नेपाली राष्ट्रिय क्रिकेट टिमले तेस्रो पटक टी२० विश्वकप खेल्ने भएको छ। ओमानमा जारी विश्व कप एसिया प्यासिफिक छनोट मार्फत नेपालले विश्व कपमा आफ्नो स्थान पक्का बनाएको हो।
बुधवार भएका खेलमा कतार र युएईले आ-आफ्ना खेल जितेसँगै नेपालले सन् २०२६ को फेब्रुअरी ७ देखि मार्च ८ सम्म भारत र श्रीलङ्कामा हुने १० औँ टी-२० विश्व कपमा खेल्ने पक्का भएको हो।
प्रतियोगितामा नेपाल हालसम्म अपराजित रहेको छ र ६ अङ्क बटुलेको छ।
कतारले जापान र युएईले सामोआलाई पराजित गरेका थिए। नेपालसँगै ओमानले पनि विश्वकप खेल्ने भएको छ।
भारत र श्रीलङ्कामा हुने विश्व कपमा २० राष्ट्र सहभागी हुने छन्। नेपाल र ओमान विश्व कपमा सहभागी हुने १७ औँ र १८औँ राष्ट्र बनेका छन्।
लगातार दोस्रो विश्व कप
नेपाल लगातार दोस्रो पटक टी-२० विश्व कपमा सहभागी हुन लागेको हो।
सन् २०२६ मा हुने विश्व कप नेपालको लागि तेस्रो विश्व कप हुनेछ।
नेपालले पहिलो पटक सन् २०१४ मा बङ्गलादेशले आयोजना गरेको टी-२० मा सहभागिता जनाएको थियो।
दोस्रो विश्व कप खेल्न राष्ट्रिय पुरुष टिमले १० वर्ष पर्खनु परेको थियो।
नेपालले दोस्रो पटक सन् २०२४ मा अमेरिका र वेस्ट इन्डिजमा भएको विश्व कपमा सहभागिता जनाएको थियो।
