गर्भावस्था सजिलो होस् वा कठिनाइपूर्ण बच्चा जन्मने त्यो क्षणलाई प्राय आमाहरूले व्यग्रताका साथ पर्खिएका हुन्छन्।
तर के त्यो समय सबैका लागी जादुमय हुन्छ त ?
Mum माने आमा पोड्कास्ट शृङ्खलाको पाँचौँ भागमा यसका साथै अस्पताल जाने तयारी र बच्चा जन्मिए पछि सामान्यतया अस्पतालमा हुने प्रक्रियाहरूका बारेमा चर्चा गरिएको छ।
तीन बच्चाकी आमा जमुना अधिकारी रिजालले पहिलो बच्चा जन्मँदा लामो सुत्केरी बेथा र ईपिसिओटमी (आमालाई बेथा लागेको बेला योनी र मलद्वार बिचको स्थानलाई चिर्नुपर्ने एक प्रकारको शल्यक्रिया) पश्चातको दुखाइ रहे पनि बच्चालाई काखमा लिएपछि ''आनन्द'' लागेको बताइन्।
तर तेस्रो बच्चा जन्मिएको समयमा अनुभव अलि फरक रह्यो, उनी भन्छिन्।
"सेकेन्ड पनि मलाई राम्रै खुसि नै लाग्यो तर यो थर्ड चाहिँ यति गाह्रो भयो कि मैले हेर्दै हेरिन त्यो (बच्चालाई छातीमा) राखिदिँदा पनि।"
रोजी अर्याल लीजले पनि बच्चा जन्मी सकेपछि राहत महसुस भएता पनि बच्चासँग तत्कालै भने सामिप्यता महसुस नभएको सम्झिइन्।
उनी भन्छिन्,"बच्चालाई छातीमा राखिदिए। अनि हामीलाई बच्चाको जेन्डर पहिले नै थाहा थिएन, त्यसैले मेरो श्रीमानले आएर मलाई त जेन्डर थाहा भयो भन्दा पनि मलाई चाहिँ ह्या मलाई मतलब छैन भन्ने जस्तो भएको थियो।"
बच्चा जन्मिए पछि सबै जना खुसीले रोए पनि आफू भने नरोएको रोजीको भनाइ छ।
"मलाई (त्यति बेलाको) सबैभन्दा कडा सम्झना बच्चाको नभएर एउटा नर्सले मलाई निकै गुलियो तातो चिया स्ट्रबाट खान दिएकी थिइन् भन्ने रहेको छ।"
थकानका कारणले गर्दा त्यस्तो भएको हुनसक्ने अनुमान उनी गर्छिन्।
मेलबर्नकी सुष्मिता खड्का खत्रीले पहिलो पटक आफ्नो छोरालाई देख्दा गर्भावस्थाका अप्ठ्यारा, सुत्केरी बेथाको पिडा सबै बिर्सिएर आनन्दको सास फेरेको Mum माने आमालाई बताइन्।
सबले त्यै मोमेन्ट होल्ड गरेर बसेको हुन्छ नि त कति बेला बच्चा बाहिर आउँछ भनेर।
बेथा लागेको समयमा बच्चाको मुटुको धड्कन कम भएका कारण सबै जना चिन्तित भएको सुष्मिता सम्झन्छिन्।
तर बच्चा स्वस्थ जन्मिए पछि भने आफूहरूलाई निकै खुसी लागेको उनले बताइन।
"बच्चा जन्मी सकेपछि बच्चालाई होल्ड गरे। त्यो मोमेन्ट इन्जोय नै गरिराखेको थिएँ हाँसी-हाँसी नै तर मेरो थर्ड डिग्री टेयर भएको भएर त्यो सुचरिङ्ग पार्ट चाहिँ एकदमै गाह्रो भा'को थियो।"
विज्ञको सुझाव
बच्चा जन्मी सकेपछि एउटा चुनौती सकिए पनि धेरै आमाहरूले भर्खर जन्मिएको बच्चाको स्याहारलाई लिएर चिन्ता व्यक्त गरेको पाइन्छ।
भर्खर जन्मिएको बच्चामा देखिने केही स्वास्थ्य समस्याहरू र यसको स्याहारका बारेमा मेलबर्नबाट बाल स्वास्थ्य कै क्षेत्रमा कार्यरत डाक्टर रिजा खनालले आफ्नो सुझाव दिएकी छन्।
Mum माने आमासँग कुरा गर्दै उनले आमाको दूध चुसाउन देखिने समस्या, जन्डिस, सुगर लेभल कम हुने लगायतका विषयमा कुरा गरेकी छन्।
