuav mus siv ib lub clinics ntawm tej clinics uas tsis siv cov bulk-billing yuav laug txog li 60 feem pua haj yam kim tshaj qub ntxiv. Tej nyiaj uas tej neeg mob yuav tau them thaum mus siv ib yam kev kho mob twg ces tau nce kim tuaj ntawm $43.38 mus ua $49.23 rau ib lub xyoo lawm.
Tsab ntawv cej luam no tau los teev txog cov nqe kho mob uas siv bulk billing rau ib tug neeg mob tshiab hnoob nyoog tshaj 18 xyoo uas tsis tau cov concession siv uas tau mus kho mob li tej sij hawm ib txwm kho ces mam coj los faib rau tag nrho tej clinics uas muaj rau ntawm ib thaj chaw twg.
Cleanbill thiaj tau sib cuag nrog thiab nug tej clinics thiab khaws tej xov xwm no tias seb lawv ho puas muaj cov bulk billing rau tej neeg mob no siv.
Mark Butler uas yog Australia tus nom tswj dej num noj qab haus huv tau hais tias ''ib co xov xwm tsi ntsees twg" ntawm tsab ntawd cej luam no ''yog tej xov xwm uas xyov puas yuav ntseeg siab tau rau thiab."
Nws tau xa ib co ncauj lug rau SBS New hnub zwj Hli (Monday) sawv ntxov tias "Yog tham txog tej clinics ces lawv twb tsis suav tej clinics uas tsis tau teb tej lus nug ntau yam ntxiv rau thiab,"
Yeej tau muaj tej feem pua ntawm cov clinics uas siv bulk billing kho txhua yam mob yeej tau muaj ntau tuaj ntxiv yuav laug txog ob npaug mus ua tshaj li 40 feem pua thoob plaws teb chaws no lawm, ces Cleanbill tsab ntawv cej luam no thiaj qhia tias tseem muaj cov feem pua no tshaj 50 feem pua ntawm NSW thiab NT lawm. Source: SBS
Neeg Australia yuav tau them tej nqe kho mob kim tshaj plaws ntawm tej chaw twg?
Raws li tsab ntawv cej luam no qhia ces Australia lub xeev me tshaj plaws thiaj muaj pej xeem tshaj tshaj plaws yog lub uas tej neeg yuav tau them tej nqe kho mob kim tshaj plaws yog tias lawv yog cov neeg kho mob hnoob nyoog 18 xyoo rov sauv uas tsis tau cov concessions siv.
Tasmania yog lub xeev uas tej neeg mob yuav tau them tej nqe kho mob kim tshaj plaws txog li $60.76 xyoo 2026, txuas ntxiv ntawd ces yog lub xeev Australian Capital Territory (ACT) thiab Northern Territory (NT).
NSW, Victoria, Queensland thiab South Australia (SA) ces yog tag nrho tej xeev uas tej zaum yuav ntau dua los yog tsawg dua tej nqe uas tej neeg ntiag tug yuav pab them xam raws tus nqe nrab $49.23 ntawm haiv neeg no. Hos xeev Western Australia (WA) ces yog lub xeev uas tau them tej nqe kho mob no pheej yig tshaj plaws txog li $46.63.
Tasmania yog lub xeev uas tej neeg mob them tej nqe kho mob kim tshaj plaws txog $60.76, txuas ntxiv ntawd ces yog lub xeev ACT thiab NT. Source: SBS
Tsoom fwv tej xov xwm kuj qhia tias txij tim 1 lub 11 hlis ntuj ces tau muaj tej chaw kho mob ntau tshaj 3,200 lub uas tam sim no tau siv bulk billing kho txhua yam mob lawm. Uas yeej muaj tej chaw kho mob no yuav laug txog li 1,200 lub yog cov uas xub tau kho mob ntiav xyaw nrog cov kev siv bulk billing ua ke.
Butler tau hais tias "Tam sim no ces twb muaj tej chaw kho mob ze txog li 7,500 lub raug teev zwm nrog MyMedicare lawm. Thiab yeej tau muaj tej chaw kho mob no ntau tuaj ntxiv ntau kawg nkaus li lawm txij li hnub tim 1 lub 11 hlis ntuj xyoo 2025 los. Txog xyoo 2030 ces yuav muaj tej chaw kho mob ntau tuaj ntxiv thoob plaws teb chaws no yuav laug txog li 4,800 lawm thiab."
Lub koom haum sawv cev rau tej kws kws kho mob (Royal Australian College of GPs - RACGP) tau hais tias cov kev muaj cov bulk billing siv raws li Cleanbill tsab ntawv cej luam thiab tsoom fwv teb chaws tej xov xwm yog tej ''xov zoo", tab sis kuj hais ntxiv tias tej nqe kho mob uas yuav tau them kim tuaj ntxiv no kuj tsis yog tej yam ua rau sawv daws ceeb.
