Ntsiab lus tseem ceeb:
- Heatwaves ces yog lub caij thaum muaj tej huab cua kub sov heev thaum nruab hnub thiab hmo ntuj ntawm ib thaj chaw twg tshaj 3 hnub los yog ntev tshaj ntawd.
- Australia thawj cov kev cej luam uas txheeb txog tej kev phom sij ntawm tej huab cua (National Climate Risk Assessment) tau qhia tias lub ntuj kub sov tuaj ntxiv, yuav ua rau muaj tej heatwaves ntau tuaj ntxiv thiab muaj ceem tshaj qub ntxiv.
- Ntawm Australia no ces tej huab cua kub sov ntau hnub sib law liag rau ib lub caij twg (heatwaves) tau ua rau tej neeg tas sim neej coob tshaj lwm cov xwm txheej ntuj tsim kev puas tsuaj, hais tsi ntsees rau cov kev raug kev phom sij rau tej laus, tej neeg muaj ntau yam mob nkeeg, tej me nyuam tseem yau thiab tej poj niam muaj me nyuam.
- Heatwave yog dab tsi?
- Vim li cas tej heatwaves thiaj phom sij?
- Vim li cas tej huab cua kub sov ntau hnub sib law liag (heatwaves) thiaj yuav tsim tau kev phom sij tsi ntsees rau tej poj niam muaj me nyuam?
- Tsim nyog peb npaj li cas tos cov xwm txheej huab cua kub sov (heatwave) no?
- Tsim nyog peb ua dab tsi kom thiaj ntxeem dhau tej huab cua kub sov (heatwave)?
- Yuav tsim tej vaj tse zoo li cas kom thiaj txo tau tej teeb meem kub sov tsawg zog?
- Kuv muaj peev xwm nrhiav tau xov xwm ntxaws ntxiv txog tej huab cua kub sov ntau hnub sib law liag (heatwaves) qhov twg?
Heatwave yog dab tsi?
Heatwaves ces yog lub caij thaum uas muaj tej huab cua kub sov heev rau thaum nruab hnub thiab hmo ntuj ntawm ib thaj chaw twg ntev tshaj peb hnub los yog kub sov rau cov hnub ntev tshaj ntawd.
Lub koom haum Australian Climate Service nyuam qhuav tau coj Australia thawj cov kev cej luam txheeb txog haiv neeg no cov kev phom sij los ntawm tej huab cua (National Climate Risk Assessment) uas tau qhia txog qhov tseem ceeb tias lub ntuj no sov tuaj ntxiv, thiab tab tom muaj kev pauv hloov rau tej xwm txheej ntsuj tsim kev puas tsuaj.
Tej xwm txheej huab cua kub sov li tej huab cua kub sov nrub hnub hmo ntuj ntau hnub thiaj yuav ras los ua ib co xwm txheej muaj ntau zuj zus tuaj ntxiv thiab muaj ceem tshaj qub ntxiv, uas yuav ua rau muaj teeb meem rau zej tsoom, rau tej lagluam thiab rau tej ib puag ncig.
Thiab kuj yuav yog tej yam nyuaj rau tej hauv paus txhim kho li tej vaj tse, tej chaw ua hauj lwm cov kev nrog xyuas kom tej chaw no txias rau lub caij muaj tej xwm txheej huab cua kub sov no, ces thiaj yog ib lub caij nyuaj rau tej neeg thiab yuav raug kev phom sij ua rau peb tsis tau txais kev noj qab haus huv.
Zeskais (Professor) Ollie Jay uas yog tus coj tej neeg txawj txeeg txuj rau cov hauj lwm huab cua kub sov ntawm lub chaw teeb txheeb txog huav cua kub sov thiab kev noj qab haus huv (Heat and Health Research Centre) tshab txhais tias ''Tau lub sij hawm tshaj li 20 tawm xyoo los no peb kuj pom tias tau muaj tej xwm txheej huab cua kub sov ntau hnub sib law liag ntau tuaj ntxiv lawm. Pom tias tau muaj lub caij huab cua kub sov li no ntev zog tuaj ntxiv thiab ua ke no los zoo li kuj muaj tej xwm txheej no muaj ceem tshaj qub ntxiv lawm thiab."