आमाको दूध खुवाउँदा बच्चा अघाएको छ कि छैन भनेर कसरी थाहा पाउने भन्ने जिज्ञासामा उनी भन्छिन्, "जब बच्चाले ब्रेस्टफीड गर्न छोड्छ, फोर्स नगर्ने के बच्चालाई मलाई लाग्छ बच्चाको अनुसार चल्नु नै ठिक हुन्छ। "
त्यस्तै नवजात शिशुको स्याहारलाई लिएर अस्ट्रेलियाका अस्पतालमा नै उपलब्ध हुने सेवाहरूमा बच्चाको हियरिङ्ग टेस्ट पनि पर्दछ।
बच्चाले आवाजहरूमा कत्तिको प्रतिक्रिया जनाउँछ भन्ने जाँच किन आवश्यक छ भन्ने सम्बन्धमा नेपालमा स्पीच थेरापिस्टका रूपमा काम गरेकी र अस्ट्रेलियामा पनि सोही क्षेत्रमा पढाइ सकाएकी आस्था कोइरालाले बताएकी छन्।
"उनीहरूको (नवजात शिशुहरूको) जन्मिए देखि नै कम्युनिकेसन सुरु हुने भएकोले छुँदा खेरि हात हल्लाउँछ कि हल्लाउँदैन, रेस्पोन्स कस्तो छ, उसको जुन रेफ्लेक्सहरू हुन्छ हाम्रो स्पीच प्याथोलोजिस्टहरूले चाहिँ रिफ्लेक्सहरू टेस्ट गर्नुहुन्छ।"
उनका अनुसार अडियोलोजिस्टसँगको सहकार्यमा बच्चाले कान सुन्छ कि सुन्दैन भनेर गरिने जाँच, र बच्चाहरूको प्रतिक्रियाको जाँच पछि सम्मको वृद्धि विकासका लागी महत्त्वपूर्ण हुने गर्दछ।
पाँचौँ भागमा समावेश गरिएका विषयहरू:
- अस्पताल जाने तयारी र हस्पिटल ब्यागमा के कस्ता कुराहरू राख्ने
- सुत्केरी बेथाका अनुभव
- बेथा लागेको बेला दुखाइ कम गर्ने औषधि लिने बारेको निर्णय
- बच्चालाई पहिलो पटक देख्दाको अनुभव
- नवजात शिशुले कान सुन्ने नसुन्ने साथै उसको प्रतिक्रियाको जाँच
- सुरुवाती दिनहरूमा बच्चामा देखिने समस्याहरू (जन्डिस, सुगर लेभल कम हुने, दूध चुसाउन समस्या )
पाँचौँ भाग सुन्नुहोस्:
Mum माने आमा पोड्कास्ट मा नयाँ सामाग्री उपलब्ध हुनासाथ सुन्न यहाँ थिच्नुहोस्। हाम्रो अन्य प्रस्तुति भने यहाँबाट सुन्न सकिन्छ।
पोड्कास्ट शृङ्खलाका बारेमा:
अस्ट्रेलियामा नेपाली पृष्ठभूमिका आमा बनेका वा बन्ने प्रतीक्षामा रहेकाहरूका लागी बच्चा पाउने योजना देखि बच्चा जन्मिएपछि सम्मका यात्रा तुलनात्मक रूपमा सहज पनि हुन सक्छन् तर यो मातृत्व यात्रा अड्चन बिनाको भने छैन।
सबैको मातृत्व अनुभव फरक फरक भए पनि समानता पनि उत्तिकै हुन सक्छ।
Mum माने आमा पोड्कास्ट शृङ्खला अस्ट्रेलियामा बसोबास गर्ने नेपाली पृष्ठभूमि भएका र भर्खरै नयाँ आमा बनेकाहरूको बारे एसबीएसको प्रस्तुति हो। यसमा हामी नयाँ आमाहरूलाई पर्ने समस्या, उनीहरूको अनुभव सुन्नेछौँ भने सम्बन्धित क्षेत्रका जानकारहरूसँग पनि छलफल गरेका छौँ।
पहिलो भाग : १.बच्चा जन्माउने योजना: गर्भधारण र चुनौतीहरू दोस्रो भाग : २. कोभिड-१९ का बेला अस्ट्रेलियामा नयाँ आमाबाबु बन्दै गर्दाको अनुभव तेस्रो भाग: ३. गर्भावस्था: अनुभव र चुनौतीहरू चौथो भाग: ४. नेपाल र अस्ट्रेलियाका आमाका फरक मातृत्व अनुभव
नोट: यस पोड्कास्ट शृङ्खलामा प्रस्तुत जानकारी तथा सल्लाहहरू सामान्य प्रकारका छन्। तपाईँको व्यक्तिगत अवस्था बारे उपयुक्त सल्लाह तथा सुझावका लागि कृपया आफ्नो डाक्टरलाई सम्पर्क गर्नुहोस्।
