Cov khoom plig centenary medal no ces yog tej khoom plig uas tsoom fwv Australia muab rau tej neeg Australia tau ib yam dab tsi pab rau tej zejzog, thiab tsoom fwv rau lub caij txwm 100 xyoo (2001).
Vue Thaow qhia tias nws kuj muaj hmoo uas yog ib tug ntawm 200 tus neeg Australia uas tau cov khoom plig no rau nws cov kev ua hauj lwm pab sab laj tawm tswv yim pab Tasmania lub tuam chav Multicultural Affairs tas li yog ib tug tub koom siab ntawm lub koom haum Tasmanian Advisory Council on Multicultural Affairs.
Nws hais tias cov khoom plig no tos nws tau los vim tej hauj lwm nws ua pab rau Tasmania lub tuam chav Multicultural Affairs li tau sab laj kom cia tej coj ntawm ntau cov pawg ntseeg ua kev cai ib hnub rau lawv tej zejzog tom qab tau muaj tej xwm txheej neeg phem tua neeg tuag coob ntawm Port Arthur.
Txuas ntxiv ntawd los nws cov kev kub siab sib ntsib sib cuag nrog nom tswv thiab cov kev nrhiav xub ke los tos kom tau Hmoob (~ 85 yim) tuaj nyob Tasmania (Australia) li nrog nom tswv Australia tham, tsim tsa lub koom haum Hmong Australia Society thiab tsim tsa lub koom haum sawv cev rau ntau tsav neeg ntawm cheeb tsam teb chaws Asia kuj muaj feem ua rau nws tau cov khoom plig no.
Yog peb ua dab tsis mas tsis txhob npaj tias xav ua kom kuv tau yam ub yam no. Yog koj npaj li ntawd ces feem coob feem ntau yuav tsis tau, rau qhov tias tsis yog tias yus xav tau ces txawm tau, txawv cov kev kawm ntaub kawm ntawv uas yog yus keej ces yus kawm tau, cov khoom plig nod mas yog luag cov neeg sab nrauv ua tus saib koj, luag yog tus luj koj, luag yog tus txiav txim hais tias koj tsim nyog los tsis tsim nyog tau.Vue Thaow, Centenary Medal 2001 receiver
Vwj Thoj hais tias "Kuv xav tias yog peb xav ua ib tug Hmoob muaj koob nto npe rau lub teb chaws Australia no, txawm koj nto npe xwb los yog tag nrho Hmoob nto npe, kuv nto npe xwb los yog tag nrho Hmoob nrog nto npe. Peb yuav tau tsim txoj kev zoo, thiab peb tsis txhob khuv khuv xim peb lub dag zog.
"Peb kav tsij mus sib ntsib sib cuag nrog luag tej koom haum dab tsi los xij peem. Mus ua hauj lwm yeem thaj, mus nyob rau hauv, mus kawm, mus pab luag ua luag ib tug tub txib, kom yus mus tawm ntsej tawm muag, mus tawm tswv yim thiab muaj lus dab tsi hais los yus hais thiab. Kom luag paub tias yus yeej muaj feem nrog luag thiab. Qhov no yog ib qho zoo rau ntawm yus ua ntej ces dhau ntawm yus ces zoo mus rau Hmoob thoob plaws lawm.
"Kuv tsev neeg peb yeej ua npaum li no, yus yeej tsis nco qab tias yuav vam txiaj ntsim dab tsi li nawb. Yus qhov txiaj ntsim yus vam ces yog rau rau siab ua tej no seb puas to tau pes tsawg tus Hmoob tuaj nrog yus nyob xwb.
"Yog tias peb xav kom peb nrog luag nyob tau ces peb yuav tau ເສັຽສະຫລະ mus li no, es peb tsis txhob xav tias, mus ua ub ua no tsis muaj nqes, thiab niaj hnub nyob niaj hnub mus nuv ntses thiab mus ntaus tuj lub xwb. Tej no yeej zoo rau yus tab sis tsis zoo rau sab nrauv.