Daim duab qhia txog ib hnub uas sov heev ntawm Sydney. Credit: Hans / PIxabay
Vim li cas tej heatwaves thiaj phom sij?
Tos tej heatwaves phom sij los vim muaj ntau yam cuam tshuam ua rau kub sov, thiab ua rau muaj teeb meem rau peb lub cev kub sov tuaj ntxiv.
Professor Jay thiaj hais tias "muaj ntau yam ua rau peb lub cev kub sov tuaj ntxiv tsis hais tej chaw ib puag ncig peb, tej kev kub kev sov uas ntsuas tau ntawm tej duab ntxoov ntxoo, tej kev sov vaum, tssi hais yus raug sab hnub ncaj qha los tsis raug li, thiab seb ho muaj tej cua hlob npaum li cas nrog ntxiv. Ces tej huab cua kub sov no thiaj ua rau yus lub cev kub sov tuaj ntxiv."
Thaum yus lub cev ntsib tej xwm txheej no ces ua rau lub cev cov temperature nce siab tuaj ntxiv, ces tej zaum thiaj yuav ua rau yus lub cev kub dhau heev lawm thiab yuav muaj ib co yam ntxwv mob rau yus lub cev thiab tej khoom nruab nrog cev uas tej zaum kuj yuav raug kev phom sij loj tau.
Zeskais Jay tshab txhais tias "Tab sis tsis yog cov heat stroke (cov xwm txheej huab cua kub sov ua rau lub cev kub heev ces ua rau ib tug twg ua npaws thiab tsis nco qab) ua rau tej neeg raug coj mus kho mob ntawm tej tsev kho mob los yog tas sim neej rau lub caij huab cua kub sov. Qhov peb pom ces yog ua rau tej neeg yuav ntsib teeb meem puas tsuaj loj ua rau lawv mob plawv thiab hlab plawv ntau tuaj ntxiv."
Tej neeg mob plawv yog cov yuav raug kev phom sij loj dua vim yuav ua rau tej zaum lawv tej plawv txhaws xa tsis tau ntshav yug lub cev rau lub caij huab cua kub sov, vim yus lub cev pheej qhia kom xav ntshav mus pab tej tawv nqaij kom yus lub cev txias (kom tsis txhob sov) dua ntawm qhov yuav xa ntshav mus yug yus lub cev. Ces thiaj ua rau lub plawv yuav tau ua hauj lwm hnyav heev.Professor Ollie Jay
Professor Jay hais tias tib lub caij no los peb tej cev yeej tawm hw ntau heev pab kom peb lub cev tsis txhob kub thiaj yuav pab kom peb lub cev txias.
Nws hais tias "Ces tej no thiaj yuav ua rau peb lub cev muaj dej tsis txaus ua ntuv zus, ces thiaj yuav ua rau peb lub cev kub tshaj 40 degree Celsius lawm, tab sis ua ke no los kuj tseem haj yam yuav ua rau muaj teeb meem muaj ceem tshaj qub ntxiv rau tej neeg uas muaj tej mob plawv thiab hlab plawv ntxiv thiab."
Tej laus neeg yog cov lub cev yuav kub sov heev rau lub caij muaj tej xwm txheej huab cua kub sov nruab hnub hmo ntuj ntau hnub sib law liag ntau dua vim lawv tej cev muaj peev xwm tawm tau hw tsawg dua.
Ntawm Australia no ces tej xwm txheej huab cua kub sov ntau hnub (heatwaves) no yeej tau ua rau tej neeg tas sim neej ntau dua lwm cov xwm txheej ntuj tsim kev puas tsuaj.
