सन् १९९५ मा गोर्खा नेप्लीज कम्युनिटीको स्थापना हुनु अगावै नेपाली समुदायका सदस्यहरूले सामूहिक रूपमा पार्कहरूमा जम्मा भएर फुटबल खेल्न थाली सकेका थिए।
फुटबल तर्फको रुचि र समूहकी रूपमा बस्ने भएकाले पनि समय निकालेर स्थानीय पार्कहरूमा फुटबल खेल्नु नेपालीका लागि नौलो थिएन।
एकै ठाउँमा बस्ने वा वरिपरि नै बस्ने भएकाले एकले अर्कालाई राम्ररी चिन्ने गरेको गोर्खा नेप्लीज कम्युनिटीका हालका उपाध्यक्ष एवम् स्पोर्टस को-अर्डिनेटर राजीव प्रधान बताउँछन्।
सन् १९९८ मा भने आधिकारिक रूपमै जीएनसीले टुर्नामेन्ट सञ्चालन गर्न थालेको उनको भनाई छ।
“कति जना दाइहरू ट्याक्सी चलाउनु हुन्थ्यो, खाजा खाने भेट्ने ठाउँ एकै ठाउँमा हुँदा, छुट्टीमा उहाँहरू फुटबल खेल्नुहुन्थ्यो जसलाई ट्याक्सी टिम पनि भनिन्थ्यो,” प्रधानले भने।
तत्कालीन समयमा आधिकारिक रूपमा नाम नराखिएको भए पनि, खेलाडीहरू बस्ने सबअर्बका आधारमा टोलीको नाम राखिने गरेको प्रधानले बताए।
यता जीएनसी अन्तर्गत नै सुरुवाती दिन देखि फुटबल खेल्न सुरु गरेका अनिल थापा मगर पनि चाड पर्वका बेला भेला भएर खेल्न सुरु गरिएको फुटबल पछि टुर्नामेन्टका रूपमा सञ्चालन हुन थालेको बताउँछन्।
उनका अनुसार सन् १९९८ मा टुर्नामेन्ट सुरु हुँदा ४/५ वटा टिम भए पनि चर्चित बरवुडको लालीगुराँस फुटबल क्लब र म्यारीकभिल फुटबल क्लब थिए।
तर पछि म्यारिकभिल सगरमाथा फुटबल क्लबमा परिणत भयो।
तत्कालीन समयमा हङकङ, बेलायत र सिंगापुरका लाहुरेहरूका छोरा छोरीहरू फुटबल खेल्ने गरेको अनिल थापा मगर बताउँछन्।
आफू पनि ब्रिटिस लाहुरेको छोरा भएको र आफू जस्तै बेलायत र सिंगापुरका पूर्व आर्मीहरूको छोरा छोरीहरूले यहाँ पनि फुटबललाई निरन्तरता दिएको उनले बताए।
राजीव प्रधान र अनिल थापा मगरसँग गरिएको कुराकानी सुन्नका लागि अस्ट्रेलियामा नेपाली फुटबलको पहिलो भाग सुन्नुहोस्।
अस्ट्रेलियामा नेपाली भकुन्डो पोडकास्ट एसबीएस रेडियो एप वा तपाइको रोजाइको पोडकास्ट एप्पल पोड्कास्ट वा स्पटीफाइ एपलाई फलो गरेर सुन्न सक्नु हुनेछ।
हाम्रा थप अडियो प्रस्तुतिहरू पोडकास्टका रूपमा उपलब्ध छन्। यो नि:शुल्क सेवा प्रयोग गर्न तपाईंले आफ्नो नाम दर्ता गर्नु पर्दैन। पोडकास्टमा सामाग्री उपलब्ध हुनासाथ सुन्न यहाँ थिच्नुहोस्।
