Tub ceev xwm NSW tau muab cov xwm txheej ob txiv tub tua neeg tuag txog 16 tus thiab raug mob ntau caum tus tis npe tias yog cov xwm txheej terrorist attack.
Hau xeev NSW Chris Minns thiab thawj pwm tsav Anthony Albanese kuj tau mus xyuas Ahmmed Al-Ahmmed uas yog tus neeg pab txeeb ib rab phom ntawm ib tug neeg phem uas raug mob rau nws txhais caj npab ntau qhov uas tseem kho ntawm tsev kho mob NSW. Mr Albanese ''thiaj tau ua tsaug rau Al-Ahmmed cov kev muaj peev xwm thiab qhia tias yog ib tug cwj pwm neeg Australia zoo tshaj plaws, yog ib co xwm txheej phom sij tshaj plaws rau Australia thiab yuav tsis cia tej neeg phem tsim kev sib tawg tswj rau Australia.''
Tib lub caij no los Amandeep Singh-Bola uas yog ib tug personal trainer los kuj muaj peev xwm pab txhom tau ib tug neeg tua neeg rau lub caij tub ceev xwm tswj tej xwm txheej no thiab.
Nom tswv kuj txheeb tau tias tej neeg phem no tau muaj kev cuam tshuam nrog cov neeg phem IS thiab kuj tseem muaj IS tus chij hauv nws lub tsheb. Tom qab uas nom tswv txheeb tau tias muaj ib co foob pob/nplaum hauv tsheb thiab.
Thiaj ua rau Australia tus thawj pwm tsav thiab tus hau xeev NSW uas yog Chris Minns tau hais tias 'yuav nrog xyuas kom tswj tau tej cai siv phom kom nruj tshaj plaws ntxiv, tsuas pub tej neeg siv riam phom rau ib ntus thiab tsuas pub muaj tsawg rab phom xwb tsis yog yuav pub siv tag ib txhis.'
Ua ke no los kuj muaj ntiaj teb tej coj tau los hais lus tawm tsam tsis pom zoo nrog cov kev tua neeg no hais tsi ntsees rau Israel tus thawj pwm tsav Benjamin Netanyahu uas liam tias tus tsoom fwv Albanese tsis kub sib los tiv thaiv thiab txo kom tsis txhob muaj tej xwm txheej faib cais ntxub ntxaug tsis nyiam cov neeg Jews ntawm teb chaws Australia, uas Mr Albanese hais tias Australia yeej tau kub siab ua tej hauj lwm no.
Tom qab tau muaj tej xwm txheej no tshwm sim lawm tej neeg thiaj tau mus ua tej koom txoos taw tswm ciab nco thiab hwm txog tej neeg raug ob txiv tub uas tua tej neeg no ntawm ntau lub nroog thoob teb chaws Australia no.