Dr Michelle Hamrosi uas yog ib tug kws kho mob hais tias "cov xwm xwm txheej huab cua kub sov nruab hnub hmo ntuj ntau hnub sib law liag no yog ib co ua rau tej neeg tas sim neej yam ntsiag to, vim ua rau muaj teeb meem rau peb tej cev thiab haj yam ua rau muaj teeb meem phem tshaj qub ntxiv rau tej neeg uas twb muaj tej mob nkeeg uas mob los tau ntev lawm,"
"Tsis tas li ntawd los peb yeej paub tias tej heatwaves no tau ua rau tej neeg nyuaj siab thiab. Pom tias yeej muaj tej neeg raug coj mus kho ntawm tej tsev kho mob ntau tuaj ntxiv rau lub caij huab cua kub sov, thiab ua rau tej neeg pheej khwv tswv yim tua tus kheej ntau tuaj ntxiv thiab pheem tsim kev kub ntxhov ntau tuaj ntxiv."
Professor Ollie Jay yog tus coj tej neeg txawj txeeg txuj ntawm lub chaw teeb txheeb txog tej huab cua kub sov thiab kev noj qab haus huv (Heat and Health Research Centre) ntawm tsev kawm qib siab University of Sydney – image: University of Sydney. Credit: Joseph Byford Photography
Vim li cas tej huab cua kub sov ntau hnub sib law liag (heatwaves) thiaj yuav tsim tau kev phom sij tsi ntsees rau tej poj niam muaj me nyuam?
Dr Hamrosi tshab txhais tias cov huab cua kub sov ntau hnub (heatwaves) no los kuj yuav ua rau muaj teeb meem rau tej poj niam muaj me nyuam thiab.
Nws hais tias "Yog tias koj lub cev kub dhau heev lawm ces kuj yuav ua rau tsis tau txais kev noj qab haus huv rau tus me nyuam thiab. Thiab tseem yuav ua rau yus lub cev tsis muaj dej txaus, thiab ua rau ntshav siab thiab yuav ua rau yus mob plab yuav yug me nyuam ntxov dua thiab."
Rebecca DeMarco los yeej ntsib tej xwm txheej huav cua kub sov ntau hnub uas tau ua rau muaj teeb meem rau nws tsis tau txais kev noj qab haus huv rau lub caij thaum nws muaj nws peb tug me nyuam thiab.
Rebecca hais tias "Yeej ua rau kuv xoo pob liab tsheej thaj, ua rau kuv tau dej tsawg zujzus rau kuv lub cev sai heev, txog rau theem uas twb yuav ua rau kuv lub cev kub dhau heev lawm uas yuav ua rau muaj teeb meem rau kuv lub cev ob peb zaug lawm. Vim kuv yog tus neeg pheej nyiam nyob nraum zoov ua ub ua no, ces thiaj haj yam ua rau kuv muaj tej yam ntxwv no muaj ceem tshaj qub ntxiv thiab."
"Thiab yog tham txog kuv tus me ab yug tshiab ntawd los yeej ntsib tej xwm txheej ntau yam muaj ntsis sib xws li no, li pheej sawv pob tsheej thaj vim lub cev kub sov heev, thiab tsis tau dej txaus yug lub cev, tsis tas li ntawd los pheej ua rau yus txhawj tias yuav tau los tswj tej xwm txheej no thiab."
Rebecca thiaj hais tias qhov tseem ceeb tshaj plaws uas yuav muaj peev xwm ntxeem kom dhau tej xwm txheej huab cua kub sov thaum yus muaj me nyuam ces yog yuav tsum paub txog tias yuav muaj tej xwm txheej huab cua zoo li cas thiab yuav tau xub npaj tos ua ntej.
Dr Michelle Hamrosi uas yog ib tug kws kho mob. Credit: Dr Michelle Hamrosi.
Tsim nyog peb npaj li cas tos cov xwm txheej huab cua kub sov (heatwave) no?
Yog xav npaj tos tsam ho muaj cov xwm txheej huab cua kub sov ntau hnub ntau hmo ces yog tej yam tseem ceeb yuav taum tau npaj ib co tswv yim tseg tias yuav ua li cas.
