Lub koom haum Fair Work Commision tau txiav txim siab nce Australia cov nyiaj award wages txog li 3.75 feem pua rau Australia tej neeg ua hauj lwm txog li ntawm 2.6 millions tus txij hnub tim 1 lub 7 hli ntuj xyoo 2024 no mus.
Lub koom haum no hais tias tos nws nces tej nyiaj hauj lwm no los twb vim yog muaj tej nuj nqes siv ua lub neej ntau yam, muaj cov kev kwv yees tias lagluam loj hlob thiab tseem muaj tej xwm txheej nyiaj poob nqe.
Lub koom haum no hais tias cov kev nce nyiaj hauj lwm rau tej neeg no yuav tsis ua rau muaj teeb meem rau tej kab theem nyiaj poob nqe ntxiv.
Lub koom haum sawv cev rau Australia lagluam (The Australian Chamber of Commerce and Industry) yeej tsuas xav kom nce tej nyiaj hauj lwm no li 2 feem pua xwb, tab sis lub koom haum Australian Council of Trade Union (ACTU) yeej xav kom nce 5 feem pua thiab tsoom fwv los yeej xav kom nce tej nyiaj hauj lwm no raws li tej kab theem nyiaj poob nqe uas tam sim no nyob rau ntawm 4.1 feem pua.
Tej lagluam hais tias yuav daws tau tej teeb meem ntau yam nqe siv ua lub neej thiab ua lagluam no ces yog los tswj kom tej kab theem nyiaj poob nqe nyob rau theem li 2 txog 3 feem pua li txhab nyiaj faj seeb haiv (Reserve Bank of Australia-RBA) hais.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
