حکومت کی جانب سے حالیہ ویزا اصلاحات کے تحت ایک نئی منسٹیریل ڈائریکشن ایک سو سترہ سامنے آئی ہے، جو خاص طور پر فیملی ویزوں کی پراسیسنگ ترجیحات کو تبدیل کرتی ہے۔ اس سے کن درخواست گزاروں کو فائدہ ہوگا اور کن کا انتظار مزید طویل ہو سکتا ہے؟ اس اہم موضوع پر ہم نے گزشتہ پندرہ برس سے رجسٹرڈ مائیگریشن ایجنٹ کی حیثیت سے خدمات انجام دینے والے عبدالنعیم قاضی سے تفصیلی گفتگو کی۔
عبدالنعیم قاضی کے مطابق منسٹیریل ڈائریکشن ایک سو سترہ خاص طور پر فیملی ویزوں سے متعلق ہے اور صرف ان درخواست گزاروں پر اثرانداز ہوتی ہے جن کے اسپانسر آسٹریلوی شہری، مستقل رہائشی یا اہل نیوزی لینڈ شہری ہوں، یعنی اسٹوڈنٹس یا دیگر عارضی ویزوں پر اس کا کوئی اثر نہیں پڑے گا۔ انہوں نے وضاحت کی کہ اس ڈائریکشن کے تحت سب سے پہلی ترجیح ان کیسز کو دی جائے گی جن میں ویزا مسترد ہونے کے بعد منسٹیریل انٹروینشن کے لیے درخواست دی گئی ہو، اس کے بعد پارٹنر اور ڈیپینڈنٹ چائلڈ ویزے، پھر آرفن ریلیٹو، کنٹری بیوٹری پیرنٹ اور ایجڈ پیرنٹ، اس کے بعد کیئرر ویزے اور آخر میں عام پیرنٹ ویزے آتے ہیں۔
انہوں نے یہ بھی بتایا کہ اس ترتیب کے اندر آسٹریلیا میں مقیم آن شور درخواست گزاروں کو ان درخواست گزاروں پر فوقیت دی جائے گی جو آسٹریلیا سے باہر یعنی آف شور درخواست دیتے ہیں یا جن کے ویزے کی شرط کے مطابق انہیں گرانٹ کے وقت آسٹریلیا سے باہر ہونا ضروری ہے، مثال کے طور پر پارٹنر ویزا کیٹیگری میں ۸۲۰ اور ۸۰۱ کو ۳۰۹ اور ۱۰۰ پر ترجیح حاصل ہوگی۔ تاہم انہوں نے واضح کیا کہ اس کا مطلب یہ نہیں کہ تمام آن شور کیسز مکمل ہونے تک آف شور درخواستوں پر بالکل کام نہیں ہوگا، بلکہ ہر مالی سال کے آغاز پر مختص کیے گئے کوٹے کے تحت آن شور اور آف شور دونوں کے لیے ایک متوازی ترتیب برقرار رکھی جاتی ہے۔