Dr Hamrosi tshab txhais tias "Kom yus txheeb seb qhov chaw twg ntawm yus lub tsev txias tshaj plaws? Yus puas muaj peev xwm tsim kom tau ib qho chaw txias nyob? Tej zaum kuj yog ib chav tsev twg uas muaj cua txias siv. Thiab kom xav tias yog yus tsis muaj cua txuas siv ntawm yus lub tsev ne, yus yuav tsim nyog mus nyob qhov twg? Tsis hais nrog yus ib tug neeg txheeb ze nyob ntawm lawv lub tsev los sis yus tus phooj ywg lub tsev, lub tsev saib ntawv ntawd yus zos, tej kiab khw, los yog tej chaw nkaum kom tsis txhob kub sov,"
"Tej zaum kuj yuav tsis tau hluav taws xob siv rau lub caij huab cua kub sov heev thiab, yog li ntawd thiaj yog tej yam tseem ceeb heev uas yuav tau npaj txog qhov no thiab. Muaj ntau yam yus muaj peev xwm ua tau li ntim ib co fwj dej tsau khov cia ntawm lub tub tsau khov, los yog npaj ib co taub txuag dej kom muaj cov hws dej txias rau yus, thiab ua tib zoo xyuas kom muaj zaub mob noj thiab tej tshuaj noj ntawm tej tub tsau txias."
Kom qhib yus tej qhov rais yog tias muaj tej cua txias sab nraum zoov, thiab muab kaw yog tias huab cua kub sov sab nraum zoov dua hauv tsev.
Tej zaum cov kev da dej txias kuj yog ib txoj xub ke zoo pab koj tsis txhob sov yus rau lub caij huab cua kub sov nruab hnub hmo ntuj ntau hnub thiab - image: PublicDomainPictures / Pixabay.
Tsim nyog peb ua dab tsi kom thiaj ntxeem dhau tej huab cua kub sov (heatwave)?
Lub caij thaum muaj tej huab cua kub sov nruab hnub hmo ntuj ntau hnub sib law liag ntawd ces xav kom yus npaj tias ib hnub twg ntawd yuav ua dab tsi kom thiaj tsis txhob kub sov yus.
Dr Hamrosi hais tias "Thawj yam kuv ua ntawm kuv tsev ces, thaum sawv ntxov kuv kaws tej ntaub npog qhov rais thoob plaws kuv lub tsev thiab tso kev cua rau. Kuv cua kuj yog tej yam pab kom txias thiab hais tsi ntsees yog tias yus muab phuam/ntaub ntub so/hnav qhwv rau yus tej tawv nqaij thiab zaum ze kiv cua tshuab yus,"
"Thiab yog tias yus tso cua txias (Air conditioner) ces kom tso 26 degrees thiaj pab yus txuag tau nqe hluav taws xob ua ke no los kuj pab kom tsis txhob sov sov yus thiab. Tsis tas li ntawd los kom haus dej ntau tas mus li ntawm ib hnub ntawd thiab."
Professor Jay tshab txhais tias cov kev siv tej kev cua dai ntawm tej qab nthab kuj yuav tau txais txiaj ntsim rau yus thiab, tab sis tsuas pab tej me ntsis xwb thiab.
"Tej zaum tej kiv cua kuaj yuav ua rau yus lub cev kub heev tuaj ntxiv thiab, haj yam ua rau muaj teeb meem phem tshaj qub ntxiv rau yus, thaum uas tej cua sov tshaj 40 degrees Celsius lawm ... Ces thiaj xav kom tsuas siv tej kiv cua dai saum qab nthab thaum huab cua qes dua 40 degrees Celsius xwb, tab sis yog kub tshaj 40 lawm ces tsis txhob taws siv zoo dua."
Tej kiv cua dai saum qab nthab tsuas pab tau yus rau lub caij huab cua kub sov ntau hnub nruab hnub hmo ntuj uas tej huab cua qed dua 40 degrees Celsius xwb. Credit: Image eak_kkk / Pixabay.
