ورلڈ کپ کے چھٹے روز ریکارڈز قائم ہوئے اور سپر اسٹار کھلاڑیوں نے شاندار کارکردگی کا مظاہرہ کیا۔ لیونل میسی چھ مختلف فیفا ورلڈ کپ کھیلنے والے تاریخ کے پہلے کھلاڑی بن گئے اور اس تاریخی موقع کو ہیٹ ٹرک کے ساتھ یادگار بنا دیا، جبکہ کیلیان ایمباپے اور ارلنگ ہالینڈ نے بھی دو، دو گول کرکے اپنی ٹیموں کو متاثر کن فتوحات دلائیں
نیویارک میں گروپ آئی کے مقابلے میں فرانس نے سینیگال کو 1-3 سے شکست دے کر اپنے ورلڈ کپ سفر کا کامیاب آغاز کیا۔
پہلا ہاف بغیر کسی گول کے ختم ہوا، لیکن 66ویں منٹ میں کیلیان ایمباپے نے فرانس کو برتری دلائی، جس کے بعد بریڈلی بارکولا نے دوسرا گول کیا۔
سینیگال نے انجری ٹائم میں ایک گول کر کے مقابلہ دلچسپ بنانے کی کوشش کی، تاہم چند لمحوں بعد ایمباپے نے اپنا دوسرا گول کر کے فرانس کی فتح یقینی بنا دی۔ اس کے ساتھ ہی وہ فرانس کی تاریخ کے سب سے زیادہ بین الاقوامی گول کرنے والے کھلاڑی بھی بن گئے۔
ادھر میساچوسٹس میں آسٹریلوی کوچ گراہم آرنلڈ کی زیرِ قیادت عراق کا مقابلہ ناروے سے ہوا، جو دونوں ٹیموں کی طویل عرصے بعد ورلڈ کپ میں واپسی کا میچ تھا۔
ناروے کے اسٹار اسٹرائیکر ایرلنگ ہالینڈ نے پہلے ہاف میں ہی دو گول کر کے اپنی ٹیم کو مضبوط برتری دلا دی، اور ناروے نے یہ مقابلہ 1-4 سے اپنے نام کر لیا۔
شکست کے باوجود عراق کے کوچ گراہم آرنلڈ اپنی ٹیم کے اگلے مرحلے میں پہنچنے کے امکانات کے حوالے سے پُرامید دکھائی دیے۔
کینساس سٹی میں دفاعی چیمپئن ارجنٹینا نے الجزائر کو صفر کے مقابلے میں تین گول سے شکست دی، اور تینوں گول لیونل میسی نے کیے۔
39 سالہ میسی اب فیفا ورلڈ کپ کی تاریخ میں 16 گول کے ساتھ میروسلاف کلوزے کے ہم پلہ ہو گئے ہیں اور آل ٹائم ٹاپ اسکوررز کی فہرست میں مشترکہ طور پر پہلے نمبر پر آ گئے ہیں۔
دوسری جانب کیلیفورنیا میں آسٹریا نے پہلی مرتبہ ورلڈ کپ کھیلنے والی اردن کی ٹیم کو 1-3 سے شکست دی۔
رومانو شمڈ نے آسٹریا کو برتری دلائی، جسے دوسرے ہاف کے آغاز میں علی علوان نے برابر کر دیا، تاہم آسٹریا نے مزید دو گول کر کے فتح اپنے نام کر لی، جن میں ایک انجری ٹائم پنالٹی بھی شامل تھی۔
اب آسٹریلیا کے اگلے ورلڈ کپ میچ میں صرف تین دن باقی ہیں، جہاں ساکروز 20 جون کو سیئٹل میں مشترکہ میزبان امریکہ کے خلاف میدان میں اتریں گے۔ یہ میچ آسٹریلوی مشرقی وقت کے مطابق صبح 5 بجے ایس بی ایس پر براہِ راست نشر کیا جائے گا۔
اس کے بعد آسٹریلیا 26 جون کو پیراگوئے کے خلاف بھی ایس بی ایس پر براہِ راست ایکشن میں نظر آئے گا۔
کل کے مقابلوں پر نظر ڈالیں تو گروپ اے کے دوسرے مرحلے کے میچز کا آغاز جنوبی کوریا اور میکسیکو کے درمیان ہوگا، جہاں دونوں ٹیمیں اپنی پہلی کامیابی کے بعد آمنے سامنے آئیں گی۔
گروپ بی میں مشترکہ میزبان کینیڈا کا مقابلہ قطر سے ہوگا، جبکہ سوئٹزرلینڈ کی ٹیم بوسنیا اور ہرزیگووینا کے خلاف میدان میں اترے گی۔
