پندرہ سال سے چائلڈ کیئر کے شعبے سے وابستہ آمنہ جاوید نے بتایا کہ آسٹریلیا میں پری کنڈر، سیشنل کنڈر اور لانگ ڈے کیئر کے نظام میں کیا فرق ہے اور یہ پاکستان کے نظام سے کس طرح مختلف ہے۔
آمنہ جاوید نے SBS سے بات چیت میں بتایا کہ آسٹریلیا میں چائلڈ کیئر دراصل ابتدائی تعلیم اور دیکھ بھال کا مجموعہ ہے، جہاں والدین اپنے بچوں کو کام یا تعلیم کے دوران صبح چھ بجے سے شام چھ بجے تک چھوڑ سکتے ہیں۔ ان کے مطابق وکٹوریہ میں بچہ تقریباً چھ ہفتے کی عمر سے لے کر تین سال تک لانگ ڈے کیئر میں جاتا ہے، جس کے بعد وہ سیشنل کنڈر یا کنڈر میں داخل ہو سکتا ہے، جبکہ اسکول میں داخلے کی عمر کی حد اپریل تک پانچ سال مقرر ہے۔
آمنہ جاوید نے واضح کیا کہ پاکستان میں بچے عموماً ڈھائی سے تین سال کی عمر میں پلے گروپ کے ذریعے اسکول کا آغاز کر دیتے ہیں، جبکہ آسٹریلیا میں بچے کو دو سال تک کھیل پر مبنی تعلیم (پلے بیسڈ لرننگ) کے ذریعے اسکول کے لیے تیار کیا جاتا ہے، جس میں لٹریسی اور نیومریسی کی بنیادی مہارتیں سکھائی جاتی ہیں۔
انہوں نے بتایا کہ اسکول کے پہلے سال یعنی فاؤنڈیشن کلاس میں بھی یہی طریقہ اپنایا جاتا ہے تاکہ بچے کے لیے یہ منتقلی نہایت آسان اور مثبت ہو۔ آمنہ جاوید نے مزید بتایا کہ وکٹوریہ کی حکومت ہفتے میں پندرہ گھنٹے مفت کنڈر کی سہولت فراہم کرتی ہے، جس کے تحت بچے کو دو دن تک بھیجا جا سکتا ہے، جبکہ باقی دنوں کے اخراجات میں والدین کی آمدنی کی بنیاد پر حکومتی سبسڈی شامل کی جاتی ہے۔