"Yus puas muaj peev xwm lug tsis txhob tawm mus rau nraum zoo rau lub caij uas ntshav ntuj kub tshaj plaws ntawm ib hnub ntawd? Vim lub caij ntawd yog lub caij yuav ua rau yus raug teeb meem. Yog tias yus ho teem caij mus kho mob, ces seb ho puas muaj peev xwm hloov mus siv cov telehealth kom yus thiaj tsis txhob tau tawm mus rau lub caij uas sov heev ntawm ib hnub ntawd."
Kom yus nrog nco txheeb xyuas cov yim neeg nyob ze yus thiab tej laus neeg txheeb ze thiab. Yog tias yus los yog ib tug twg ho tsis xis nyob li mob taub hau, kiv taub hau, nkees nkees tsis muaj zog, nqaij tu lu leeg caus yaum, ces yuav tau nrhiav tej xub ke los pab kom yus lub cev txias.
"Yog poob rau tej xwm txheej uas muaj ib tug twg zoo li pheej tsis zoo rov qab los sai raws li qhov tsim nyog los sis zoo li lawv tej yam ntxwv mob haj ywm phem zujzus tuaj ntxiv lawm xwb, ces xav taw qhia kom kav tsij hu rau yus tej kws kho mob los yog hu rau Health Direct (1800 022 222) los yog hu rau Emergency Service (Triple Zero - 000) yog tias yuav raug kev phom sij rau koj txoj sia. Piv txwv li muaj tej yam ntxwv mob sab tshaj qub ntxiv li tus neeg ntawd feeb tsis meej lawm, los yog tsis nco qab lawm, los sis mob hauv siab ib yam dab tsi, los yog lub cev kub heev, ces xav taw qhia kom hu tsheb thauj neeg mob tuaj pab."
Hos yog tej mes ab (me nyuam mos liab) lawm, ces yog tej yam tseem ceeb uas xav kom muab tej ris tsho nyias nyias rau lawv hnav xwb, tsis txhob hnav ntau txheej, txawm yog tej ntaub nappy qhwv quav thiab zis los tej zaum yeej yuav ua rau tus me nyuam ntawd kub sov heev tau thiab.
Tej me nyuam uas hnoob nyoog qes dua 6 hli ntawd ces kom nquag pib niam mis rau noj tas mus li los yog pub mis raj rau noj tas mus li kom tej me nyuam thiaj tau dej txaus rau lawv lub cev. Yog tias ho muaj hnoob nyoog tshaj 6 hli lawm ces yeej muaj peev xwm muab me ntsis dej rhaub uas txias lawm rau lawv haus kom xwm yeem kom tsis txhob sov lawv, li tej dib liab los yog txiv pos nphuab (strawberries).
Thiab lwm yam tseem ceeb heev ces kom nco ntsoov tsis txhob cia yus tej me nyuam nyob hauv tseb, txawm tso tib pliag rau lub caij huab cua kub sov heev ntawd xwb los kom tsis txhob cia lawv nyob hauv tsheb hlo li. Vim rau qhov yuav ua rau kub sai heev rau tus tej me nyuam mos liab.Dr Hamrosi
Professor Jays taw qhia tias yog tias yus yuav tsum tau tawm mus nraum zoov ces xav kom yus tsum nrhiav tej chaw uas muaj duab ntxoov ntxoos nkaum kom ntau npaum li ntau tau.
Nws hais tias "Yog tej yam tseem ceeb heev kom tej neeg nco ntsoov tias tej huab cua peb pom ntawm tej chaw kev yees thiab ntsuam huab cua ntawd yog cov huab cua uas ntsuas tau ntawm tej duab ntxoov ntxoo. Yog tias koj tseem raug duab tshav ntuj ziab ncaj qha thiab ces haj yam ua rau yuav kub tshaj tus zauv huab cuab tau kwv yees tseg ntawd tshaj li 15 txog 17 degrees Cilsius lawm. Yog li ntawd thiaj tseem ceeb heev uas xav kom yus nrhiav tej chaw muaj duab ntxoov ntxoos nkaum."