"Peb yuav zoo los yog yuav tsum yog luag qhuas peb sab nrauv tuaj mas peb thiaj zoo, hos yog luag tsis qhuas peb sab nrauv tuaj ces peb tsis zoo. Kuv xav kom peb xav li no."
Vwj Thoj hais ntxiv tias ''Tib neeg mas peb tsuas muaj ob yam xwb. Yam ib ces koj yuav tau xyuas seb ib co xwm txheej (situation) ntawd yog li cas. Yog muaj qhov situation lawm ces yus yuav tsum create qhov opportunity los ntawm qhov situation ntawd los. Yog tias yus create qhov opportunity tau yog ces yus yeej mus tau. Txog thaum kawg ces koj yeej muaj koob nto npe qhov ntawd. Piv txwv li Hmoob khiav ua neeg thoj nam yog qhov situation ces peb tsim lub koom haum Hmong Australia yog qhov opportunity, kom peb thiaj muaj xub ke coj tau Hmoob tuaj nyob teb chaws Australia no. Qhov ntawd yog peb lub zog, peb lub peev xwm mus fulfill qhov opportunity ntawd seb puas tau, thaum kawg peb kuj success thiab.
"Txog thaum kawg luag tej nom tej tswv kuj pom thiab, ces lawv thiaj muab qhov centenary medal no rau kuv.
"Tej no yog tej hauj lwm uas peb yuav tau ua tiag tiag es txog thaum kawg luag pom peb ces thiaj li muab ib qho award rau koj. Lo lus daim ntawv award no mas ntawm luag mas tsis tseem ceeb dab tsi nawb. Ntawm luab mas luag tsuas hais tias - 'Ua tsaug koj pab peb no xwb od!' Daim ntawv ntawd mas yeej hais li ntawd nawb. Luag tsis qhia kiag lub ntsiab lus rau yus. Luag tej nom tej tswv luag tsis zoo cia li los hais rau koj tias ua tsaug no ces luag muab daim ntawv ntawd rau koj, ces daim ntawv ntawd yog daim ntawv tias ua tsaug koj pab peb no.
"Ces yus pab yus, yus txawm ua rau yus xwb los luag tias yus pab luag.
"Tej no yog qhov tseem ceeb es uas kuv los ua hauj lwm rau Hmoob. Khiav nce toj nqes taug es peb poj niam me nyuam tag nrho niaj nub mus sab laj los tsis tau tias kuv ua rau kuv. Luag tias ua rau luag.
Thaum chiv thawj kuv noog tias yog vim li cas ... lawv (nom tswv Australia) thiaj tias ... es yog muaj koj peb thiaj tsis raug teeb meem ne. Koj twb saib xyuas cov neeg ntawd tag nrho, muaj txog peb plaub puas leej no koj twb saib xyuas tag nrho es teeb meem twb tsis txog peb, qhov ntawd yog koj pab peb. Yog tsis muaj koj es tej teeb meem ntawd los rau peb es peb yuav ua cas daws naw.Vue Thaow, Centenary Medal 2001 receiver
"Thaum ntawd yus mam paub tias ua cas yus xav tias yus ua rau yus xwb no, cas luag ho nco yus txiaj ntsim thiab no nas.
"Ces kuv xav kom sawv daws npaj tej no, sawv daws ua tej no es sawv daws tsis txhob xav tias ntshe kuv yuav khib koj yuav khib, tsis txhob xav tias tej koom haum no tsis muaj nqes, xav siv los siv, tsis xav siv los muab pov tseg, xav ua los ua tsis xav ua los muab kaw pov tseg.
"Peb txawm coob npaum li cas los yog peb tsis txawj ua ces peb yeej tsis muaj nuj nqe. Tib lub koom haum Hmoob Australia xwb yog peb txawj siv ces yuav muaj zog heev yuav muaj nuj nqes heev rau peb nawb."
References:
- https://www.movinc.org/charity-organization-about-us/leadership/advisory-board/vue-thaow?utm_source=chatgpt.com
- https://honours.pmc.gov.au/honours/search?searchText=Vue%20Thaow
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