Dr Michael Wright uas yog lub koom haum RACGP tus president tau hais tias "Tej Medicare data yeej qhia tias tej neeg mob muaj peev xwm mus siv tau tej chaw kho mob yam tsis tau them dab tsi. Txawm li cas los lub koom haum RACGP tsab ntawv cej luam teeb txheeb txog haiv neeg no txoj kev noj qab haus huv (Health of the Nation report) qhia tias yeej muaj tej neeg mob mus sab laj txog cov kev kho mob uas sib chab sib chaw thiab siv lub sij hawm ntev dua ntau tuaj ntxiv lawm,"
"Tib lub tsam thawj no los zoo li yeej thov tsis tau tej Medicare rebates kom duav tej nqe kho mob rau tej neeg mob coob heev li. Thiaj tsis yog tej yam ua rau peb ceeb dab tsi uas pom tias tej neeg mob tab tom them nqe kho mob kim tuaj ntxiv uas tsoom fwv tej nyiaj pab kho mob tshiab no yeej tsis duav tej nqe uas tsim cov kev kho mob zoo siv li."
Wright tau hais tias tau siv tej chaw kho mob ntawm tej zos toj siab zoo tuaj ntxiv lawm, tab sis kuj tau ceeb toom tias cov kev tsis muaj peev xwm them tej nqe kho mob no kuj tseem yog ib cov teeb meem nyuaj rau tej neeg mob uas yuav tau kho mob ntev zog thiab, hais tsi ntsees rau tej neeg mob uas muaj tej mob sib chab sib chaws dua los yog tej neeg mob uas muaj teeb meem nyuaj siab ntxhov plawv.
Nws tau hais tias tsim nyog pab cov nyiaj Medicare coj los pab rau cov kev teem caij kho mob txuas ntxiv rau tej neeg mob kom zoo tshaj qub ntxiv kom tej neeg mob thiaj tsis plam txiaj ntsim.
Cov bulk billing scheme yog dab tsi?
Tsoom fwv teb chaws yeej tau xyuas kom siv tau cov bilk billing no nthuav dav rau tag nrho txhua tus neeg Australia thiab tau them 12.5 feem pua rau cov Medicare rebates rau tej chaw kho mob (Clinics) coj los txhawb nqa kom tag nrho tej neeg mob muaj cai siv bulk bill, ces mam li muaj cov nyiaj no faib rau tej chaw kho mob thiab tej kws kho mob coj los txhawb nqa kom tej neeg mob siv tau cov kev kho mob thiab txhawb nqa kom tej chaw kho mob tig los tsim cov kev kho txhua yam mob uas siv cov bulk billing.
Tsoom fwv teb chaws yeej tau hais lawm tias nws tej cai no yuav pab kom txog rau xyoo 2030 ces yuav muaj tej chaw kho mob txog li 3 npaug (txog li ntawm 4,800 lub chaw kho mob) tig los siv bulk billing kho txhua yam mob..
Txhais tias tej nqe kho mob ntwam tej chaw kho mob ntawm tej nroog uas siv cov bulk bill uas Medicare pab them ntawd yuav tau them yuav laug txog li ntawm ob feem peb ntawm tus nqe kho mob kim tuaj ntxiv — ntawm $42.85 mus them $69.56 lawm.
Hos tej nqe kho mob ntawm tej zos cheeb tsam tuaj ntug nroog los sis tej zos yaj sab ces yuav tau them kim tuaj ntxiv yuav laug txog ob npaub uas nce ntawm $42.85 mus ua $84.86, tsuas nyob ntawm seb tej neeg nyob rau thaj chaw twg.
Lub caij uas tau coj tsab cai no los qhia rau zej tsoom tsaib no, ces Danielle McMullen uas yog tus coj ntawm lub koom haum Australian Medical Association (AMA) tau hais tias yuav muaj kev pauv hloov rau tej nqe kho mob uas tej neeg mob tsis tau them rau ntau thaj chaw ntawm lub teb chaws no.
Txawm li cas los yuav tsis muaj kev pauv hloov dab tsi rau qee thaj chaw thiab.
McMullen tau hais rau lub caij ntawd tias "Kuv cia siab tias yuav pab tej zejzog tuaj ntug nroog thiab tej zejzog toj siab thiab peb tej chaw txom nyem, uas tej chaw kho mob yeej ua tib zoo xyuas npaum li qhov lawv muaj peev xwm ua tau kom tej nqe kho mob tsis txhob kim."
Share