Yuav tsim tej vaj tse zoo li cas kom thiaj txo tau tej teeb meem kub sov tsawg zog?
Kuj muaj qee cov qaum tsim tsev uas muaj peev xwm yuav pab kom yus lub tsev tsis txhob kub sov heev rau lub caij muaj tej huab cua kub heev rau thaum nruab hnub hmo ntuj uas kub sib law liag ntau hnub ntawd thiab.
Professor Jay hais tias "Yog tias yus ho muaj tej qhov rais uas muaj ob peb txheej iav ntawm yus lub tsev, ces tej zaum kuj thaiv tau kom yus lub tsev tsis txhob sov heev sab heev tsev thiab,"
"Tsis tas li ntawd los yog yus nruab tej ntaub thaiv tej qhov rais kom tsis txhob muaj tej sab hnub ncaj qha hla yus tej qhov rais los rau yus lub tsev ces kuj yuav pab tau thiab. Los sis yus kuj xav seb ho muaj tej xub ke twg yuav pab kom xiab tau tej rwb saum yus lub ruv tsev kom yus lub tsev tsis txhob sov sov heev thiab."
Ob tug me nyuam tub ua si ntawm ib lub phiab da dej loj ntawm xub ntiag tsev. Source: iStockphoto / davidf/Getty Images/iStockphoto
Kuv muaj peev xwm nrhiav tau xov xwm ntxaws ntxiv txog tej huab cua kub sov ntau hnub sib law liag (heatwaves) qhov twg?
Ntiaj teb lub kom haum tswj dej num noj qab haus huv lub vas sab (World Health Organization (WHO) website) yeej muaj tej xov xwm tseem ceeb ntau yam qhia txog tej xwm txheej huab cua kub sov nruab hnub hmo ntuj ntau hnub sib law liag thiab yeej muaj cov kev taw qhia tias yuav ua li cas kom yus tau txais kev noj qab haus huv rau lub caij huab cua kub sov.
Tsis tas li ntawd los yus yeej muaj peev xwm mus txheeb tau tej nom tswv xeev tej tuam chav tswj dej num noj qab haus huv ntawm teb chaws Australia no tej vas sab - piv txwv li New South Wales (NSW) lub tuam chav tswj dej num noj qab haus huv lub vas sab hu ua ‘Beat the heat’.
Professor Jay thiab nws pab neeg los kuj tau tsim ib co twj hu ua HeatWatch tool uas sawv daws muaj peev xwm siv tau dawb hauv online kom tej neeg muaj peev xwm los tsim ib co tswv yim txheeb tias seb ib tug twg puas yuav qaug duab tshav ntuj vim huab cua kub heev.
Professor Jay tshab txhais tias "Yus yeej muaj peev xwm qhia seb yus muaj hnoob nyoog li cas, yus puas muaj tej mob uas mob los tau ntev lawm, seb yus puas muaj cua txias siv. Thiab yeej paub tias seb yus nyob lub zos twg postcode dab tsi, uas yeej muaj tej xov xwm huab cua qhia rau yus paub thiab,"
"Ces nws mam li qhia tias seb yus tau cov zauv teev tias huab cua yuav kub sov npaum li cas rau yus. Tej no pab kom yus nkag siab tias puas yuav muaj teeb meem phom sij li cas rau yus thawm hnub ntawd, tsis tas li ntawd los yeej tseem kwv yees tias tej huab cua 7 hnub ntxiv ntawd yuav zoo li cas thiab. Tsis tas li ntawd los peb kuj siv tej xov xwm no coj los ua ib co pov thawj taw qhia rau tej neeg ntiag tug tias yuav ua li cas pab kom tsis txhob sov yus, thiab siv coj los pab tej neeg npaj tias seb lawv yuav ua dab tsi ntau yam ntawm ib hnub ntawd li cas thiab."
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
