کینبرا میں پاکستانی کمیونٹی کے زیرِ اہتمام قوالی نائٹ منعقد ہوئی, جس میں بھارتی نژاد قوال کلدیپ بینس نے پرفارم کیا۔ انہوں نے آسٹریلیا میں صوفی فن کو فروغ دینے کے عزم کا اظہار کیا اور نصرت فتح علی خان کو اپنا پسندیدہ قوال قرار دیا۔ تقریب میں پاکستانی کمیونٹی نے بھرپور شرکت کی اور محفل کو سراہا-
کینبرا میں یونیورسٹی آف کینبراپاکستانی طلبا تنظیم کے زیرِ اہتمام منعقد ہونے والی قوالی نائٹ کو شرکاء اور منتظمین نے ایک یادگار ثقافتی ایونٹ قرار دیا۔ اس ایونٹ کے منتظمین میں رحیم شامی، ہرا شاہد اور دیگر شامل تھے، جنہوں نے کہا کہ اس پروگرام کے انعقاد کے لیے انہوں نے بھرپور محنت کی تاکہ کمیونٹی کو ایک پلیٹ فارم پر اکٹھا کیا جا سکے۔ منتظمین کے مطابق اس طرح کے ایونٹس نہ صرف ثقافتی روابط کو مضبوط کرتے ہیں بلکہ کمیونٹی کے درمیان ہم آہنگی کو بھی فروغ دیتے ہیں۔
شرکاء میں شامل حامد مونگا نے کہا کہ قوالی کے فن کو قریب سے سمجھنے اور اس سے جڑنے کی ضرورت ہے، اور اس محفل کے ذریعے اس فن کو بہتر انداز میں محسوس کرنے کا موقع ملا ہے۔ انہوں نے کہا کہ اس ایونٹ کے لیے تمام ٹیم نے بڑی محنت کی ہے۔
زارہ زیشان نے کہا کہ یہ ایک بہت اچھا موقع تھا جس کے ذریعے کمیونٹی کو اکٹھا کیا گیا، خاص طور پر ایسے وقت میں جب کینبرا میں اس نوعیت کے ایونٹس کم ہی دیکھنے کو ملتے ہیں۔ انہوں نے اس ایونٹ کو طلبہ اور کمیونٹی کے درمیان رابطے کا ایک مثبت ذریعہ قرار دیا۔
